سرینگر (ویب ڈیسک) بھارتی حکومت نے مقبوضہ جموں وکشمیر میں عیدالاضحی پر بھی کرفیو برقرار رکھنے کا فیصلہ کیا ہے۔قابض حکام کی جانب سے فیصلہ کیا گیا ہے کہ عید کی نماز کے لیے کسی بڑے اجتماع کی اجازت نہیں دے سکتے کیونکہ جمعہ والے دن کم لوگوں کا اجتماع ہونے کے باوجود ہنگامے پھوڑ پڑے تھے۔ادھر خبریں ہیں کہ مقبوضہ وادی میں کٹھ پتلی انتظامیہ نے ہنگامی حالات کے پیش نظر اشیائے خورونوش کا ذخیرہ کر لیا ہے۔ گندم 65 دن، چاول 55 دن، چھوٹا گوشت 17 دن اور مرغی کا گوشت 1 ماہ کیلئے ذخیرہ کر لیا گیا ہے۔ بھارتی میڈیا کے مطابق ایل پی جی ایک ماہ جبکہ ہائی سپیڈ ڈیزل اور پٹرول 28 دن تک کیلئے ذخیرہ کر لیا گیا ہے۔خیال رہے کہ گزشتہ روز جمعہ کی نماز کے بعد وادی بھر میں قابض بھارتی فوج کیخلاف ہنگامے پھوٹ پڑے تھے۔ مقبوضہ کشمیر کی خصوصی حیثیت کو تبدیل کرنے کے خلاف پرتشدد مظاہرے ہوئے۔ادھر مقبوضہ وادی میں کرفیو اور لاک ڈاو¿ن کا ساتواں روز ہے جس کے سبب گھروں میں کھانے پینے کی اشیا ختم ہونے لگی ہیں۔ کشمیری عوام میں بھارتی اقدامات پر غم وغصہ بڑھتا جا رہا ہے۔بھارتی اقدامات کے باعث مقبوضہ وادی میں خوراک اور ادویات کا بحران پیدا ہو گیا ہے۔ ٹی وی، ٹیلی فون اور انٹرنیٹ کی سہولیات نہ ہونے کی وجہ سے علاقے کا بیرونی دنیا سے رابطہ منقطع ہے۔

اسلام آباد ((ویب ڈیسک)) پاکستان نے عید کے موقع پر پاک بھارت سرحد پر مٹھائی تقسیم نہ کرنے کا فیصلہ کیا ہے ۔دنیا نیوز کے مطابق پاکستان نے یو م آزادی کے موقع پر پاک بھارت سرحد پر مٹھائی تقسیم نہ کرنے کا فیصلہ کیاہے ۔یہ فیصلہ مقبوضہ کشمیر کی حیثیت تبدیل کرنے کے بھارتی اقدام پر کیا گیاہے ۔واضح رہے کہ پاکستان پہلے ہی بھارت کے ساتھ سفارتی تعلقات کم ترین سطح پر لے جا چکاہے ، پاکستان نے بھارت کے ساتھ بس سروس ، سمجھوتہ ایکسپریس ٹرین کوپہلے ہی معطل کردیا ہے ۔

