برطانیہ : (ویب ڈیسک) برطانوی وزیر اعظم لزٹرس کے مستعفی ہونے کے بعد ایک بار پھر برطانیہ میں نئے وزیراعظم کی دوڑ کا آغاز ہو گیا ہے۔
اس دوڑ میں رشی سونک سب سے مضبوط پوزیشن پر ہیں جبکہ سابق وزیراعظم بورس جانسن بھی اس نئی دوڑ میں شامل ہو گئے ہیں، جبکہ کنزرویٹو رہنما پینی مورڈنٹ بھی وزیراعظم بننے کی امیدوار ہیں۔
وائس آف امریکا کی رپورٹ کے مطابق برطانیہ کی حکمراں کنزرویٹو پارٹی ایک ایسے وقت میں ایک ہفتے کے اندر ایک نیا وزیر اعظم مقرر کرنے کے لئے کو شاں ہے، جب برطانیہ انتہائی اعلی سطح پر غیر یقینی صورت حال کا متحمل نہیں ہوسکتا ہے۔
لاکھوں لوگ ایسے حالات گزر بسرکے لئے جدوجہد کر رہے ہیں جب کہ کھانے پینے کی اشیاء، ایندھن اور دوسری بنیادی اشیاء صرف کی قیمتیں آسمان سے باتیں کر رہی ہیں۔ اور ریکارڈ افراط زر کے سبب مورٹگیج کی شرح بہت بڑھ گئی ہے اور کساد بازاری سر پر منڈلا رہی ہے۔
واضح رہے لز ٹرس نے 45 دن میں ہی وزیراعظم کے عہدے سے استعفی کا اعلان کر دیا ہے، ان کا کہنا تھا کہ معیشت کی بہتری کا عزم لے کر وزارت عظمیٰ کا عہدہ سنبھالا تھا، جس مینڈیٹ کی بنیاد پر منتخب ہوئی تھی اسے ڈیلیور کرنے میں ناکام رہی۔
