لاہور(آن لائن)قومی مڈل آرڈربلے باز بابراعظم نے کہاہے کہ دورہ انگلینڈمشکل ضرورہے مگر ٹیم اپنا بہتر کھیل دکھائے گی اورفتح نام کرے گی،میں ٹیسٹ میچز میں ابھی تک اچھا پرفارم نہیں کرسکاہوں۔انگلش ٹورکے دوران کوشش ہوگی کہ اپنی کارکردگی کی بدولت ٹیم کی جیت میں اہم کردار ادا کروں۔مصباح اوریونس کے جانے سے جو خلا پیدا ہوا اس کو کم کیا جائے ۔ کوشش ہوگی وکٹ پرزیادہ دیر تک ٹھہر کر رنزکروں۔ حالیہ برسوں میں پاکستان کی نماندگی کرنےوالے بلے بازوں میں بابراعظم سب سے بہترین دکھائی دیتے ہیں جومحض دس ہفتوں کے دوران دو بار ٹی ٹونٹی بیٹنگ رینکنگ میں ٹاپ پوزیشن پاچکے ہیں جبکہ ون ڈے رینکنگ میں پانچ بہترین بلے بازوں میں شامل ہیں۔بابر اعظم کی محدود اوورزکے دونوں فارمیٹس میں کاکردگی کا تسلسل تو برقرار ہے تاہم حیران کن طورپر وہ ٹیسٹ فارمیٹ میں اچھی کارکردگی دکھانے میں ناکام رہے ہیں۔گزشتہ ٹیسٹ کیلنڈرایئر کے دوراان چھ ٹیسٹ میچوں کی 12اننگزمیں بابر اعظم 16.72کی معمولی اوسط سے صرف 184رنزبناسکے ہیں جن میں صرف دوففٹیاں شامل ہیں ،5اننگزمیں تو وہ کوئی رن بنائے بغیر ہی آ¶ٹ ہوگئے تھے۔40 ون ڈے اننگزمیں 7سنچریاں بنانے والے بابراعظم اب تک کیریئرکے گیارہ ٹیسٹ میچوں کی 22اننگز میں سنچری سے محروم ہیں اور دورہ آئرلینڈ اور انگلینڈ ان کے ٹیسٹ کیریئر کے حوالے سے انتہائی اہم ہے۔واضح رہے کہ بابر اعظم کا فرسٹ کلاس ریکارڈ بھی زیاد ہ اچھا نہیں ہے اور 23سالہ بلے باز اب تک40فرسٹ کلاس میچز میں 34.29کی اوسط سے 2092رنز سکور کرسکے ہیں جن میں صرف 2سنچریاں اور14نصف سنچریاں شامل ہیں۔

لاہور(آئی این پی) پاکستان کرکٹ ٹیم کے کپتان سرفراز احمد کی بھتیجی کے جگر نے کام کرنا چھوڑدیا ہے اور اس بچی کو جگر عطیہ کرنیو الے کی فوری ضرورت ہے ۔ سرفراز احمد نے دنیا بھرمیں پھیلے پاکستانیوں سے اپنی بھتیجی کی جان بچانے کے لیے جگرکے عطیے کی دردمندانہ اپیل کی ہے۔وکٹ کیپر کپتان نے سوشل میڈیا سائٹ ٹوئٹر پراپنی بھتیجی آئزہ کے حوالے سے بتایا کہ اس کی ایک سرجری ہوچکی ہے اور اسے فوری طور پر جگر عطیہ کرنے والے کی اشد ضرورت ہے۔اپنے پیغام میں انہوںنے کہا میری یہ اپیل سب سے ہے اور وہ اپنی بھتیجی کی ضرورت پوری ہونے پر تعاون کرنے والے کے بیحدشکرگزار ہوں گے ۔ان کاکہناتھا کہ وہ اپنی بھتیجی کی طرف سے یہ اپیل کررہے جس کی بیماری سے لڑنے کی ہمت ہماری طاقت ہے۔انہوں نے اپنے ٹوئٹر فولوئرز سے اس پیغام کوزیادہ سے زیادہ پھیلانے کی بھی اپیل کی تاکہ بچی کو جلد از جلد جگر عطیہ کرنے والا مل جائے۔

