لاہور: (ویب ڈیسک) ڈپٹی اسپیکر پنجاب اسمبلی دوست محمد مزاری نے کہا ہے کہ ن لیگ کی پارلیمانی پارٹی کا اجلاس ہے، اس میں شرکت نہیں کروں گا۔
ڈپٹی اسپیکر پنجاب اسمبلی دوست محمد مزاری نے کہا کہ جب سرکاری طور پر اجلاس بلایا جائے گا تو اس کی صدارت کروں گا۔
واضح رہے کہ متحدہ اپوزیشن کی جانب سے ڈپٹی اسپیکر پنجاب اسمبلی کو بلائے گئے اجلاس میں شرکت کی دعوت دی گئی تھی۔ اجلاس نجی ہوٹل میں بلایا گیا ہے۔
ڈپٹی اسپیکر پنجاب اسمبلی نے کچھ دیر قبل کہا تھا کہ اختیارات کے تحت پنجاب اسمبلی کا اجلاس کہیں بھی بلا سکتا ہوں، اختیارات آئین کے مطابق استعمال کیے ہیں۔
واضح رہے کہ پاکستان تحریک انصاف کی جانب سے اپنے ہی ڈپٹی اسپیکر دوست محمد مزاری کے خلاف تحریک عدم اعتماد جمع کرائی جا چکی ہے۔
