دبئی(ویب ڈیسک ) پاکستان کے ٹیسٹ اسٹار و سابق قومی کپتان شعیب ملک کی اہلیہ اوربھارتی ٹینس پلیئر ثانیہ مرزا کو بھارتی پرچم لہرانے کی تصویر شیئر کرنے اوربھارتی یوم آزادی کی مبارکباد دینے پر سوشل میڈیا پر تنقید کا نشانہ بنایاجارہاہے۔ٹینس پلیئر ثانیہ مرزا نے سماجی رابطے کی ویب سائٹ ٹوئٹر پر بھارتی یوم آزادی کے موقع پر بھارتی پرچم لہرانے کی تصویر آویزاں کرتے ہوئے یوم آزادی کی مبارکباد پیش کی ہے جس پر ثانیہ کے لاتعداد فالوورز نے انہیں آڑے ہاتھوں لیتے ہوئے شدید تنقید کا نشانہ بنایاہے۔سوشل میڈیا صارفین نے اہلیان کشمیر سے اظہار یکجہتی کرتے ہوئے 15 اگست(بھارت کے یوم آزادی)کو یوم سیاہ قرار دیاہے۔ زارا اکرام نامی ٹوئٹر صارف نے ثانیہ مرزا کو جواب دیتے ہوئے کہا انسانیت کے لیے یوم سیاہ منائیں۔جب کہ کچھ لوگوں نے پاکستان اورکشمیر کا جھنڈا شیئر کراتے ہوئے لکھا کشمیر بنے گا پاکستان انشااللہ۔

فرح ناز نامی صارف نے ثانیہ مرزا سے درخواست کرتے ہوئے کہا بھابھی پلیز پاکستانی ہوجائیں اس کے ساتھ انہوں نے فری کشمیر(کشمیر کی آزادی)اور یوم سیاہ کے ہیش ٹیگ استعمال کیے۔

پورٹ آف اسپین (ویب ڈیسک )کرس گیل کا ون ڈے میں کھیل اختتام کو پہنچ گیا، انہوں نے بھارت سے تیسرے میچ میں 301 نمبر کی خصوصی جرسی زیب تن کی۔ویسٹ انڈیز کے اسٹار کرکٹر کرس گیل نے پہلے ورلڈ کپ کے بعد ریٹائرمنٹ لینے کا اعلان کیا تھا تاہم میگا ایونٹ کے دوران ہی انھوں نے واضح کیا تھا کہ وہ بھارت کے خلاف اپنے ملک میں آخری ون ڈے سیریز کھیلنا چاہتے ہیں۔بدھ کے روز انھوں نے بھارت سے تیسرے میچ میں برق رفتار 72 رنزبنائے، اگرچہ آخری اطلاعات تک خود ان کی جانب سے ون ڈے کرکٹ سے ریٹائرمنٹ کی تصدیق سامنے نہیں آئی تھی تاہم اس مقابلے میں کچھ واضح اشارے موجود تھے۔انھوں نے 301 نمبر کی شرٹ پہن رکھی تھی جوکہ ان کے ایک روزہ میچز کی تعداد ہے، عام طور پر وہ 45 نمبر کی جرسی پہنتے ہیں، اسی سیریز میں انھوں نے برائن لارا کا ایک روزہ کرکٹ میں مجموعی اسکور 10405 پیچھے چھوڑا۔ میدان سے باہر جاتے ہوئے ان کا ہیلمٹ بیٹ کے ہینڈل پر تھا، تمام بھارتی کھلاڑیوں نے ان سے مصافحہ بھی کیا۔ گیل اس سے قبل بھی ریٹائرمنٹ کا اعلان کرکے واپس لے چکے اسی لیے ان کی تصدیق کا انتظار کیا جارہا تھا۔واضح رہے کہ آخری اطلاعات تک تیسرے ون ڈے میں بارش کے باعث کھیل رکھنے سے قبل تک ویسٹ انڈیز نے 2 وکٹ پر 158 رنز بنائے تھے، گیل نے 41 بالز پر 72 رنز اسکور کیے۔

