ٹوکیو(ویب ڈیسک) جاپان کے شہر ٹوکیو میں تین منزلہ اسٹوڈیو میں آتش گیر مادے کے ذریعے مبینہ حملے میں تقریباً 33 افراد ہلاک ہوگئے۔غیرملکی خبررساں ادارے ’اے ایف پی‘ مطابق اسٹوڈیو کو آتش گیر مادہ پھینک کر جلایا گیا اور ٹوکیو پولیس نے ایک مشتبہ شخص کو گرفتار بھی کرلیا۔اس حوالے سے بتایا گیا کہ کیوٹو اینیمیشن نامی کمپنی میں لگنے والی آگ کے نتیجے میں ہلاک ہونے والوں کی تعداد میں اضافے کا خدشہ ہے۔خبررساں ادارے کے مطابق مشتبہ شخص نے اسٹوڈیو کے داخلی راستے پر آگ لگائی تاکہ عمارت میں موجود افراد جان بچانے کے لیے دوسرے راستوں کا انتخاب کریں.مقامی پولیس کے ترجمان کزیوہیرو ہیاشی نے بتایا کہ آگ کے باعث تقریباً 36 افراد زخمی بھی ہوئے جن میں سے 10 کی حالت نازک ہے۔علاوہ ازیں انہوں نے بتایا کہ اسٹوڈیو پر مشتبہ حملے کے الزام پر 41 سالہ شخص کو حراست میں لے لیا ہے اور اس کے قبضے سے متعدد چھریاں بھی برآمد کرلی گئیں۔ان کا کہنا تھا کہ تین منزلہ عمارت کی آخری منزل پر متعدد لاشیں ملیں۔پولیس ترجمان نے بتایا کہ پہلی منزل سے 2، دوسری منزل سے 11 اور تیسری منزل سے 20 لاشیں ملیں۔ان کا کہنا تھا کہ ایسا لگتا ہے کہ مشتبہ شخص نے مٹی کا تیل چھڑک کر اسٹوڈیو کو آگ لگائی۔پولیس ترجمان کے مطابق زیر حراست مشتبہ شخص زخمی حالت میں گرفتار ہوا جسے مقامی ہسپتال میں طبی امداد دی جاری ہے اور پولیس کی جانب سے تفتیش کا عمل جلد شروع کردیا جائے گا۔جاپانی میڈیا کے مطابق اسٹوڈیو کی پہلی منزل پر صبح ساڑھے دس بجے آگ لگی۔پولیس نے بتایا کہ مقامی رہائشیوں نے اسٹوڈیو سے اٹھنے والے دھوئیں اور دھماکوں کی آواز پر پولیس کو مطلع کیا۔بتایا گیا کہ آگ اس قدر خطرناک تھی کہ تقریباً 48 فائر فائٹرز کو متاثرہ اسٹوڈیو کی آگ بجھانے کے لیے تعینات کیا گیا۔جاپان کے وزیراعظم شینزو ایبے نے سماجی رابطے کی ویب سائٹ پر اپنے پیغام میں متاثرہ خاندان سے اظہار افسوس کیا۔

ایمسٹر ڈیم(ویب ڈیسک)کیا آپ نے کبھی فضائی سفر کرتے ہوئے سوچا کہ حادثے کی صورت میں طیارے کے کونسے حصے کے مسافروں کے بچنے کا امکان زیادہ ہوتا ہے؟ویسے حقیقت تو یہ ہے کہ طیارے کے حادثے میں کسی بھی حصے میں موجود مسافر کے بچنے کا امکان نہ ہونے کے برابر ہوتا ہے مگر ڈچ ائیرلائن کے ایل ایم کی بھارتی شاخ نے لوگوں کو اس حوالے سے مشورہ دینا ضروری سمجھا اور اس حوالے سے ایک متنازع ٹوئیٹ کیا۔کے ایل ایم انڈیا ٹوئٹر اکاﺅنٹ سے ہونے والی پوسٹ میں لکھا تھا ‘ٹائم کی ڈیٹا اسٹڈیز کے مطابق طیارے کے درمیانی حصے کی نشستوں میں ہلاکتوں کی شرح سب سے زیادہ ہوتی ہے، تاہم فرنٹ میں یہ شرح کچھ کم جبکہ طیارے کے پچھے حصے کے مسافروں میں سب سے کم ہوتی ہے’۔اس ٹوئیٹ میں ایک نشست کی تصویر بھی تھی جو بادلوں کے اوپر رکھی ہے اور یہ الفاظ درج ہیں ‘طیارے کے پچھے حصے کی نشستیں سب سے محفوظ ہوتی ہیں’۔اس ٹوئیٹ کے بعد متعدد ٹوئٹر صارفین کی جانب سے کافی شدید ردعمل سامنے آیا تھا اور کمپنی کا کافی مذاق بھی اڑایا گیا۔اس ٹوئیٹ کو کمپنی نے 12 گھنٹے بعد ڈیلیٹ کردیا اور ایک ٹوئیٹ میں لوگوں سے معذرت بھی کی ‘اس ٹوئیٹ میں لکھا تھا کہ ہم حالیہ اپ ڈیٹ پر معذرت کرتے ہیں، وہ پوسٹ عوامی طور پر دستیاب ایوی ایشن فیکٹ پر مبنی تھی اور یہ کے ایل ایم کی رائے نہیں تھی، ہمارا مقصد کسی کے جذبات کو ٹھیس پہنچانا نہیں تھا، یہی وجہ ہے کہ پوسٹ کو ڈیلیٹ کردیا گیا’۔خیال رہے کہ ٹائم میگزین نے 2015 میں ایک مضمون شائع کیا تھا جس میں کہا گیا تھا کہ طیارے کی پچھلی نشستوں پر حادثے کی صورت میں بچنے کی شرح سب سے زیادہ (28 فیصد) ہوتی ہے، اس کے لیے 1985 تک ہونے والے فضائی حادثوں پر ہونے والی ایک تحقیق کو بنیاد بنایا گیا تھا۔اس مضمون کے مطابق طیارے کے پچھلے حصے میں حادثے میں ہلاکتوں کی شرح 32 فیصد، درمیانی حصے میں 39 فیصد جبکہ فرنٹ پر 38 فیصد ہوتی ہے۔