واٹس ایپ میں وائس نوٹ فیچر کی تبدیلی

سان فرانسسكو: (ویب ڈیسک) اینڈرائیڈ موبائل میں واٹس ایپ کا وائس نوٹ فیچر تبدیل ہونے جارہا ہے جس سے صارفین کو نئی سہولت میسر آئے گی۔
پیغام رسانی کی سب سے بڑی موبائل ایپلیکیشن ’واٹس ایپ‘ میں اینڈرائیڈ صارفین کو وائس نوٹ کی ریکارڈنگ کے دوران اسے روک کر(پوز) سننے اور پھر وہیں سے آغاز(ری زیوم) کا فیچر فراہم کیا جارہا ہے۔ یہ سہولت آپریٹنگ سسٹم ‘آئی او ایس’ میں پہلے سے موجود ہے۔
واٹس ایپ کی اپڈیٹ اور نئے فیچرز پر نظر رکھنے والی ویب سائٹ ‘ڈبلیو اے بیٹا انفو’ کے مطابق اینڈرائیڈ موبائل استعمال کرنے والے حضرات عنقریب واٹس ایپ میں وائس نوٹ بھیجنے سے قبل ریکارڈنگ پر لگا کر اسے بیچ میں روک کر سن سکیں گے کہ انہوں نے کیا باتیں ریکارڈ کی ہیں بعد ازاں صارفین کو وائس نوٹ ارسال یا ڈیلیٹ کرنے کی بھی سہولت ہوگی۔
کمپنی جلد اینڈرائیڈ صارفین کے لیے نئی اپڈیٹ متعارف کرائے گی۔ نئے فیچر سے فائدہ اٹھانے کے لیے صارفین کو واٹس ایپ پر وائس نوٹ آئیکن پر کلک کرکے اسے ہولڈ کرنا ہوگا جس کے بعد وائس ریکارڈنگ شروع ہوجائے گی۔
آپ کیا باتیں ریکارڈ کررہے ہیں اسے روک کر سن سکیں گے اور اگر آپ کو اپنی کہی بات غلط لگے تو اسے ڈیلیٹ کرنے کی بھی سہولت ہوگی۔ ایک عرصے سے صارفین وائس نوٹ کے لیے مائیک کا بٹن دبائے رکھتے تھے اور بات مکمل کرکے وائس آئیکن چھوڑنے سے پیغام دوستوں تک پہنچتا تھا۔
بعد ازاں واٹس ایپ نے وائس نوٹ کی ہولڈنگ کا فیچر متعارف کرایا اور پھر ریکارڈنگ کو درمیان میں ‘پوز’ اور ‘ری زیوم’ کی سہولت بھی دی تاہم اس فیچر سے اینڈرائیڈ صارفین محروم تھے لیکن اب انہیں بھی یہ سہولت ملے گی۔