ممبئی (اے پی پی ) بھارتی بلے باز ویرات کوہلی انڈین پریمیئر لیگ کی تاریخ میں زیادہ رنز بنانے والے بلے باز بن گئے، انہوں نے رواں آئی پی ایل میں ممبئی انڈینز کےخلاف کھیلے گئے میچ میں 92 رنز کی عمدہ اننگز کھیل کر آئی پی ایل میں زیادہ رنز بنانے کا چنائی سپر کنگز کے بلے باز سریش رائنا کا ریکارڈ توڑ کر یہ سنگ میل عبور کیا۔، رائنا نے 4558 رنز بنا رکھے تھے جبکہ کوہلی نے 4619 رنز بنا رکھے ہیں جس میں ان کی 4 شاندار سنچریاں اور 32 نصف سنچریاں بھی شامل ہیں۔

لندن(آئی این پی)ٹیسٹ کرکٹ محمد حفیظ کے بولنگ ایکشن کا بائیو میکنگ ٹیسٹ ایک بار پھر ہوگیا،قومی کرکٹر پر امید ہیں کہ اس بار ایکشن کلیئر ہو جائے گا۔آئی سی سی کی نامزد لفبرا یونیورسٹی میں قومی ٹیم کے آل راﺅنڈر محمد حفیظ کی گیندین ریکارڈ کی گئیں جن کا نتیجہ 14 روز میں سامنے آئے گا۔ذرائع کے مطابق یونیورسٹی کی لیب میں ٹیسٹ کرکٹر سے 3 اوورز کرائے گئے اور ان کی ہر گیند کا ریکارڈ کیمروں میں محفوظ رکھا گیا۔محمد حفیظ بولنگ ایکشن ٹیسٹ کے بعد جمعے تک وطن لوٹیں گے، آل راﺅنڈر کا بولنگ ایکشن پہلی بار2005 میں رپورٹ ہوا تھا۔نومبر 2014 میں نیوزی لینڈ کیخلاف ٹیسٹ سیریز میں دوسری بار وہ شک کی زد میں آئے، اپریل 2015 میں کلیئرنس کے 2 ماہ بعد ہی گال ٹیسٹ میں دوبارہ ایکشن رپورٹ ہوگیا۔یوں ایک سال کی پابندی لگ گئی، مدت پوری ہونے کے بعد گزشتہ سال سری لنکا کے خلاف سیریز میں ایک بار پھر ان کا ایکشن رپورٹ ہوا، آل راﺅنڈر کا اسٹیٹس چھننے کے بعد حفیظ ٹیم کے غیر مستقل رکن بن گئے۔ہیڈ کوچ مکی آرتھر واضح طور پر کہہ چکے کہ بولنگ کے بغیر ان کی ٹیم میں جگہ نہیں بنتی، آئی سی سی کی جانب سے حفیظ کا ایکشن کلیئر ہونے یا نہ ہونے کا باضابطہ اعلان کیا جائے گا۔

لاہور(آئی این پی)قومی کر کٹ ٹیم کے ہیڈ کوچ مکی آرتھرنے کہا ہے کہ دورہ انگلینڈاورآئرلینڈکےلئے باصلاحیت ٹیم منتخب کی۔انگلش کنڈیشنزکومدنظررکھ کر ٹیسٹ سکواڈفائنل کیا۔ذاتی پسندناپسندپرکسی کوڈراپ نہیں کیا۔مطلوبہ فارمیٹ کےلئے درکار کھلاڑیوں کو ہی اپنی ترجیح بنایاجائے گا۔ یہ تاثر غلط ہے کہ میں وہاب ریاض یا فواد عالم کے خلاف ہوں، بعض فیصلے سخت ضرور دکھائی دیتے ہیں لیکن وقت آنے پر پتہ چلے گا کہ ہماری نیت کس قدر صاف ہے۔