سلام آباد: عالمی سطح پر افواج کی صلاحیت اور کارکردگی کے اعتبار سے جاری ہونے والی درجہ بندی میں پاک فوج ٹاپ ٹین میں شامل ہوگئی۔

تفصیلات کے مطابق دنیا کی طاقتور افواج کی 2021 کی رینکنگ جاری کی گئی ہے جس کے مطابق پاک فوج دنیا کی طاقتور ٹاپ ٹین افواج میں شامل ہے۔افواج سے متعلق جاری ہونے والی گلوبل فائر پاور کی رینکنگ میں پاک فوج کا دسواں نمبر ہے۔  اس سے پہلے پاک فوج کی رینکنگ پندرہ تھی۔

رینکنگ کی بنیاد پچاس سے زائد فیکٹرز کو مد نظر رکھ کر کی جاتی ہے۔  ان فیکٹرز میں ملٹری حجم سے لے کر ملک کی فنانشل پوزیشن، جغرافیائی حیثیت جیسے عوامل شامل ہیں۔فوجی لحاظ سے طاقتور ممالک میں امریکا پہلے، روس دوسرے، چین تیسرے نمبر پر ہے رینکنگ میں بھارت بدستور چوتھے، جاپان پانچویں نمبر پر رہے۔

دنیا کی پہلی پندرہ فوجی طاقتوں میں پاکستان کے علاوہ کسی کی رینکنگ میں کوئی ترقی نہیں ہوئی۔ گزشتہ سالوں میں صرف پاکستان کی فوجی طاقت میں نمایاں اضافہ ہوا۔

درجہ بندی میں مختلف شعبوں سے متعلق فراہم کی گئی تفصیلات کے مطابق پاکستان میں فوج کی افرادی قوت 6 لاکھ 54 ہزار ہے اور اس اعتبار سے پاکستان دنیا میں چھٹے نمبر پر ہے۔ جب کہ ہر سال ملک میں فوج میں بھرتی کی عمر کو پہنچنے والے افراد کی تعداد 43 لاکھ 27 ہزار 620 بتائی گئی ہے اور اس میں پاکستان دنیا کے چوتھے نمبر پر ہے۔

رینکنگ کے لیے جاری کردہ تفصیلات کے مطابق پاک فوج مالی وسائل میں دنیا کئی دیگر ممالک سے پیچھے ہونے کے باوجود صلاحیتوں اور کارکردگی میں دنیا کے ٹاپ ٹین ممالک  میں شامل ہے۔

واضح رہے کہ گزشتہ برسوں میں صرف پاکستان کی فوجی طاقت میں نمایاں اضافہ ہوا. پاکستان نے ایران ، انڈونیشیا، اسرائیل اور کینیڈا کو پیچھے چھوڑ دیا۔رینکنگ میں ترکی، اٹلی، مصر، ایران، جرمنی ، انڈونیشیا، سعودی عرب، سپین، آسٹریلیا ، اسرائیل اور کینیڈا پاکستان سے پیچھے ہیں۔سال 2021 میں مصر، جرمنی، اسرائیل، شمالی کوریا، جنوبی افریقہ، میانمار، کولمبیا، رومانیا، میکسیکو، پیرو، ڈنمارک، عراق، شام، انگولا، بلغاریہ کی دنیا کے طاقتور ترین ممالک کی فہرست میں تنزلی ہوئی ہے۔

فارن فنڈنگ کیس کے حوالے سے پی ڈی ایم کل منگل کو الیکشن کمیشن دفتر کے سامنے احتجاج کرے گی ، اپوزیشن جماعتوں نے تیاریاں مکمل کر لی ہیں ،مسلم لیگ ن نے کہا کہ فیصلہ لے کر اٹھیں گے ۔پاکستان ڈیمو کریٹک موومنٹ کی سٹیئرنگ کمیٹی کا اجلاس آج مولانافضل الرحمن کی صدارت میں انکی رہائش گاہ پر دن بارہ بجے شروع ہوگا ، اجلاس میں کل الیکشن کمیشن آفس کے سامنے احتجاج اور مستقبل کی حکمت عملی پر غور کیا جائے گا جبکہ آئندہ کے لائحہ عمل کا بھی جائزہ لیاجائے گا۔اجلاس میں پی ڈی ایم سٹیئرنگ کمیٹی کے ممبرز شریک ہونگے ۔ اجلاس کے اختتام پر مولانا فضل الرحمن میڈیا کوبریفنگ دیں گے ۔احتجاج کے انتظامات کا جائزہ بھی لیا جائے گا جبکہ لانگ مارچ کی تاریخ اور حکمت عملی پر مشاورت کی جائے گی ۔اجلاس میں شاہد خاقان عباسی، راجہ پرویز اشرف، احسن اقبال اور دیگر شرکت کریں گے ۔مسلم لیگ (ن) کی نائب صدر مریم نواز لاہور سے اسلام آباد پہنچ گئی ہیں۔پیپلزپارٹی کے چیئرمین بلاول بھٹو احتجاج میں شریک نہیں ہوں گے تاہم پیپلز پارٹی کے مرکزی رہنماؤں کی قیادت میں کارکن احتجاجی مظاہرے میں شریک ہوں گے ۔ میاں افتخار حسین نے کہا کہ 19 جنوری کو الیکشن کمیشن کے سامنے پی ڈی ایم کے زیر اہتمام بھرپور احتجاج ریکارڈ کرایا جائے گا ،جس میں تمام اپوزیشن پارٹیوں کے کارکن شرکت کریں گے ،پی ڈی ایم کامقصداورمنزل ملک میں حقیقی جمہوریت کی بحالی اورصاف و شفاف اورمداخلت سے پاک انتخابات کا انعقاد ہے ،عوام پی ڈی ایم کے بیانیے کے ساتھ کھڑے ہیں اور جعلی حکمرانوں سے چھٹکارا پانے تک پی ڈی ایم چین سے نہیں بیٹھے گی۔اُنہوں نے کہا کہ ملک پر مسلط دھاندلی کی پیداوار جعلی حکومت نے ملک کا بیڑا غرق کردیا ،غریب عوام کو فاقہ کشی اور خودکشیوں پر مجبور کیا جارہا ہے ، ملک کی تقدیر بدلنے کے دعویداروں نے ملک کو اندھیروں میں دھکیل دیا ہے ۔ادھر پی ڈی ایم کے سربراہ مولانا فضل الرحمٰن کل الیکشن کمیشن آف پاکستان کے سامنے مظاہرے میں شرکت کیلئے 26 نمبر چونگی موٹروے چوک سے ریلی کی قیادت کرینگے ، ریلی کیلئے کنٹینر خصوصی طور پر تیار کیا جارہا ہے جبکہ دیگر علاقوں سے جے یو آئی کے کارکن دن گیارہ بجے آبپار ہ جمع ہونگے جہاں سے الیکشن کمیشن کی جانب مارچ کیا جائے گا۔اس سلسلہ میں جمعیت علمائاسلام، اسلام آباد کے ذمہ داران نے پروگرام کو حتمی شکل دے دی ۔مفتی محمداویس عزیز کے مطابق راولپنڈی کے قافلے کی قیادت مولانا غفور حیدری کرینگے

