ممبئی(شوبزڈیسک) بالی وڈ کے باصلاحیت اداکار عرفان خان کے قریبی ذرائع کا کہنا ہے کہ کینسر کے مرض میں مبتلا اداکار کی حالت انتہائی تشویشناک ہے۔ بالی وڈ کے ساتھ ہالی وڈ میں بھی بہترین اداکاری کے جوہر دکھانے والے بھارتی فلم انڈسٹری کے باصلاحیت اداکار عرفان خان نے گزشتہ ماہ افسوسناک خبر سناتے ہوئے کہا تھا کہ وہ نیورو اینڈو کرائن کینسر نامی موذی مرض میں مبتلا ہیں تاہم ان کی بیماری ابھی ابتدائی مرحلے میں ہے۔بعد ازاں عرفان خان علاج کی غرض سے بیرون ملک چلے گئے تھے جہاں ان کا علاج جاری ہے لیکن بھارتی صحافی عمیر سندھو نے انکشاف کیا ہے کہ عرفان خان کی طبیعت مسلسل بگڑ رہی ہے اور وہ صحت یابی کی جانب جانے کے بجائے مزید بیمار ہوتے جارہے ہیں۔عمیر سندھو نے اداکار عرفان خان کے انتہائی قریبی ذرائع اور ان کے گھر والوں کی وساطت سے ٹوئٹ کرتے ہوئے کہا عرفان خان کینسر کی ابتدائی نہیں بلکہ آخری اسٹیج پر ہیں جب کہ ڈاکٹرز کا خیال ہے کہ وہ ایک ماہ سے زیادہ عرصے تک زندہ نہیں رہیں گے۔۔صحافی عمیر سندھو کی جانب سے خبر پوسٹ کرنے کے چند گھنٹوں بعد ہی یہ ٹوئٹ ہٹادی گئی تھی لیکن اس وقت تک یہ خبر جنگل کی آگ کی طرح پھیل چکی تھی۔واضح رہے کہ عرفان خان کو بالی وڈ میں بہترین اداکاری پر پدماشری، نیشنل اور فلم فیئر ایوارڈ سمیت متعدد ایوارڈز سے نوازا جا چکا ہے اور وہ ہالی وڈ کی کامیاب ترین فلموں جراسک ورلڈ اور لائف آف پائی میں بھی اپنی صلاحیتوں کا لوہا منواچکے ہیں۔

ممبئی(شوبز ڈیسک)بالی وڈ اداکارہ روینا ٹنڈن نے کہا ہے کہ عوامی شخصیات ہونے کا مطلب یہ ہے کہ ان پر کبھی بھی کسی وقت بھی کھلے عام تنقید کی جاسکتی ہے۔ماضی کی مست مست گرل کے مطابق عوامی شخصیت کو ہر وقت اپنے اوپر ہونے والی تنقید کو برداشت کرنے کا حوصلہ ہونا چاہیے۔1990 کی مقبول ترین بولی وڈ ہیروئنز میں شمار ہونے والی روینا ٹنڈن نے یہ بات اپنی ایک ٹوئیٹ میں کہی۔انہوں نے یہ ٹوئیٹ اس وقت کی جب انہیں ٹوئٹر پر تنقید اور تضحیک کا نشانہ بنایا گیا۔43 سالہ اداکارہ کو اس وقت ٹوئٹر پر تنقید کا نشانہ بنایا گیا جب انہوں نے 7اپریل کو اپنے بیٹے کی جانب سے سوئمنگ میں 3گولڈ میڈل اور ایک برونز میڈل جیتنے کی خوشی کا اظہار کیا۔روینہ ٹنڈن نے 7اپریل کو اپنے 12 سالہ بیٹے رنبیر تھدانی کی جانب سے جیتے جانے والے 3 گولڈ میڈلز اور ایک برونز میڈل کے ساتھ انہیں ملنے والے سرٹیفکیٹ کی تصویر شیئر کی۔اداکارہ کی جانب سے کی جانے والی ٹوئیٹ کے بعد انہیں کئی افراد نے تنقید کا نشانہ بنایا اور الزام عائد کیا کہ یہ میڈلز اور سرٹیفکیٹ پیسوں سے خریدے گئے ہیں۔اداکارہ نے خود پر تنقید کرنے والوں کو کرارا جواب دیتے ہوئے انہیں بے وقوف قرار دیا اور لکھا کہ منفی سوچ چھوڑ کرمثبت انداز میں آگے بڑھنا چاہیے۔اداکارہ نے ایسے لوگوں کو فرسٹریشن کا شکار بھی قرار دیا۔تاہم کئی افراد نے اداکارہ کو بیٹے کی کامیابی پر مبارکباد بھی پیش کی اور انہیں تجویز دی کہ تنقید کرنے والوں کو جواب دینے کی ضرورت نہیں۔روینہ ٹنڈن نے خود پر مسلسل تنقید ہونے پر سلسلہ وار ٹوئیٹ کیں اور انہوں نے گزشتہ روز ایک ٹوئیٹ کی، جس میں انہوں نے لکھا کہ عوامی شخصیات تنقید کے لیے کھلی ہوتی ہیں، انہیں کوئی بھی تنقید کا نشانہ بنا سکتا ہے۔تاہم اداکارہ نے اپنی ٹوئیٹ میں یہ بھی کہا ٹوئٹر پر صرف عوامی شخصیات کو ٹرول کیا جاتا ہے۔