انہوں نے کہا کہ دونوں کھلاڑیوں پر نہ دروازے بند ہوئے ہیں اور نہ ان کا کیریئر ختم ہوا ہے، اگلی سیریز میں یقینی طور پر فواد عالم اور وہاب ریاض کی سلیکشن پر غور کیا جائے گا۔ذرائع کا کہنا ہے کہ مستقبل میں فواد عالم کو پاکستان ٹیم میں جگہ ملنے کے امکانات روشن ہیں، کیمپ کے خاتمے پر انہیں یہ کہہ کر گھر رخصت کیا گیا کہ وہ دلبرداشتہ نہ ہوں۔تاہم میڈیا اور سابق کرکٹرز کی جانب سے ہونے والی تنقید نے پاکستان کرکٹ بورڈ حکام، ٹیم انتظامیہ اور سلیکشن کمیٹی کو بیک فٹ پر کر دیا ہے۔ ہیڈ کوچ مکی آرتھر دورہ آئرلینڈ اور انگلینڈ میں کئی نئے تجربات کرنے کا بھی ارادہ رکھتے ہیں۔دائیں ہاتھ سے بیٹنگ کرنے والے بابر اعظم پاکستان کی جانب سے ون ڈے میں تیسرے نمبر پر اور ٹی ٹونٹی میں اوپننگ کرتے ہیں لیکن آئرلینڈ اور انگلینڈ میں انہیں چوتھے یا پانچویں نمبر پر کھلانے کی تجویز ہے۔سب سے اہم اور مشکل ترین پوزیشن ون ڈان پر لیفٹ ہینڈ بیٹسمین حارث سہیل کھیلیں گے۔ حیران کن طور پر جارح مزاج اوپنر فخر زمان کو بھی مڈل آرڈر میں پانچویں یا چھٹے نمبر پر آزمایا جائے گا اور انہیں ذمے داری دی جائے گی کہ وہ اٹیک کریں۔ذرائع کا کہنا ہے کہ لاہور میں پاکستان ٹیم کی سلیکشن کرتے ہوئے فواد عالم ٹیم میں سلیکشن کے بہت قریب آگئے تھے لیکن پھر مکی آرتھر نے چوتھے اوپنر کے طور پر امام الحق کو پاکستان ٹیم میں شامل کرکے فواد عالم کی فائل بند کردی۔کپتان نے ٹیم میٹنگز میں فواد عالم کو ٹیم میں شامل کرنے پر زور دیا تھا لیکن مکی آرتھر اور چاروں سلیکٹرز پہلے امام الحق کو شامل کرنے کے حق میں تھے پھر سعد علی کو شامل کر کے فواد عالم کی ٹیم میں شمولیت کا راستہ بند کردیا۔ انضمام الحق نے فواد عالم کیس میں ہونے والی تنقید پر اپنے دفاع میں کہا کہ فواد عالم ایک بہترین کرکٹر ہیں لیکن گزشتہ 3 سال کے دوران دیگر کھلاڑی فہرست میں ان سے آگے رہے۔ ہم نے انہیں نیٹ میں طلب کیا تھا لیکن سعد علی کو ان سے بہتر پایا، کپتان اور کوچنگ اسٹاف سے مشاورت کے بعد سعد علی کو متفقہ طور پر منتخب کیا گیا۔چیف سلیکٹر نے کہا کہ ہم فواد کی بیٹنگ اوسط کو نظر انداز نہیں کر سکتے لیکن گزشتہ 3 سال کے دوران دیگر کھلاڑیوں نے ان سے زیادہ رنز اسکور کیے، فواد عالم کو منتخب نہ کرنے کا مقصد ہرگز یہ نہیں کہ انہیں اب منتخب نہیں کیا جائے گا۔