اسلام آباد (ویب ڈیسک) کسی بھی چیز کی زیادتی نقصان دہ ہوتی ہے اور عید الاضحیٰ کے موقع پر گوشت کی زیادتی اکثر لوگوں کی صحت کو متاثر کر دیتی ہے،عید قربان کے موقع پر تقریباً ہر گھر میں ہی روزانہ مزے مزے کے گوشت کے پکوان تیار کیے جاتے ہیں جن کی خوشبو اور لذت کے سامنے ہاتھ روکنا مشکل ہو جاتا ہے، غذا میں گوشت کا استعمال پروٹین،آئرن ،وٹامنز اور معدنی طاقت فراہم کرتا ہے لیکن اس کی زیادتی مختلف بیماریوں سے دوچار کر سکتی ہے۔ جیونیوز کے مطابق عموماً گھروں میں گوشت کو کئی کئی ہفتے یا مہینوں تک فریز کر دیا جاتا ہے لیکن ایسا کرنے سے اس میں جراثیم پیدا ہو سکتے ہیں۔ اس لیے ماہرین صحت کا کہنا ہے کہ گوشت کو 3 ہفتوں سے زیادہ فریز نہیں کیا جانا چاہیے۔ماہرین کے مطابق خوراک میں روزانہ صحت کے لئے 90 گرام اور ہفتہ میں 500 گرام تک گوشت کا استعمال مفید ہوتا ہے تاہم اس سمیں زیادتی صحت کے مسائل کا سبب بن سکتی ہے۔ماہرین کے مطابق بہت زیادہ گوشت کا استعمال کولیسٹرول ، فیٹ، بلڈ پریشر اور پیٹ کے امراض میں اضافے کا باعث بنتا ہے جس سے انسانی قوت مدافعت اور صحت بری طرح متاثر ہوتی ہے۔عالمی ادارہ صحت کی جانب سے 2015 میں کی جانے والی ایک تحقیق کے مطابق وافر مقدار میں گوشت کے استعمال سے کینسر کے امکانات بھی بڑھ سکتے ہیں۔اسی طرح امریکا کے نیشنل کینسر انسٹیٹیوٹ کے مطابق گوشت کو بہت زیادہ درجہ حرارت پر پکایا جاتا ہے جس سے ہیٹروسائیکلیک امائن (HCAs) اور پولیسائیک لک ایرومیٹک ہائیڈروکاربن کیمیکلز فراہم ہوتے ہیں جس سے انسانی صحت میں کینسر کا خدشہ بڑھ سکتے ہیں۔ایسے پکوان جن میں گوشت کے ساتھ تیل کا استعمال بھی بہت زیادہ کیا جاتا ہے وہ جسم میں چربی بڑھا دیتے ہیں جس کی وجہ سے ماہرین چہل قدمی کی ہدایت کرتے ہیں ساتھ ہی ایسے کھانوں کے ساتھ سبز چائے پینے کا مشورہ فراہم کرتے ہیں۔اکثر عیدالاضحی کے فورا بعد لوگوں میں قبض سمیت پیٹ کے امراض بھی بڑھ جاتے ہیں جس کی ایک وجہ گوشت کے استعمال میں زیادتی ہو سکتی ہے۔ماہرین کے مطابق رات میں سونے سے قبل اسپغول کی بھوسی کا استعمال مفید ثابت ہو سکتا ہے۔ اسپغول کھانے میں موجود چربی اور کولسٹرول کی ایک مقدار جذب کرکے فضلے میں خارج کردیتا ہے جس سے دل کی بیماریوں سے ایک حد تک بچاؤ ممکن ہے۔

 اسلام آباد: وزیراعظم عمران خان نے کہا ہے کہ قربانی کےجذبےکےبغیردنیاکی کوئی قوم ترقی نہیں کرسکتی۔وزیراعظم نے بنی گالا میں عیدالاضحیٰ کی نماز ادا کی جس کے بعد سنت ابراہیمی کی پیروی میں قربانی کی۔وزیراعظم عمران خان نے اہل وطن کو عیدالاضحیٰ کی مبارک باد دیتے ہوئے کہا کہ دعاہےآپ کی زندگیوں میں خوشی کےمواقع باربارآتےرہیں، عیدالاضحیٰ حضرت ابراہیمؑ اورحضرت اسمعیلؑ کی تسلیم ورضاکی یادگارہے، آج کےدن عظیم شخصیات نےاطاعت وایثارکی لازوال مثال قائم کی، یہ عمل اللہ کواتناپسندآیاکہ امت محمدی کےلیےلازم قراردیدیا۔وزیراعظم عمران خان نے کہا کہ کشمیری عوام سے اظہار یکجہتی کےلیےعیدالاضحیٰ سادگی سےمنائی جائےگی، قربانی کےجذبےکےبغیردنیاکی کوئی قوم ترقی نہیں کرسکتی، قربانی کاجذبہ ہرقسم کی مشکلات کوخندہ پیشانی سےبرداشت کرنےکانام ہے۔

امریکا اور برطانیہ سمیت دنیا کے کئی ممالک میں بھارتی اقدامات کے خلاف اور کشمیریوں کے حق میں ریلیاں نکالی گئیں۔امریکا میں پاکستانی اور کشمیری کمیونٹی نے وائٹ ہاؤس کے سامنے احتجاج کیا اور صدر ڈونلڈ ٹرمپ سے مطالبہ کیا کہ بھارتی وزیراعظم نریندر مودی کو مقبوضہ کشمیر میں لیے گئے حالیہ اقدامات واپس لینے پر مجبور کریں۔امریکی ریاست کیلی فورنیا میں بھی مسلم کمیونٹی نے کشمیریوں سے اظہار یکجہتی کے لیے ریلی نکالی جس میں خواتین اور بچوں کی بڑی تعداد نے بھی شرکت کی۔

