بغاوت میں 30 سیکنڈ لگے تو اس کے تدارک میں بھی 30 سیکنڈ لگنے چاہییں، بلاول

اسلام آباد: (ویب ڈیسک) پیپلز پارٹی کے چیئرمین بلاول بھٹو زرداری کا کہنا ہے کہ جب بغاوت میں 30 سیکنڈ لگے تو اس کے تدارک میں بھی 30 سیکنڈ لگنے چاہییں۔
بلاول بھٹو نے ٹوئئر پر بیان جاری کرتے ہوئے کہاکہ انصاف میں تاخیر انصاف فراہم نہ کرنے کے مترادف ہے،گزشتہ ہفتے اسلام آباد میں آئین شکنی کے بعد آج پنجاب کے ڈپٹی اسپیکر کو وزیراعلیٰ کے لیے ووٹنگ کے دن اسمبلی سے باہر نکال کر تالے اور اطراف خاردار آہنی تاریں لگادی گئیں ۔
انہوں نے کہا کہ عمران خان کے آخری مایوس کن اقدامات اب انہیں بچا نہیں سکتے ، ان کی حکومت جاچکی، سلیکٹڈ راج کا خاتمہ ہوگیا۔
خیال رہے کہ پنجاب میں آئینی بحران ہوگیا ہے اور اسمبلی اجلاس کے حوالے سے صورتحال گومگوں کا شکار ہے تاہم اپوزیشن نے مقامی ہوٹل میں علامتی اجلاس طلب کرلیا ہے۔