برطانیہ، فرانس، جرمنی اور اٹلی (E4 ممالک) نے کہا ہے کہ وہ ایران پر عائد پابندیاں اٹھانے کے لیے تیار ہیں، بشرطیکہ ایران اپنے جوہری پروگرام کے حوالے سے قابلِ تصدیق اور واضح اقدامات کرے۔
بین الاقوامی ذرائع ابلاغ کے مطابق یہ اعلان امریکا اور ایران کے درمیان حالیہ امن معاہدے کے بعد سامنے آیا ہے، جسے خطے میں کشیدگی کم کرنے کی ایک بڑی پیش رفت قرار دیا جا رہا ہے۔
چاروں یورپی ممالک نے اپنے مشترکہ بیان میں کہا کہ ایران کو کبھی بھی جوہری ہتھیار حاصل نہیں کرنے چاہییں اور وہ امریکا، ایران اور عالمی ایٹمی توانائی ایجنسی (IAEA) کے ساتھ مل کر اس مقصد کے لیے کام کرنے کو تیار ہیں۔
بیان میں مزید کہا گیا کہ اگر ایران اپنے جوہری پروگرام میں “واضح اور قابلِ تصدیق پیش رفت” دکھاتا ہے تو پابندیوں میں نرمی یا انہیں مکمل طور پر ختم کیا جا سکتا ہے۔
یہ پیش رفت ایسے وقت میں ہوئی ہے جب امریکا اور ایران کے درمیان جنگ بندی، آبنائے ہرمز کی دوبارہ بحالی اور مذاکرات کے نئے دور پر اتفاق کیا گیا ہے، جس سے عالمی منڈیوں اور تیل کی قیمتوں پر بھی اثر پڑا ہے۔
یورپی ممالک نے اس امید کا اظہار کیا ہے کہ یہ موقع خطے میں دیرپا امن اور سفارتی حل کی طرف اہم قدم ثابت ہو سکتا ہے۔
