طرابلس(ویب ڈیسک) لیبیا کے وزارت خارجہ کی عمارت پر خودکش حملے کے نتیجے میں 2 افراد ہلاک اور 9 زخمی ہوگئے۔بین الاقوامی خبر رساں ادارے کے مطابق لیبیا کے دارالحکومت طرابلس میں واقع وزارت خارجہ کی عمارت میں دو حملہ آوروں نے داخل ہونے کی کوشش کی، ناکامی پر ایک حملہ آور نے خود کو مرکزی دروازے پربارودی مواد سے اُڑالیا جب کہ دوسرا حملہ آور مشین گن سے فائرنگ کرتا ہوا اندر داخل ہوگیا۔خود کش حملے میں وزارت خارجہ کی عمارت کی سیکیورٹی پر مامور ایک اہلکار اور ایک کلرک کے ہلاک ہونے کی تصدیق کی گئی ہے جب کہ 9 ملازمین زخمی ہیں جب کہ ایک حملہ آور سیکیورٹی اہلکاروں کے ہاتھوں مارا گیا،عمارت کے ایک حصے میں آگ بھڑک ا±ٹھی جس سے عمارت کو نقصان پہنچا۔ریسکیو اداروں نے امدادی کاموں کا آغاز کرتے ہوئے ہلاک اور زخمی ہونے والوں کو قریبی اسپتال منتقل کیا جب کہ فائر بریگیڈ کے عملے نےعمارت کے ایک حصے میں لگی آگ کو بجھادیا تاہم اس دوران کافی ریکارڈ نذرآتش ہوگیا۔سیکیورٹی حکام کا کہنا ہے کہ حملے میں داعش کے ملوث ہونے کے امکان کو مسترد نہیں کیا جا سکتا تاہم داعش سمیت کسی شدت پسند جماعت نے حملے کی ذمہ داری قبول نہیں کی۔واضح رہے کہ لیبیا میں 41 سال تک بلا شرکت غیرے حکومت کرنے والے معمر قذافی کو 2011 میں خانہ جنگی کے دوران قتل کر دیا گیا تھا تاہم معمر قذافی کے حامیوں اور حکومت کے درمیان جھڑپوں کا سلسلہ تاحال جاری ہے۔

کرناٹک(ویب ڈیسک) بھارتی ریاست کرناٹک کے وزیراعلیٰ ایچ ڈی کمارسوامی کو کیمرے کی آنکھ نے موبائل فون پر بے رحمانہ قتل کی ہدایت دیتے ہوئے رنگے ہاتھوں پکڑلیا۔بین الاقوامی خبر رساں ادارے کے مطابق اپنے سیاسی حریفوں کی بدعنوانی کے الزامات پر مشتمل آڈیو اور وڈیو سی ڈی جاری کرنے والے کرناٹک کے وزیراعلیٰ ایچ ڈی کمار سوامی کیمرے کے سامنے قتل کی ہدایت دے بیٹھے۔وزیراعلیٰ کمارسوامی موبائل فون پر بات کرتے ہوئے میڈیا کی موجودگی اور لمحے لمحے کو محفوظ کرتے کیمروں کو نظر انداز کر گئے اور کال کرنے والے کو بے رحمانہ شوٹ آﺅٹ کی ہدایت دیتے رہے۔وزیراعلیٰ کمار سوامی کی جماعت جنتا دَل پارٹی (سیکولر) کے مقامی رہنما پرکاش کو قتل کردیا گیا تھا جس کی اطلاع فون پر آئی تو وزیراعلیٰ نے فون پر ہدایت جاری کی کہ ’ پرکاش اچھا آدمی تھا، مجھے نہیں معلوم کس نے بے ضرر آدمی کو قتل کیا، قاتلوں کا بے رحمانہ شوٹ آﺅٹ کردو، کوئی مسئلہ نہیں ہے۔سوشل میڈیا پر ویڈیو وائرل ہونے اور شدید تنقید کا نشانہ بنائے جانے کے بعد وزیراعلیٰ کمار سوامی کو اپنی غلطی کا احساس ہوا اور بے رحمانہ شوٹ آﺅٹ کی ہدایت کو ’جذباتی ردعمل‘ قرار دیتے ہوئے دفاعی بیان داغ ڈالا۔ترجمان وزیراعلیٰ کی جانب سے جاری بیان میں کہا گیا کہ مقامی رہنما پرکاش کے بہیمانہ قتل پر وزیراعلیٰ دل گرفتہ ہیں، ویڈیو میں کہے گئے الفاظ ہدایت نہیں بلکہ جذباتی طور ادا ہوجانے والے کلمات تھے۔واضح رہے کہ جنتا دل کے مقامی رہنما کو نامعلوم حملہ آوروں نے اس وقت گولیاں مار کر قتل کردیا تھا جب وہ اپنی کار میں کرناٹک کے ضلع مندیا جارہے تھے کہ مدور کے مقام پر ان کی کار پر فائرنگ کی گئی۔ کرناٹک میں جنتا دل اور کانگریس کی مخلوط حکومت قائم ہے۔