ملک بھر میں عید الاضحیٰ مذہبی عقیدت اور احترام سے منائی جارہی ہے۔عید الاضحیٰ کے موقع پر شہر شہر نماز عید کے چھوٹے بڑے سیکڑوں اجتماعات منعقد کیے جا رہے ہیں جب کہ  نماز عید کے موقع پر سیکیورٹی کے بھی سخت انتظامات کیے گئے ہیں۔نماز عید کے اجتماعات میں کشمیر کی آزادی، امت مسلمہ کی سلامتی، خوشحالی اور ملک کی ترقی کے لیے دعائیں کی گئیں۔صدر مملکت عارف علوی نے فیصل مسجد اسلام آباد میں جب کہ وزیراعظم عمران خان نے بنی گالا اسلام آباد میں نماز عید ادا کی۔وزیراعلیٰ پنجاب عثمان بزدار نے لاہور کے ریس کورس پارک جب کہ وزیر ریلوے شیخ رشید نے لیاقت باغ میں نماز عید الاضحی ادا کی۔سابق وزیراعلیٰ اور مسلم لیگ ن کے صدر شہباز شریف نے ماڈل ٹاؤن میں عیدالاضحیٰ کی نماز ادا کی جب کہ چیئرمین پیپلزپارٹی بلاول بھٹو زرداری نے مظفرآباد آزاد کشمیر میں نماز عید ادا کی ہے۔نماز عید کی ادائیگی کے بعد سنت ابراہیمیؑ کی ادائیگی کے سلسلے میں جانوروں کی قربانی کی گئی۔

لاہور(صدف نعیم سے)جذبہ ابراہیمی علیہ السلام کے ذریعہ ہی ہم دشمن کو شکست فاش دے سکتے ہیں۔مظلوم کشمیری بھائیوں اور مادرِوطن کیلئے عظیم قربانی دینے والے پاک فوج کے جوانوں، افسروں اور دیگر پاکستانیوں کو اپنی دعاﺅں میں یاد رکھیں۔ پاکستان مسلم لیگ کے صدر و سابق وزیراعظم چودھری شجاعت حسین، سپیکر پنجاب اسمبلی چودھری پرویزالٰہی اور مونس الٰہی ایم این اے نے کہا ہے کہ جذبہ ابراہیمی علیہ السلام کے ذریعہ ہی ہم دشمن کو شکست فاش دے سکتے ہیں، آج عید مناتے ہوئے ہمیں چاہئے کہ اپنے کشمیری بھائیوں اور مادرِوطن کیلئے عظیم قربانیاں دینے والے پاک فوج، پولیس اور دیگر اداروں کے جوانوں، افسروں اور شہریوں کو اپنی دعاﺅں میں یاد رکھیں اور غریبوں، مسکینوں، بیواو¿ں اور یتیموں کو بھی عید کی خوشیوں میں شامل کریں۔ مسلم لیگی قائدین نے اپنے پیغامات عید میں مزید کہا کہ ہم آج ان حالات میں عید منا رہے ہیں کہ بھارت نے مقبوضہ کشمیر کو جیل خانہ میں تبدیل کر رکھا ہے، انہیں نماز تک ادا کرنے کیلئے گھر سے باہر جانے کی اجازت نہیں اور مودی حکومت کے خلاف سڑکوں پر آنے والوں کے سینے گولیوں سے چھلنی کیے جا رہے ہیں، ہمیں چاہئے کہ اپنے تمام اختلافات کو پس پشت ڈال کر جہاں کشمیریوں کی مدد کیلئے متحد ہو جائیں وہاں پاکستان کی سلامتی، ترقی اور خوشحالی کیلئے ذاتی و جماعتی مفادات کو چھوڑ کر قومی مفادات کیلئے آگے بڑھیں اور ان مقاصد کے حصول کیلئے کسی بڑی سے بڑی قربانی سے دریغ نہ کرنے کا عہد کریں، ہماری اولین ترجیح پاکستان اور مسلم امہ ہونی چاہئے کیونکہ عید الاضحی ہمیں اپنے ایمان اور ملک و ملت کیلئے سب کچھ قربان کر دینے کا درس دیتی ہے اور اس درس پر عمل کر کے ہی ہم دنیا و آخرت میں سرخرو ہو سکتے ہیں اور پاکستان کو ناقابل تسخیر اسلامی فلاحی مملکت بنا سکتے ہیں۔