اسلام آباد: (ویب ڈیسک) شاہد خاقان عباسی نے کہا ہے کہ پارلیمان اور جمہوری قدریں ختم ہوگئیں، حکومت اتنی خوفزدہ ہے کہ ہر ہتھکنڈا استعمال کر رہی ہے ، اسپیکر اس معاملے پر اب تک خاموش ہیں۔
مسلم لیگ ن کے رہنما شاہد خاقان عباسی نے پارلیمنٹ لاجز کے باہر میڈیا سے گفتگو کرتے ہوئے کہا کہ کل شام افسوسناک واقعہ پیش آیا، پولیس دروازے توڑ کر اندر داخل ہوئی، پولیس نے کامران مرتضیٰ اور سعدرفیق کو زدوکوب کیا، 5 ارکان اسمبلی کو حبس بے جا میں رکھا گیا، پولیس جے یو آئی کے 2 ایم این ایز کو اغواکر کے لے گئی، کیا حکومت اتنی خوفزدہ ہے کہ ہر ہتھکنڈا استعمال کر رہی ہے ؟ کیا پارلیمان اور جمہوری قدریں ختم ہوگئی ہیں؟۔
شاہد خاقان عباسی کا کہنا تھا کہ اسپیکر اس معاملے پر اب تک خاموش ہیں، اسپیکر غیر جانبدار ہوتا ہے، اسپیکر کو ارکان پارلیمنٹ اور پارلیمنٹ کی عزت کی کوئی پرواہ نہیں، اسپیکر صاحب ! کیا آپ نے پولیس کو پارلیمنٹ لاجز میں داخلے کی اجازت دی۔
