لاہور: (ویب ڈیسک) پاکستان ویمن کرکٹ ٹیم کی کپتان بسمہ معروف نے کہا ہے کہ ورلڈ کپ کیلئے بطور کپتان کم بیک کررہی ہوں، کراچی میں لگے کیمپ میں کافی محنت کی گئی ہے اور کوشش یہی ہے کہ سیمی فائنل تک رسائی حاصل کریں۔
ورلڈ کپ کے لئے نیوزی لینڈ روانگی سے قبل گفتگو کرتے ہوئے بسمہ معروف نے کہا کہ اس طرز کے ٹورنامنٹ میں پہلے میچ سے اچھا کھیلیں، بھارت سے پہلا میچ ہے اس کو مختلف سوچ کیساتھ کھیلیں، پاکستانی ٹیم اچھی فارم میں ہے۔
ان کا کہنا تھا کہ ڈیانا، ایمن اور فاطمہ ثنا فاسٹ باؤلرز میں شامل ہیں، ہمارے پاس فاسٹ باؤلرز کے پول میں کم کھلاڑی ہیں اور ہر میچ ہمارے لیے آسان نہیں ہے۔
واضح رہے کہ آئی سی سی ویمنز ورلڈ کپ کے لئے سکواڈ میں شامل تمام کھلاڑیوں اور آفیشلز کی کورونا ٹیسٹنگ رپورٹ منفی آئی ہے، ٹیم پہلے آکلینڈ پہنچ کر کرائسٹ چرچ چارٹرڈ فلائٹ سے روانہ ہوگی اور دس دن آئسولیشن میں رہے گی۔