لاہور(ویب ڈیسک ) انڈر 19 ایشیاءکپ کے قومی اسکواڈ میں ’کراچی‘ کا کوئی بھی کھلاڑی جگہ نہ بناسکا۔انڈر 19 ایشیاءکب 5 سے 14 ستمبر 2019ءتک سری لنکا میں ہوگا جس میں میزبان سری لنکا کے ساتھ پاکستان، بنگلہ دیش، متحدہ عرب امارات، نیپال، کویت، افغانستان اور بھارت کی ٹیمیں حصہ لیں گی۔ٹورنامنٹ میں پاکستان کی 15 رکنی ٹیم کی قیادت وکٹ کیپر روحیل نذیر کریں گے، حیران کن طور پر ٹیسٹ فاسٹ بولر سلیم جعفر کی سربراہی میں کام کرنے والی 5 رکنی سلیکشن کمیٹی نے ایشیاءکپ اسکواڈ میں کراچی کے ایک بھی کھلاڑی کو موقع نہیں دیا۔دورہ جنوبی افریقا میں 0-7 سے ون ڈے سیریز جیتنے والے اسکواڈ میں شامل صائم ایوب کو ڈراپ کرکے کوئٹہ کے عبدالواجد بنگل زئی کو اسکواڈ کا حصہ بنایا گیا۔بنگل زئی نے انڈر 19 ون ڈے ٹورنامنٹ کی 5 اننگز میں محض 116 رنز بنائے، اس حوالے سے چیف سلیکٹر سلیم جعفر کا موقف ہے کہ دائیں ہاتھ کے بیٹسمین نیٹ پر بڑی عمدہ بیٹنگ کر رہے تھے۔ایشیاءکپ اسکواڈ میں شامل لاہور کے قاسم اکرم دورہ جنوبی افریقا کے 5 مقابلوں میں77 رنز بنانے کے باوجود اسکواڈ میں جگہ برقرار رکھنے میں کامیاب رہے۔سلیکشن کمیٹی نے ڈیرہ مراد جمالی کے دائیں ہاتھ کے اسپنر ابو ہریرہ کو بغیر کھیلے منتخب کرلیا جبکہ کراچی کے اسپنر عالیان محمود جنھوں نے انڈر 16 کے ساتھ آسڑیلیا کا دورہ کیا، انہیں نظرانداز کردیا گیا۔ایشیاءکپ اسکواڈ میں فاسٹ بولر شیراز خان جنھوں نے جنوبی افریقا کے خلاف 3 میچوں میں 5 وکٹیں حاصل کیں، انہیں بھی منتخب نہیں کیا گیا لیکن خیبرپختونخوا کے 18 سال کے محمد وسیم جونئیر جو دورہ جنوبی افریقا میں تین میچوں میں صرف 3 وکٹ لے سکے، انھیں منتخب کرلیا گیا۔انڈر 19 ایشیاءکپ میں پاکستان کے 10 شہروں سے 15 کھلاڑی منتخب کئے گئے، البتہ پاکستان کرکٹ کی نرسری کہلانے والے کراچی شہر سے ایک بھی کرکٹر کو منتخب نہ کئے جانے پر چہ مگوئیاں ہو رہی ہیں اور کرکٹ کے حلقوں میں اس فیصلے پر تشویش کا اظہار کیا جارہا ہے۔دلچسپ امر یہ ہے کہ پاکستان کیلئے 14 ٹیسٹ اور39 ون ڈے کھیلنے والے 56 سال کے جونئیر چیف سلیکٹر سلیم جعفر خود کراچی شہر میں رہائش پذیر ہیں جہاں کے نوجوان کرکٹرز کو نظر انداز کیا گیا ہے۔2004 ءمیں آئی سی سی انڈر 19 ورلڈ کپ میں قومی ٹیم کے فاتح کپتان خالد لطیف اور 2006ءمیں آئی سی سی انڈر 19 ورلڈ کپ میں فاتح ٹیم کے کپتان سرفراز احمد تھے اور دونوں کا تعلق کراچی ہی سے تھا۔