لاہور(ویب ڈیسک) پاکستان سمیت دنیا بھر میں مسیحی برادری آج کرسمس کا تہوار منارہی ہے۔پاکستان میں بسنے والی مسیحی برادری حضرت عیسیٰ علیہ السلام کا یوم پیدائش منارہی ہے، گھروں اور بستیوں کو برقی قمقموں کرسمس ٹریز اور ڈیوڈ اسٹارز سے سجایا گیا ہے جب کہ تقاریب کا آغاز گزشتہ رات ہی ہوگیا تھا، 24 اور 25 دسمبر کی درمیانی رات گرجا گھروں میں خصوصی دعائیہ تقاریب کا اہتمام کیا گیا، جس کے بعد رشتے داروں، عزیزوں اور احباب کے درمیان تحفے تحائف کا تبادلہ ہوا۔ملک کو درپیش خطرات کے پیش نظر گرجا گھروں اور مسیحی بستیوں کے اطراف سیکیورٹی کے خصوصی انتظامات کئے گئے ہیں۔ اس کے علاوہ مسیحی برادری سے اظہار یک جہتی کے لیے ملک بھر میں سبھی بڑے ہوٹلوں میں خصوصی کرسمس ٹریز سجائے گئے ہیں۔
پوپ فرانسس کا پیغام
کیتھولک مسیحیوں کے روحانی پیشوا پوپ فرانسس نے ویٹی کن سٹی میں کرسمس کی مرکزی تقریب کے موقع پر اپنے پیغام میں غیر متوازن انسانی رویوں اور انسانوں کی انسانوں سے لاتعلقی پر تنقید کی ہے۔ 24 اور 25 دسمبر کی درمیانی شب منعقدہ روایتی اجتماع سے خطاب کرتے ہوئے پوپ فرانسس نے کہا آج کے دور میں انسان اتنا لالچی ہو چکا ہے کہ اس کی حرص کا پورا ہونا ممکن ہی نہیں رہا۔ مادی اشیاءکا حصول بہت سے انسانوں کے لیے ان کی زندگی کا مقصد بن چکا ہے، جو غلط ہے۔

شنگھائی(ویب ڈیسک) چین میں چاقو بردار شخص نے مسافر بس اغوا کر کے فٹ پاتھ پر کھڑے راہگیروں کو کچل دیا جس کے نتیجے میں 5 افراد ہلاک اور 21 زخمی ہوگئے۔بین الاقوامی خبر رساں ادارے کے مطابق چین میں شنگھائی کے جنوب میں صوبے فوجیان میں چاقو بردار حملہ آور نے مسافر بس کو ہائی جیک کرکے ڈرائیونگ سیٹ سنبھال لی اور تیز رفتار بس سے فٹ پاتھ پر کھڑے شہریوں کو کچل ڈالا جس کے نتیجے میں 5 افراد ہلاک اور 21 زخمی ہوگئے۔حادثے میں ہلاک اور زخمی ہونے والوں کو قریبی اسپتال منتقل کردیا ہے جہاں زخمیوں کو طبی امداد فراہم کی جا رہی ہے۔ 5 زخمیوں کی حالت نازک ہونے کے باعث ہلاکتوں میں اضافے کا خدشہ ہے۔پولیس نے چاقو بردار زخمی حملہ آور کو حراست میں لے لیا تھا تاہم ملزم کی شناخت ظاہر نہیں کی گئی ہے جب کہ میڈیا کو بھی حادثے کی تفصیلات فراہم نہیں کی گئی ہیں اور نہ ہی ہلاک و زخمی افراد کی فہرست دی گئی ہے۔سوشل میڈیا پر وائرل ہونے والی ویڈیو میں دیکھا جا سکتا ہے کہ درجن بھر چینی پولیس کے اہلکار حملہ آور کو گرفتار کرنے کی کوشش کر رہے ہیں جب کہ حملہ آور تیز دھار چاقو کے ذریعے مزاحمت کر رہا ہے۔