جمعیت علمائے اسلام (ف) اور اپوزیشن اتحاد پی ڈی ایم کے سربراہ مولانا فضل الرحمان کہتے ہیں کہ 23مارچ کو پوری قوم مہنگائی کے خلاف اسلام آباد کی طرف مارچ کرے گی۔
پشاور میں میڈیا سے بات کرتے ہوئے مولانا فضل الرحمان نے کہا کہ نااہل حکومت نے ملکی معیشت کو تباہ و برباد کردیا ہے،مہنگائی کی وجہ سے لوگوں کا جینا مشکل ہوگیا ہے،آج لوگ مہنگائی کی وجہ سے خودکشیاں کررہے ہیں۔
سربراہ پی ڈی ایم کا کہنا تھا کہ تمام اپوزیشن جماعتوں نے 23 مارچ کو مہنگائی مارچ میں شرکت کا اظہار کیا ہے، عوام اب اس حکومت کو مزید برادشت کرنے کے لئے تیار نہیں، 23 مارچ کو پوری قوم مہنگائی کے خلاف اسلام آباد کی طرف مارچ کرے گی، ہمارا مطالبہ عام انتخابات کا ہے۔
مولانا فضل الرحمان نے مزید کہا کہ خیبر پختونخوا میں بلدیاتی انتخابات میں حکمران جماعت کو بدترین شکست ہوئی ، اگلے مرحلے میں بھی حکمران جماعت کو ناکامی کا سامنا کرنا پڑے گا۔
منی بجٹ کے حوالے سے مولانا فضل الرحمان نے کہا کہ منی بجٹ کے بل کو اسٹینڈنگ کمیٹی میں جانا چاہیے تھا، ایوان میں بھی منی بجٹ پر کوئی بحث نہیں کرائی گئی۔
مولانا فضل الرحمان نے کہا کہ پیپلز پارٹی اور اے این پی کو کبھی بھی اپنا مخالف نہیں سمجھا، ہم نے ان دونوں جماعتوں کو اپوزیشن کا حصہ سمجھا ہے۔
