وزیر داخلہ شیخ رشید احمد نے وزیر سائنس اینڈ ٹیکنالوجی شبلی فراز پر قاتلانہ حملے کی مذمت کی ہے۔

تفصیلات کے مطابق وزیر داخلہ نے چیف سیکرٹری اور آئی جی خیبر پختونخواہ سے فائرنگ کے واقعے کی رپورٹ طلب کرلی۔

فائرنگ واقعے میں زخمی ہونے والے شبلی فراز کے ڈرائیور اور گارڈ کی جلد صحتیابی کے لئے دعا بھی کی۔

دوسری جانب وزیر اعلیٰ خیبر پختونخوا محمود خان نے بھی واقعے کی شدید مذمت کی ہے، وزیر اعلیٰ نے پولیس سے واقعے کی رپورٹ طلب کرلی۔

انہوں نے پتھراؤ میں ملوث عناصر کی گرفتاری کے لئے ضروری کارروائی کی ہدایت کی اور واقعے میں شبلی فراز کے زخمی ہونے والے ڈرائیور اور گارڈ کی جلد صحت یابی کے لئے نیک خواہشات کا بھی اظہار کیا۔

واضح رہے کہ وفاقی وزیر برائے سائنس اور ٹیکنالوجی شبلی فراز پر درہ آدم خیل کے مقام پر نامعلوم افراد نے فائرنگ کر دی، تاہم شبلی فراز معجزاتی طور پر حملے میں محفوظ رہے۔

رپورٹ کے مطابق حملے میں گاڑی کے شیشے ٹوٹ گئے، شبلی فراز کے گارڈ اور ڈرائیور زخمی ہوئے ہیں، جنہیں علاج کے لیے پشاور منتقل کیا گیا ہے۔

پاکستان تحریک انصاف سے وابست شبلی فراز آبائی علاقے کوہاٹ سے پشاور آرہے تھے، وفاقی وزیر کا کہنا ہے کہ میں الحمدُاللہ محفوظ ہوں۔

خیال رہے کہ درہ آدم خیل جہاں وفاقی وزیر پر حملہ ہوا، تحریک انصاف کا گڑھ ہوا کرتا تھا۔ حملے کے فوری بعد پولیس کی بھاری نفری نے علاقے کو گھیرے میں لے کر ملزمان کی تلاش شروع کر دی ہے۔

وزیراعظم  عمران خان کا کہنا ہے کہ افغانستان میں انسانی امداد کیلیے پاکستان سے کام کرنے والی فلاحی تنظیموں کو سہولت دیں گے۔ 

وزیراعظم عمران خان سے سعودی عرب کے وزیر خارجہ شہزادہ فیصل بن فرحان السعود نے ملاقات کی۔ اس موقع پر وزیر اعظم نے افغانستان بارے او آئی سی وزرائے خارجہ کا غیر معمولی اجلاس بلانے کے سعودی عرب کے اقدام کو سراہا-

وزیراعظم نے خادم حرمین شریفین شاہ سلمان بن عبدالعزیز آل سعود کو تہنیتی پیغام دیا اور ولی عہد شہزادہ محمد بن سلمان کے لیے بھی  مبارکباد کا پیغام دیا۔

اس موقع پر وزیراعظم عمران خان کا کہنا تھا کہ امید ہے دنیا افغانستان کے ساتھ علیحدگی کی غلطی نہیں دہرائے گی، عالمی برادری افغانستان کے کمزور لوگوں کی مدد کرے ، افغان عوام کی تکالیف کو کم کرنے کے لیے پاکستان بھر پور تعاون کرے گا ، افغانستان میں انسانی امداد کے لیے پاکستان سے کام کرنے والی فلاحی تنظیموں کو سہولت دیں گے۔

عمران خان نے کہا کہ پاکستان نے انسانی امداد کے طور پر افغانستان کو 5 ارب کی غذائی اجناس فراہم کی، پاکستان نے گندم ، ہنگامی طبی سامان، موسم سرما کی پناہ گاہیں اور دیگر سامان فراہم کیا، سعودی عرب کے ساتھ پاکستان کے قریبی برادرانہ تعلقات تاریخی اور اہمیت کے حامل ہیں۔

ملاقات میں دوطرفہ تعلقات کو مزید گہرا کرنے، باہمی تعاون کی نئی راہیں تلاش کرنے پر زور دی گیا جب کہ وزیراعظم نے اکتوبر 2021 میں اپنے سعودی عرب کا تزکرہ بھی کیا۔

سعودی وزیر خارجہ نے او آئی سی وزرائے خارجہ کونسل اجلاس کی میزبانی پر وزیراعظم کا شکریہ ادا کرتے ہوئے کہا کہ یہ اجلاس افغان عوام کی حمایت کے لیے عالمی برادری کو متحرک کرنے میں معاون ثابت ہوگا جب کہ سعودی عرب، پاکستان کے ساتھ اپنے مضبوط تعلقات کو بہت اہمیت دیتا ہے۔

شہزادہ فیصل بن فرحان السعود کا کہنا تھا کہ پاک سعودی عرب  قریبی برادرانہ تعلقات دونوں ممالک کے لئے قابل قدر ہیں ، سعودی عرب جموں وکشمیر پر او آئی سی رابطہ گروپ کا رکن ہے، سعودی عرب مستقل طور پر کشمیر کاز کی حمایت کرتا ہے۔

اس سے قبل او آئی سی وزرائے خارجہ اجلاس سے خطاب کرتے ہوئے شہزادہ فیصل بن فرحان السعود نے کہا تھا کہ افغانستان کا معاملہ انسانی بنیادوں پر دیکھنا ہوگا۔