راولپنڈی: پاک فوج نے نواز شریف سے کسی بھی ڈیل کی تردید کردی، ڈیل کی خبروں کو بے بنیاد اور قیاس آرائیاں قرار دے دیا۔
ڈائریکٹر جنرل انٹر سروسز پبلک ریلیشنز ( ڈی جی آئی ایس پی آر) میجر جنرل بابر افتخار نے کہا کہ اگر کوئی ڈیل کی بات کررہا ہے تو اسی سے پوچھیں کہ کون ڈیل کررہا ہے، ڈیل کے شواہد کیا ہیں، کیا محرکات ہیں؟ ایسی کوئی چیز نہیں یہ بے بنیاد باتیں ہیں، اس معاملے پر جتنی کم بحث کی جائے اتنا ہی ملک کے مفاد میں بہتر ہے۔
ایک سوال پر انہوں نے کہا کہ سول ملٹری تعلقات میں کوئی مسئلہ نہیں، مسلح افواج حکومت کے احکامات کے تحت کام کرتی ہیں، ٹی وی پروگرامز میں کہا جاتا ہے اسٹیبلشمنٹ نے یہ کردیا وہ کردیا ، اسٹیبلشمنٹ کو اس بحث سے باہر رکھیں۔
راولپنڈی میں پریس کانفرنس کے دوران سابق وزیراعظم نوازشریف سے ڈیل سے متعلق سوال پر میجر جنرل بابر افتخار نے کہا کہ ’یہ سب قیاس آرائیاں ہیں، اگر کوئی اس طرح کی ڈیل کی بات کرتا ہے تو اسی سے بات کریں کہ کون ڈیل کررہا ہے ؟ اس کے محرکات کیا ہیں؟ ایسی کوئی چیز نہیں، کوئی ایسی بات کرتا ہے تو اس کی تفصیلات اس سے ہی پوچھیں، ڈیل کی باتیں بے بنیاد ہیں، اس پر جتنی کم بحث کی جائے اتنا ملک کے مفاد میں اچھا ہے‘۔
ڈی جی آئی ایس پی آر کا کہنا تھا کہ ’کچھ عرصے سے پاکستان کے مختلف اداروں کے خلاف منظم مہم چلائی جارہی ہے جس کا مقصد حکومت، عوام اور اداروں کےدرمیان خلیج پیدا کرنا اور اداروں پر عوام کے اعتماد کو ٹھیس پہنچانا ہے، ایسی تمام سرگرمیوں سے نہ صرف آگاہ ہیں بلکہ ان کے لنکس سے بھی آگاہ ہیں، یہ لوگ پہلے بھی ناکام ہوئے اب بھی ناکام ہوں گے‘۔
ترجمان نے مزید کہا کہ شام کوپروگرامزمیں کہا جاتا ہےکہ اسٹیبلشمنٹ نے یہ کردیا وہ کردیا، سول ملٹری تعلقات میں کوئی مسئلہ نہیں ہے، اسٹیبلشمنٹ کو اس مسئلے سے باہر رکھیں۔
