لاہور(ویب ڈیسک)پاکستان اور بھارت کے درمیان موجودہ تعلقات اور سیکیورٹی صورتحال کے سبب دونوں ملکوں کے درمیان ڈیوس کپ ٹینس ٹائی ملتوی کردیا گیا۔ایشین اوشیانا گروپ ون کے ٹائی مقابلے اسلام آباد کے پاکستان اسپورٹس کمپلیکس میں 14 اور 15 ستمبر کو منعقد ہونا تھے، جس میں شرکت کے لیے جولائی میں بھارت نے اپنی ٹیم پاکستان بھیجنے کی تصدیق بھی کی تھی۔تاہم بھارت کی جانب سے آرٹیکل 370 کے خاتمے کے بعد پاکستان نے بھارت کے ساتھ سفارتی تعلقات محدود جبکہ دوطرفہ تجارت معطل کرنے کے ساتھ سمجھوتہ اور تھر ایکسپریس سروس معطل کردی تھی اور دونوں ملکوں کے درمیان صورتحال انتہائی کشیدہ ہے۔اس صورتحال کے پیش نظر بھارت نے انٹرنیشنل ٹینس فیڈریشن سے ڈیوس کپ کا مقام کسی اور ملک منتقل کرنے کا مطالبہ کیا تھا۔اس مطالبے کے بعد انٹرنیشنل ٹینس فیڈریشن نے اپنے سیکیورٹی مشیروں کو صورتحال کا جائزہ لینے کی ہدایت کی تھی جنہوں نے ایونٹ کو ملتوی کرنے کا مشورہ دیا ہے۔فیڈریشن کی جانب سے جاری بیان میں کہا گیا کہ آزاد ماہرین پر مشتمل سیکیورٹی مشیروں کی جانب سے پاکستان میں مکمل سیکیورٹی جائزے کے بعد ڈیوس کپ کمیٹی نے پاکستان اور بھارت کے درمیان اسلام آباد میں شیڈول ایشیا اوشیانا گروپ 1 کے ٹائی کو ملتوی کردیا ہے۔انٹرنیشنل ٹینس فیڈریشن کے مطابق کمیٹی نے حالات کو غیرمعمولی قرار دیا اور ہماری پہلی ترجیح ایتھلیٹس، آفیشل اور شائقین کی حفاظت ہے۔پاکستان اور بھارت کے درمیان ڈیوس کپ ٹائی کو نومبر تک ملتوی کردیا گیا ہے اور کیٹی 9نومبر کے بعد حتمی تاریخ کا اعلان کرے گی لیکن اس سے قبل ایک مرتبہ پھر سیکیورٹی صورتحال کا جائزہ لیا جائے گا۔

لسبان(ویب ڈیسک)پرتگال کے عالمی شہرت یافتہ فٹبالر کرسٹیانو رونالڈو نے تسلیم کیا ہے کہ لیونل میسی نے انہیں بہتر کھلاڑی بنانے میں اہم کردار ادا کیا اور وہ ان کے ساتھ مسابقت سے لطف اندوز ہوتے ہیں۔ارجنٹائن کے سپر اسٹار فٹبالر لیونل میسی اور رونالڈو میں گزشتہ 12سالوں سے مسابقت کا سلسلہ جاری ہے اور دونوں کھلاڑیوں کے درمیان عالمی نمبرایک کی جنگ مسلسل جاری ہے۔اس مسابقت کا اندازہ اس بات سے لگایا جا سکتا ہے 2008 سے 2018 تک سال کے بہترین فٹبالر کا ایوارڈ(بیلن ڈی اور) پانچ پانچ مرتبہ لیونل میسی اور کرسٹیانو رونالڈو کے نام رہا اور کوئی اور کھلاڑی 10سال تک یہ اعزاز حاصل نہ کر سکا۔رونالڈو نے تسلیم کیا کہ ان دونوں کھلاڑیوں نے ایک مل کر کبھی بھی کسی موضوع پر گفتگو نہیں کی لیکن وہ میسی کے کیریئر کے بہت دلدادہ ہیں۔ عظیم فٹبالر نے مزید کہا کہ جب میں نے اسپینش کلب ریال میڈرڈ سے اطالوی کلب یوونٹس کو جوائن کیا تو میسی نے اس پر مایوسی کا اظہار کیا تھا کیونکہ وہ بھی ہمارے درمیان مسابقت کے خاتمے پر افسردہ تھے۔رونالڈو نے کہا کہ ہمارے درمیان ایک اچھی مسابقت ہے لیکن یہ کوئی انوکھی بات نہیں کیونکہ ہم باسکٹ بال، فارلوما ون سمیت مختلف کھیلوں میں اس طرح کی اچھی مسابقت دیکھ چکے ہیں۔انہوں نے کہا کہ مجھے اس بات میں کوئی شک نہیں کہ میسی نے مجھے بہتر کھلاڑی بنانے میں اہم کردار ادا کیا اور ہمارے درمیان ایک بہترین پیشہ ورانہ تعلق ہے۔پرتگالی اسٹار نے کہا کہ ہم دونوں نے کبھی ساتھ ڈنر نہیں کیا لیکن مجھے کوئی بھی وجہ نظر نہیں آتی کہ ہم مستقبل میں ایسا نہ کر سکیں کیونکہ مجھے ان کے ساتھ کھانا کھانے میں کوئی مسئلہ نظر نہیں آتا۔اس موقع پر عالمی شہرت یافتہ سپراسٹار فٹبالر نے کہا کہ 2018 ان کی زندگی کا سب سے بدترین سال ثابت ہوا جہاں ان پر ایک خاتون نے ریپ کے الزامات عائد کرتے ہوئے ان کی کردار کشی کی۔رونالڈو ان ریپ کے الزامات کی نفی کرتے ہیں لیکن ساتھ ساتھ وہ یہ بات بھی تسلیم کرتے ہیں کہ معاملہ دبانے کے لیے انہوں نے سابق ماڈل کیتھرین مایورگا کو 3لاکھ 75ہزار ڈالر کی رقم ادا کی تھی۔

