اسلام آباد: (ویب ڈیسک) پاکستان سپر لیگ (پی ایس ایل) 7 شروع ہونے سے قبل وزیراعظم عمران خان نے کہا ہے کہ امید ہے ہر ٹیم آخری گیند تک لڑے گی۔
تفصیلات کے مطابق پاکستان سپر لیگ 7 کا میلہ سجنے کو ہے اور ایسے میں پاکستانی کرکٹ ٹیم کے سابق کپتان اور وزیراعظم پاکستان عمران خان نے اُمید ظاہر کی ہے کہ تمام ٹیمیں اچھا کھیل پیش کریں گی۔
یاد رہے کہ پی ایس ایل 7 کا پہلا مرحلہ 27 جنوری سے 7 فروری تک نیشنل سٹیڈیم کراچی میں کھیلا جائے گا۔ دوسرا مرحلہ 10 فروری سے قذافی سٹیڈیم لاہور میں کھیلا جائے گا جو27 فروری تک جاری رہے گا۔
گذشتہ ہفتے نیشنل کمانڈ اینڈ آپریشنز سینٹر (این سی او سی ) نے پاکستان سپر لیگ (پی ایس ایل) کے ساتویں ایڈیشن کے پہلے مرحلے میں 25 فیصد تماشائیوں کی شرکت کی منظوری دے دی تھی۔
وزیراعظم عمران خان ماضی میں ان کی ٹیم کا اہم حصہ رہنے والے کھلاڑی اور پاکستان کرکٹ بورڈ کے موجودہ چیئرمین رمیز راجہ کے ساتھ نظر آئے۔
پیغام میں عمران خان نے کہا کہ پی ایس ایل 7 کو اوپن کر رہا ہوں اور مجھے امید ہے کہ ہر ٹیم آخری گیند تک لڑے گی اور لوگوں کو محظوظ کرے گی۔
