لاہور: (ویب ڈیسک) شوبز انڈسٹری کی کئی نامور شخصیات نے اپوزیشن کی تحریک عدم اعتماد کے خلاف وزیرِاعظم عمران خان کی حمایت کردی ہے ۔
اداکار شان شاہد نے ٹوئٹر پر لکھا کہ‘اس حلف کو یاد رکھیں، ان الفاظ کو یاد رکھیں، اس جدوجہد کو یاد رکھیں اور ایک سچے لیڈر کو یاد رکھیں جو ہم سب کیلئے لڑ رہا ہے۔ یہی نہیں بلکہ اداکار نے اپنے ٹوئٹ میں عمران خان کو مشرق کا شیر قرار دے دیا ہے۔
اداکارہ سائرہ یوسف نے اپنی انسٹا سٹوری پر لکھا کہ وہ ہمیشہ عمران خان کا ہی انتخاب کریں گی۔ اداکار علی عباس نے اپنے انسٹاگرام اکاؤنٹ پر لکھا کہ‘جب سب گندے انڈے ایک طرف اکھٹے ہوگئے ہیں تو ایک اچھی قوم کو کیا کرنا چاہیے ؟’۔
علی عباس نے مزید لکھا کہ‘وہ عمران خان کے ساتھ ہیں کیونکہ وہ غلام نہیں بن سکتے۔ اُنہوں نے قوم سے اپیل کی کہ‘ آپ بھی اس ذہنی غلامی سے نکلیں۔ اداکار بلال قریشی اور اداکارہ ایمن خان نے انسٹا گرام پر لکھا کہ ہم پاکستان اور عمران خان کیلئے لڑیں گے۔
