اسلام آباد (ویب ڈیسک) وزیراعظم عمران خان سیکرٹری جنرل اقوام متحدہ کیلئے پیغام سرکاری ٹی وی پر ساڑھے 7 بجے نشر کیا جائے گا، وزیراعظم ترقی پذیر ممالک کے قرضوں کو ری شیڈول کرنے کی اپیل کریں گے، وزیراعظم کورونا وائرس کی صورتحال پر سیکرٹری اقوام متحدہ کو خط بھی لکھیں گے۔ میڈیا رپورٹس کے مطابق وزیراعظم عمران خان نے کورونا وائرس کی صورتحال پر قابو پانے اور معاشی گراوٹ کی صورتحال سے آگاہ کرنے کیلئے اقوام متحدہ سے رجوع کرنے کا فیصلہ کرلیا ہے۔ ذرائع کے مطابق وزیراعظم سیکرٹری جنرل اقوام متحدہ انتونیو گوتریس سے ویڈیو پیغام میں اپیل کریں گے جس کی ریکارڈنگ کی جارہی ہے۔ وزیراعظم ترقی پذیر ممالک کے قرضوں کو ری شیڈول کرنے لیے سیکرٹری اقوام متحدہ انتونیوگوتریس کو خط بھی لکھیں گے۔ جس میں قرضوں کو ری شیڈول کرنے کی اپیل کریں گے۔ وزیراعظم عمران خان اپنا ویڈیو پیغام بھی جاری کریں گے جس میں عالمی دنیا اور اقوام متحدہ سے اپیل کی جائے گی کہ پاکستان سمیت ترقی پذیر ممالک کو وباءکی موجودہ صورتحال میں بڑی مشکل کا سامنا ہے۔ اس لیے ترقی پذیر ممالک کے قرضے ری شیڈول کیے جائیں تاکہ وہ اپنی استطاعت کے مطابق کورونا کا مقابلہ کرسکیں، ورنہ ایک طرف قرضے اور دوسری جانب کورونا وباءایسی صورتحال میں مقابلہ کرنا ممکن نہیں ہے۔ وزیراعظم عمران خان کا کچھ دیر بعد ویڈیو پیغام سرکاری ٹی وی پر بھی نشر کیا جائے گا۔ دوسری جانب معاون خصوصی برائے صحت ڈاکٹر ظفر مرزا کا کہنا ہے کہ پاکستان میں آ ئندہ دنوں کورونا مریضوں میں اموات کی شرح بڑھ سکتی ہے، گزشتہ 24 گھنٹے میں14 اموات ہوئیں، جبکہ 254 نئے کیسز کے ساتھ کل کیسزکی تعداد 5038 ہوگئی ہے۔ انہوں نے میڈیا بریفنگ میں بتایا کہ وزیراعظم کی زیرصدارت اجلاس میں کورونا کی صورتحال کا جائزہ لیا گیا، قومی رابطہ کمیٹی کا کل اجلاس ہوگا، جس میں اہم فیصلے متوقع ہیں۔

اسلام آباد (ویب ڈیسک) معاون خصوصی برائے صحت ڈاکٹر ظفر مرزا نے کہا ہے کہ پاکستان میں آ ئندہ دنوں کورونا مریضوں میں اموات کی شرح بڑھ سکتی ہے، گزشتہ 24 گھنٹے میں14 اموات ہوئیں، جبکہ 254 نئے کیسز کے ساتھ کل کیسزکی تعداد 5038 ہوگئی ہے۔ انہوں نے میڈیا بریفنگ میں بتایا کہ وزیراعظم کی زیرصدارت اجلاس میں کورونا کی صورتحال کا جائزہ لیا گیا، قومی رابطہ کمیٹی کا کل اجلاس ہوگا، جس میں اہم فیصلے متوقع ہیں۔ انہوں نے کہا کہ دنیا میں کورونا وائرس کے 17لاکھ سے کیسز تجاوز کرچکے ہیں، ایک لاکھ سے زیادہ اموات اور 4 لاکھ سے زیادہ لوگ صحت یاب ہوچکے ہیں۔ پاکستان پرگزشتہ 24 گھنٹے بھاری گزرے۔ پاکستان میں پچھلے24 گھنٹے میں 14اموات رپورٹ ہوئی ہیں۔ ہم لوگوں کو آگاہ کرتے رہے، 50 لوگ وینٹی لیٹر پر تھے، جن میں14 مریض انتقال کرگئے۔ آنے والے دنوں میں یہ شرح بڑھ سکتی ہے۔ مختلف ہسپتالوں میں کورونا وائرس سے بیمار1414 افراد داخل ہیں۔ اسی لیے باربار کہتے ہیں سماجی فاصلہ برقرار رکھیں، گھروں پر رہیں اور باربار ہاتھ دھوئیں۔ این 95 ماسک کی فرنٹ لائن پر کام کرنے والوں کوزیادہ ضرورت ہے، ویسے پہننے کی ضرورت نہیں۔ گزشتہ24 گھنٹے میں254 کیسز رپورٹ ہوئے ہیں، جس کے ساتھ کل کیسز5038 ہوگئے ہیں۔ ان میں50 فیصد کیسز مقامی رپورٹ ہوئے ہیں۔ کورونا وائرس کی تازہ ترین صورتحال کیلئے سرکاری ویب سائٹ موجود ہے۔ گلگت بلتستان انتظامیہ نے انسداد کورونا وائرس کیلئے بہتر اقدامات کئے۔ گلگت بلتستان انتظامیہ نے ایران سے آئے زائرین کا قرنطینہ میں ہی علاج کیا۔ دوسری جانب وزیرصحت پنجاب ڈاکٹر یاسمین راشد کا کہنا ہے کہ پنجاب میں کورونا وائرس کے تین ہزارٹیسٹ روزانہ کی بنیاد پرکئے جارہے ہیں۔ قرنطینہ میں موجود لوگوں کے ٹیسٹ زیادہ مثبت آرہے ہیں۔ ڈاکٹر یاسمین راشد نے کہا کہ کوروناوائرس کے کنفرم مریض روزانہ کی بنیاد پرصحتیاب بھی ہورہے ہیں۔ پنجاب کے پاس کورونا وائرس کے مریضوں کے علاج معالجہ کیلئے وافر مقدارمیں وسائل موجودہیں۔

لاہور (ویب ڈیسک) کورونا وائرس کے باعث پنجاب کے 216 علاقے سیل کردیے گئے، پنجاب کے وزیرِ اطلاعات پنجاب فیاض الحسن چوہان نے بتایا ہے کہ صوبے کے 216 علاقے سیل کرکے انہیں ہاٹ سپاٹ ایریاز قرار دیا گیا ہے۔ انہوں نے کہا ہے کہ وزیرِ اعظم عمران خان کی ہدایات کے مطابق کلسٹر لاک ڈاو¿ن کی پالیسی پر عمل کیا جا رہا ہے۔ فیاض الحسن چوہان نے مزید بتایا ہے کہ گوجرانوالہ اور گجرات میں پہلے سے سیل کردہ 4 ایریاز کو ’ڈی سیل‘ کیا جا چکا ہے۔ ’ڈی سیل کیے گئے علاقوں کے تمام مریض صحتیاب ہو چکے ہیں۔‘ انھوں نے کہا ہے کہ جزوی اور ہدف کے مطابق لاک ڈاو¿ن سے معمولاتِ زندگی کو کم سے کم حد تک روکتے ہوئے کورونا کا مقابلہ کیا جا رہا ہے۔ انھوں نے آئندہ تین سے چار ہفتوں کو اہم قرار دیا ہے اور عوام سے گھروں تک محدود رہنے کی گزارش کی ہے۔ دوسری جانب پاکستان میں کورونا وائرس کیسز کی تعداد 5 ہزار سے تجاوز کر گئی، گزشتہ 24 گھنٹوں کے دوران 254 مزید مریض رپورٹ ہوئے جبکہ 14مزید اموات سے کل تعداد 86 ہوگئی ہے جبکہ 1026 مریض صحتیاب ہونے میں کامیاب ہوگئے ہیں۔ انتقال کرنے والوں میں سندھ 28، پنجاب 19، خیبرپختونخواہ 25، گلگت 3، بلوچستان میں1، اسلام آباد ایک مریض جاں بحق ہوا۔ تازہ اعداد وشمار کے مطابق ملک بھرمیں اب تک57 ہزار836 افراد کے ٹیسٹ کئے جا چکے ہیں۔ ٹیسٹوں کی تعداد بڑھانے سے ہی مزید کیسز رپورٹ ہوئے ہیں۔ جبکہ ملک کے مختلف شہروں میں زیر علاج کورونا وائرس کے 1026 مریض صحتیاب بھی ہوگئے ہیں۔ نیشنل کمانڈ اینڈ آپریشن سینٹر کے مطابق پنجاب میں سب سے زیادہ 2425 کیسز اور سندھ میں 1318 کیسز رپورٹ ہوئے ہیں۔ خیبرپختونخواہ 697، بلوچستان سے228 جبکہ اسلام آباد سے119 کیسز رپورٹ ہوئے۔ گلگت بلتستان میں 216 اور آزاد کشمیر 35 کیسز رپورٹ ہوئے ہیں۔ بتایا گیا ہے کہ 37 افراد کی حالت تاحال تشویشناک ہے۔ مجموعی طور پر52 فیصد کیسز دیگرممالک سے آئے اور48 فیصد لوگوں میں مقامی سطح پر وائرس پھیلا ہے۔

نیویارک (محسن ظہیر سے)30 نام جناز گاہوں سے حاصل معلومات سے ملے‘ باقی نام پرائیویسی قوانین کے تحت شیئر نہیں ہو سکے، جاں بحق ہونے والوں میں انجم اقبال‘ روبینہ گھمن‘ کاشف حسین ایڈووکیٹ کی والدہ شامل، پاکستانی سفارتخانہ بھی انتقال کرنے والے پاکستانیوں بارے معلومات اکٹھی کر رہا ہے، 95 فیصد جاں بحق ہونے والوں کی عمریں 60 سال اور باقی کی 26 سال تھیں

اسلام آباد(ویب ڈیسک) اسٹیٹ بینک آف پاکستان نے کورونا وائرس کے باعث لاک ڈاون کی وجہ بڑھنے والی بے روزگاری پر قابو پانے اور کاروباری سرگرمیاں بحال رکھنے کے لیے مراعاتی پیکج کا اعلان کردیا ہے۔ہفتے کو وزیر اعظم پاکستان عمران خان نے اپنے ٹوئٹ میں اعلان کیا کہ مخصوص بندشوں کےذریعےعوام کومحفوظ بنانےاور نادارشہریوں کی دیکھ بھال کےکام میں توازن کی حکمت عملی کےتحت اسٹیٹ بنک نےآ ج کاروباری ط بقے کیلئے مراعات کا اعلان کیاہے۔’احساس‘ کی چھتری تلےغریبوں کوہنگامی صورتحال میں نقد رقوم کی تقسیم جاری ہے جبکہ کاروباری طبق ےکیلئے مراعات کا اہتمام کیاجارہاہے۔ٹوئٹ میں ان کا کہنا تھا کہ ٹیکس ریفنڈز اور زراعت کیساتھ تعمیرات کے شعبے کو کھولنے جیسے فیصلے بھی کئے گئے ہیں۔ کورونا کے ہنگام کاروباری طبقے کیلئے اسٹیٹ بینک کی مراعات نہ صرف کاروباروں کو زندہ رہنے میں مدد دیں گی بلکہ ان سے بیروزگاری کے سیلاب کے آگے بند باندھنے میں بھی مدد ملے گی۔وزیر اعظم نے گورنر اسٹیٹ بینک ڈاکٹر رضا باقر کا ویڈیو پیغام بھی ٹوئٹ کیا جس میں گورنر کا کہنا تھا کہ اسٹیٹ بینک کی اسکیم کے تحت اگلے تین ماہ میں ملازمین کا روزگار برقرار رکھنے والے کاروباری اداروں کو اسٹیٹ بینک سے 5 فی صد شرح سود پر پر قرضہ فراہم کیا جائے گا۔ یہ بینکوں کے ذریعے ری فنانسنگ اسکیم ہوگی اور اسٹیٹ بینک اس کی ہفتہ وار مانیٹرنگ کرے گا جس میں موصول ، منظور اور مسترد ہونے والی درخواستوں کی مکمل نگرانی کی جائے گی۔ اس اسکیم کے تحت درخواست دہندہ اگر ٹیکس دہندہ ہوگا تو اسے 5 کے بجائے 4 فی صد شرح سود پر قرض فراہم کیا جائے گا۔انہوں نے اعلان کیا کہ اس اسکیم کے تحت حاصل کیے گئے قرضوں کی ادائیگی کے لیے ڈھائی سال کا عرصہ دیا جائے گا اور پہلے چھ ماہ پرنسپل کی کوئی قسط ادا نہیں کرنا ہوگی۔گورنر اسٹیٹ بینک نے بتایا کہ کوشش یہ ہے کہ چھوٹے بزنس مین کا زیادہ فائدہ ہو۔ اس لیے جن کاروباری اداروں کا تنخواہوں اور اجرت کی مد میں اگلے تین ماہ تک کے مجموعی اخراجات 20 کروڑ تک ہیں تو یہ تمام اخراجات اس اسکیم کے تحت حاصل کیے جاسکتے ہیں۔ اگر یہ خرچ 50 کروڑ سے زیادہ ہے تو اس کا نصف اس اسکیم کے تحت حاصل کیا جاسکتا ہے۔ ان دونوں حدوں کے درمیاں اخراجات والے 75 فیصد اسکیم سے حاصل کرسکتے ہیں۔ اسٹیٹ بینک اگلے تین ماہ میں اعلان کردہ اسکیم کی ادائیگی کی مدت میں توسیع کرنے کے لیے تیار ہے۔ویڈیو پیغام میں گورنر اسٹیٹ بینک نے بتایا کہ وزارت خزانہ کے ساتھ مل کر ا?ئی ایم ایف سے 1.4 ارب ڈالر کا پیکج حاصل کرنے کے مذاکرات کا آغاز کردیا ہے۔ آئی ایم ایف کی جانب سے اعلان ہوچکا ہے کہ اس پیکج سے متعلق فیصلہ کرنے کے لیے 16 اپریل کو اجلاس منعقد ہوگا۔

اسلام آباد(ویب ڈیسک) وفاقی حکومت نے کورونا وائرس کیس میں عدالت عظمی میں جواب جمع کرا دیا۔وفاقی حکومت نے جواب میں کہا کہ کورونا وائرس سے بچاوکے لیے اقدامات اٹھائے جا رہے ہیں اور عوام کے تحفظ کے لیے متفقہ فیصلے کیے گئے ہیں۔حکومت نے بتایا کہ ملک بھر کے 154 اضلاع میں مشتبہ مریضوں کے لیے قرنطینہ مراکز قائم کیے گئے، تفتان،چمن اور طور خم بارڈر کراسنگز پر مزید سختی کردی گئی، تمام بین الاقوامی ایئر پورٹس پر خصوصی کاونٹرز قائم کر دیے گئے۔حکومت نے کہا کہ ملک بھر میں 83 مقامات پر کورونا وائرس کے مشتبہ مریضوں کی شناخت کے لیے 83 تھرمل اسکینرز لگائے، دارالحکومت اسلام آباد میں قرنطینہ کے لیے 300 بستر اور مصدقہ مریضوں کے لیے اسپتالوں میں 154 بیڈز مختص کیے گئے۔واضح رہے کہ چیف جسٹس پاکستان گلزار احمد نے کورونا سے نمٹنے کے لیے ناکافی سہولیات پر پہلا از خود نوٹس لیتے ہوئے حکومت سے جواب طلب کیا ہے۔

کراچی(ویب ڈیسک) کورونا کی وبا کو پھیلنے سے روکنے کے لیے کراچی کی سب سے زیادہ متاثرہ یونین کونسلوں کو مکمل سیل کرنے کا فیصلہ چند گھنٹوں میں ہی واپس لے لیا گیا۔ وزیر اطلاعات سندھ کا کہنا ہے کہ یونین کونسلز کے جو مخصوص مقامات، علاقے یا گلیاں متاثر ہیں صرف انہیں سیل کیا جائے گا۔ پوری یونین کونسل کو سیل کرنا آسان نہیں تھا اس میں کئی مسائل درپیش تھے، اس حوالے سے ضلعی انتظامیہ کو نئی ہدایات جاری کردی گئی ہیں۔ہفتے کی شام ڈپٹی کمشنر شرقی نے ضلع کی 11 یونین کونسل کو سیل کرنے کا اعلان کیا تھا جن میں یو سی 21 گیلانی ریلوے اسٹیشن، یوسی 7 ڈالمیا، یو سی 8 جمالی کالونی، یوسی 22 گلشن، یو سی 27 پہلوان گوٹھ، یو سی 29 گلزار ہجری، یو سی 30 صفورہ، یو سی فیصل کینٹ، یو سی 2 منظور کالونی، یو سی 9 جیکب لائن اور یو سی 10 جمشید کوارٹرز شامل تھی تاہم چند ہی گھنٹوں بعد صوبائی حکومت نے یہ فیصلہ واپس لے لیا۔