کوٹ مومن(ویب ڈیسک )پاکستان مسلم لیگ (ن) کی رہنما مریم نواز کاکہنا ہے کہ کوئی نااہل ہوکر بھی سرخرو اور کوئی اہل ہوکر بھی شرمندہ پھر رہا ہے کیونکہ وہ جانتا ہے کہ صداقت اور امانت کے پیچھے میچ فکس ہے۔کوٹ مومن میں جلسہ عام سے خطاب کرتے ہوئے مریم نواز نے کہا کہ مسلم لیگ (ن) نے اپنی انتخابی مہم شروع کردی ہے اور مخالفین پہلی بارکسی جلسے میں میاں نواز شریف کے ساتھ آئی ہوں لیکن جہاں جہاں سے میاں صاحب گزرتے ہیں ہر جگہ ایک ہی نعرہ لگتا ہے کہ وی لو یو (ہم آپ سے محبت کرتے ہیں)، پاکستان کے عوام نواز شریف نے محبت کرتے ہیں، مخالفین ووٹ نہیں لے سکتے اس لئے کبھی وہ انگلی کے پیچھے تو کبھی سپریم کورٹ کے پیچھے چھپتے ہیں۔مریم نواز شریف نے کہا کہ کوئی نااہل ہوکر بھی سرخرو اور کوئی اہل ہوکر بھی شرمندہ پھر رہا ہے کیونکہ وہ جانتا ہے کہ صداقت اور امانت کے پیچھے میچ فکس ہے، کبھی وہ کچھ کہتا ہے تو کبھی کچھ لیکن جو ہم اور عوام کو نظر آرہا ہے وہ اسے دیکھ نہیں پارہا۔ 2013 سے پہلے 20،20 گھنٹے لوڈ شیدںگ ہوتی تھی لیکن اب بجلی کا بحران ختم ہوگیا ہے۔ یہ مسئلہ ایسے ختم نہیں ہوا، اس کے لیے خون پسینہ بہایا گیا ہے۔ کسی نے تو سازشوں اور دھرنوں کے باوجود کام کیا ہے۔مریم نواز نے کہا کہ نیت سزا دینے کی ہو تو پاناما سے اقامہ نکل ہی آتا ہے، پاناما کیس شریف خاندان پردباو¿ ڈالنے لینے کے لیے بنایا گیا، پاناما کے نام سے شریف خاندان ، نواز شریف کی 3 نسلوں کا بار بار احتساب ہوا، ذاتی کاروبار کی ہر چیز کھنگالی گئی لیکن کہیں سے کرپشن کا شائبہ تک نہ ملا تو اقامہ نکال کر لے آئے حالانکہ اقامہ دراصل ویزا ہوتا ہے۔ انشا اللہ ایک دن پاناما کے بارے میں بھی اسی سپریم کورٹ سے یہی الفاظ سنیں گے جو حدیبیہ کیس میں کہے گئے ہیں۔سابق وزیر اعظم کی صاحبزادی کا کہنا تھا کہ کہا جاتا ہے کہ نواز شریف این آر او کررہا ہے، این آر او کون کررہا ہے اور اس کی ضروت کس کو ہے، این آر او تو اس کو کہتے ہیں کہ نواز شریف کی بیٹی کا کیس تو نیب میں بھیج دیا جاتا ہے لیکن عمران خان کو بری کردی جائے۔مریم نواز نے کہا کہ افسوس اس بات کا ہے کہ آج تک کسی عدالت کو اتنی ہمت نہیں ہوئی جس پرویز مشرف نے آئین اور قانون پر شب خون مارا ہو اسے عدالت میں بلایا جاسکے۔ کب تک انصاف کا ترازو جمہوریت کو کمزور کرنے کے لیے استعمال ہوگا، کب تک منتخب وزرائے اعظم کو گھر بھیجنے کے لیے جے آئی ٹی بنائی جائے گی، کب تک پارلیمنٹ پر حملہ کرنے والے کو ضمانتیں دی جائیں گی۔ نوازشریف نے جان ہتھیلی پر رکھ کرعدلیہ کوبحال کرایا،اب وہی عدل بحال کرائیں گے۔

چکوال(ویب ڈیسک) تحریک انصاف کے چیئرمین عمران خان نے کہا کہ پاکستانی قوم جھوٹی یا دھوکے باز نہیں بلکہ نوازشریف جیسے لوگ دھوکے باز ہیں جو قوم کا پیسہ لوٹ کر باہر لے جاتے ہیں کیونکہ ان کا پیٹ نہیں بھرتا۔چکوال میں جلسہ عام سے خطاب کرتے ہوئے عمران خان نے کہا کہ نوازشریف لوٹے ہوئے مال کا حساب دینے کے بجائے سینہ زوری کررہے ہیں، عدالتوں کوڈرا دھمکا کر دباو¿ ڈال رہے ہیں، وہ فوج اور اداروں کو بدنام کرنے کی مسلسل کوشش کررہے ہیں، سعودی عرب جاکر شاہی خاندان کے پاو¿ں پکڑ کر سزا سے بچانے کی اپیل کررہے ہیں، وہ اپنے اثاثوں کا حساب دینے کے بجائے مجھے کیوں نکالا کا سوال پوچھ رہے ہیں، اگر ہم امریکا سے قرض اور امداد نہ لیتے تو آج ہمیں ذلت کا سامنا نہ کرنا پڑتا ، پاکستانی جھوٹے اور دھوکے باز نہیں، یہ نوازشریف جیسے لوگ دھوکے باز ہیں کیونکہ ان کا پیٹ نہیں بھرتا وہ عوام کا پیسہ لوٹ کر باہر لے جاتے ہیں۔عمران خان نے کہا کہ اس ملک کے حکمران جب تک قرضے لیں گے اور پیسہ باہر لے جائیں گے، اس وقت تک کبھی اس ملک و قوم کو عزت نہیں ملے گی۔ امریکا افغانستان میں اپنی ناکامی کا ذمہ دار پاکستان کو ٹہرارہا ہے اس جنگ نے پاکستانی قبائلی علاقوں کو تباہ وبرباد کردیا اور قبائلیوں کی زندگی کو اجیرن بنادیا۔