روم: اٹلی کی وزیراعظم جارجیا میلونی نے امریکی صدر ڈونلڈ ٹرمپ کے اس دعوے پر سخت ردِعمل دیا ہے جس میں انہوں نے جی 7 اجلاس کے دوران لی گئی ایک تصویر کو اپنے حق میں پیش کرتے ہوئے کہا تھا کہ عالمی رہنما ان سے خصوصی توجہ کے خواہاں تھے۔
جارجیا میلونی نے اس تاثر کو مسترد کرتے ہوئے کہا کہ "اٹلی کبھی کسی سے منت نہیں کرتا اور نہ ہی اپنی خودمختاری یا وقار پر سمجھوتہ کرتا ہے۔” انہوں نے زور دیا کہ جی 7 اجلاس باہمی تعاون اور عالمی مسائل پر تبادلہ خیال کے لیے تھا، نہ کہ کسی ایک رہنما کی ذاتی تشہیر کے لیے۔
اطالوی وزیراعظم نے کہا کہ اجلاس کے دوران ہونے والی ملاقاتوں اور تصاویر کو سیاسی مقاصد کے لیے استعمال کرنا مناسب نہیں، اور ایسے دعوے حقیقت کی عکاسی نہیں کرتے۔
میڈیا رپورٹس کے مطابق ٹرمپ کی جانب سے سوشل میڈیا پر شیئر کی گئی تصویر اور اس سے متعلق دعووں کے بعد اٹلی کے سیاسی حلقوں میں بھی بحث چھڑ گئی، جبکہ مبصرین کا کہنا ہے کہ جی 7 جیسے بین الاقوامی فورمز کو داخلی سیاسی بیانیے کے لیے استعمال کرنے سے سفارتی تعلقات متاثر ہو سکتے ہیں۔