ممبئی(شوبزڈیسک)بالی وڈ اداکارہ شلپا شیٹھی نے کہا ہے کہ کیریئر کے وسط میں گلیمر کرداروں کی مخصوص چھاپ کے بعد میری جدوجہد شروع ہوئی۔ بھارتی ذرائع ابلاغ کے مطابق اداکارہ شلپا شیٹھی نے کہا ہے کہ میں نے زندگی میں بہت سے اتار چڑھاﺅ دیکھے ہیں لیکن کبھی ہار نہیں مانی اور میں نے فلمی کیریئر کو اپنانے سے متعلق کبھی بھی سوچا تھا،17سال کی عمر میں جیب خرچ کے لئے ماڈلنگ کی اور وہ بھی اس لئے کہ کسی نے مجھے کہا کہ میں لبمی ہوں اور مجھے ماڈلنگ کے لئے کوشش کرنی چاہیئے۔انہوں نے کہا کہ میں نے 90کی دہائی میں زیادہ تر فلموں میں گلمیرس کردار ادا کئے جس کے باعث مجھ پر مخصوص کردار کی چھاپ لگ گئی اورمیں نے کبھی بھی فلموں میں کام کے لئے بھاگ دوڑ یا جدوجہد نہیں کی۔، میں نے اصل میں اپنے کیریئر کے وسط میں مختلف کرداروں پر مبنی فلموں کے لئے جدوجہد کی، پھر مجھے فلم دھڑکن کی پیشکش ہوئی اور میرے کیریئر کی تجدید ہوئی۔

لاہور (شوبزڈیسک)فلمسٹار نور نے سوشل میڈیا پر ویڈیو پیغام جاری کرتے ہوئے کہا کہ میرے بارے میں جھوٹی خبریں پھیلائی جا رہی ہیں کہ میں ایف بی آر کی نادہندہ ہوں اور مذکورہ ادارے نے میرے خلاف تحقیقات شروع کر دی ہیں ، میں واضح کرتی ہوں کہ میرا الفلاح بینک میں کوئی اکاﺅنٹ نہیں ہے ، 4ماہ پہلے میرا اکاﺅنٹ فریز کر کے رقم نکال لی گئی تھی جس کے بعد میں نے بذریعہ عدالت اپنا اکاﺅنٹ بحال کروا لیا تھا ۔انہوں نے کہا کہ میں ٹیکس ادا کرتی ہوں ،شوبز میں جتنا بھی کام کیا ہے مجھے اس کا چیک ملتا تھا جو انکم ٹیکس کی کٹوتی کر کے دیا جاتا تھا ۔ میڈیا سے درخواست ہے کہ کوئی بھی خبر چلانے سے پہلے لازمی طور پر تصدیق کر لیا کریں اور ویسے بھی میں اب شوبز چھوڑ چکی ہوں لہذا میرے بار ے میں منفی باتوں سے پرہیز کیا جائے۔