نواز ، مریم ، مولانا بھگوڑے‘ ان سے نہیں پارلیمنٹ میں بیٹھے لوگوں سے مذاکرات ہونگے، وفاقی وزرائ

وفاقی وزراءنے ایک بار پھر اپوزیشن جماعتوں کو مذاکرات کی دعوت دیتے ہوئے کہا ہے کہ پارلیمنٹ میں موجود سیاسی جماعتوں کے سنجیدہ لوگ آگے آئیں۔

ان سے پارلیمنٹ میں بات کرینگے ، مریم نواز ، فضل الرحمٰن اور نوازشریف پارلیمنٹ کے رکن نہیں ، ان سے بات نہیں ہوسکتی‘بات چیت میں اتفاق رائے ہو جائے گا ‘ الیکٹوریل ریفارمز سمیت ہر ایشو پر بات چیت ہوسکتی ہے‘لاڑکانہ جلسہ پیپلز پارٹی کے لئے شرم اور ن لیگ کے لئے عبرت کا مقام ہے۔

بھٹو کی پھانسی پر مٹھائیاں بانٹنے والے خاندانوں میں شریف خاندان سب سے نمایاں تھا ‘مریم نواز بھگوڑا کا لفظ پرویز مشرف کے لیے استعمال کرتی ہیں تو اپنے والد کو کیوں نہیں کہتیں۔نواز شریف جنرل جیلانی اورضیاء کی پیداوار ہیں۔

اداروں پر بے جا الزامات عائد کرنے والوں کو الٹا لٹکائیں گے اور انہیں بتائیں گے کہ حکومتی رٹ کیا ہوتی ہے۔ان خیالات کا اظہار وفاقی وزیراطلاعات سینیٹر شبلی فراز ‘وزیرسائنس وٹیکنالوجی فواد چوہدری اور وفاقی وزیر آبی وسائل فیصل واوڈا نے مشترکہ پریس کانفرنس کرتے ہوئے کیا۔

سینیٹر شبلی فراز نے نیشنل ڈائیلاگ کے لئے پارلیمنٹ کو موزوں ترین پلیٹ فارم قرار دیتے ہوئے کہا ہے کہ پارلیمنٹ میں موجود اپوزیشن جماعتوں کی ذمہ دار اور سنجیدہ قیادت کے ساتھ بات چیت کے لئے تیار ہیں ‘ بات چیت میں اتفاق رائے ہوجائے گا۔