وفاقی وزیر اطلاعات و نشریات سینیٹر شبلی فراز کا کہنا ہے کہ فارن فنڈنگ کیس میں ہمیں پھنسانے کی کوشش کرنے والے خود پھنس گئے ہیں اور اب مسلم لیگ (ن) اور پیپلز پارٹی کو خود بتانا پڑ گیا ہے انہیں فنڈز کہاں سے ملتے ہیں۔

اسلام آباد میں پارلیمانی سیکریٹری فرخ حبیب کے ہمراہ پریس کانفرنس کرتے ہوئے شبلی فراز نے کہا کہ ‘اپوزیشن کی سیاسی جماعتوں کے بارے میں سب کو علم ہے کہ وہ ایک چھتری تلے کیوں اکٹھے ہیں، وجہ یہ ہے کہ انہوں نے اپنی حکومتوں میں قوانین کو پامال کیا، پی ڈی ایم کا سفر دھمکیوں پر مبنی تھا مگر انہیں عوام سے پذیرائی نہیں ملی اور اب ایک تھی پی ڈی ایم کے موضوع پر ٹی وی پر پروگرام ہو رہے ہیں’۔

انہوں نے کہا کہ ‘پی ڈی ایم میں شامل اکثر جماعتوں نے اپنے تمام پتے کھیل لیے ہیں اور تمام میں انہیں ہزیمت کا سامنا کرنا پڑا، اب جو یہ آخری پتہ کھیل رہے ہیں وہ یہ ہے کہ اتنا جھوٹ بولو کہ سچ کا گمان ہونے لگے’۔

ان کا کہنا تھا کہ پی ڈی ایم کی طرف سے الیکشن کمیشن کے سامنے احتجاج ایک بھونڈی کوشش ہے، مولانا فضل الرحمٰن نے نیب کا نوٹس ملنے پر کہا وہ پوری پارٹی کے ہمراہ وہاں احتجاج کریں گے، مولانا فضل الرحمٰن سمجھتے ہیں وہ جس ریاست کا حصہ نہیں وہ نامکمل ہے’۔

شبلی فراز نے کہا کہ ‘پی ٹی آئی کو ملنے والے فنڈز کے 40 ہزار ناموں کی تفصیلات ہمارے پاس موجود ہیں، پی ٹی آئی نے اپنے تمام جوابات الیکشن کمیشن کو جمع کرا دیے ہیں، یہ ہمیں پھنساتے ہوئے خود پھنس گئے ہیں، اب مسلم لیگ (ن) اور پیپلز پارٹی کو خود بتانا پڑ گیا ہے انہیں فنڈز کہاں سے ملتے ہیں، اپوزیشن جماعتوں نے اسکروٹنی کمیٹی کو جواب ہی نہیں دیے، کل اپوزیشن کی پیشی ہے انہیں چاہیے وہ الیکشن کمیشن کو جواب دیں اور اپوزیشن جتھوں کے پیچھے چھپنے کے بجائے اپنا جواب اسکروٹنی کمیٹی کو جمع کرائے’۔

انہوں نے کہا کہ ‘ پہلے وہ پارٹیاں حکمران تھیں جنہوں نے ملک کو اپنی جاگیر بنا رکھا تھا، اب ایک ایسا لیڈر آیا ہے جو ان سے ملک کے لوٹے ہوئے اثاثوں کا حساب مانگ رہا ہے’۔