لاہور(ویب ڈیسک) سلمان بٹ نے ماضی کے بورڈ حکام پر امتیازی سلوک کا الزام عائد کر دیا۔ایک انٹر ویو کے دوران صرف محمد عامر کو خصوصی رعایت دینے کے سوال پرسلمان بٹ نے کہا کہ میری 5سال کی سزا مکمل ہوگئی تھی، ہرسال ڈومیسٹک کرکٹ میں تسلسل کے ساتھ عمدہ کارکردگی کا بھی مظاہرہ کیا، میرے معاملے میں امتیازی سلوک کیوں کیا گیا، اس کا جواب سابق چیئرمین پی سی بی شہریار خان اور نجم سیٹھی ہی دے سکتے ہیں کہ کیوں ایک کھلاڑی کیلئے الگ اور دوسروں کیلئے الگ رویہ رکھا گیا۔انھوں نے کہا کہ میں نے ڈومیسٹک کرکٹ میں اپنی ذاتی کارکردگی کے حوالے سے کوئی کسر نہیں چھوڑی، کوئی بھی سمجھ سکتا ہے کہ میری ٹیم میں جگہ بنتی ہے یا نہیں، ورلڈکپ میں پاکستان صرف 3 اوپنرز کے ساتھ گیا۔ٹیسٹ میچز میں مسلسل شکستیں ہورہی ہیں لیکن کسی نے کچھ بھی تبدیل نہیں کرنا چاہا،امید ہے کہ نئی مینجمنٹ میرٹ پر فیصلے کرے گی۔سلمان بٹ نے کہا کہ ماضی میں ڈومیسٹک کرکٹ کے پرفارمرز کو نظر انداز کرتے ہوئے من پسند فیصلے کیے جاتے رہے، امید ہے کہ اب ایسا نہیں ہوگا، ڈومیسٹک کرکٹ میں اچھی کارکردگی دکھانےوالوں کو ترجیح دیں تب ہی نیا سسٹم کامیاب ہوسکتا ہے۔انھوں نے کہا کہ پاکستان نے خوش قسمتی سے اپنی 75فیصد کرکٹ یواے ای میں کھیلی،ایک ہی جیسے کرکٹرز کھیل رہے ہیں،کیا میں نے ماضی میں ہر طرح کی کنڈیشنز میں اچھی کارکردگی نہیں دکھائی۔

دبئی (ویب ڈیسک ) پاکستان کے مایہ ناز فاسٹ باﺅلر حسن علی بھارتی لڑکی سامعہ آرزو کیساتھ شادی کے بندھن میں بندھ گئے ہیں اور دونوں کے خاندان ہی اس پر بہت خوش ہیں۔حسن علی کی اہلیہ نے میڈیا سے گفتگو کرتے ہوئے کہا کہ میں نے کبھی میچ نہیں دیکھا اور حسن علی سے ملاقات کے بعد ہی کرکٹ دیکھنی شروع کی، کھیل کی کوئی سمجھ بوجھ نہیں، میدن میں صرف حسن علی پر ہی نظر ہوتی ہے۔انہوں نے کہا کہ اپنے گھر والوں کی شکرگزار ہوں جنہوں نے میری پسند کا خیال رکھا ، پاکستان اور بھارت میں ہماری شادی کو مثبت نظر سے دیکھا گیا ، میڈیا کا کردار بھی مثبت تھا، شادی کیلئے نیک خواہشات پر سب چاہنے والوں کے شکرگزار ہیں۔