لاہور: (ویب ڈیسک) وزیر اعلیٰ پنجاب چودھری پرویز الٰہی نے صحافی برادری سے کیا ہوا ایک اور وعدہ پورا کرتے ہوئے صحافی کالونی فیز ٹو کیلئے 700 کنال اراضی الاٹ کر دی۔
وزیراعلیٰ کی ہدایت پر چیف آپریٹنگ آفیسر راوی اربن ڈویلپمنٹ اتھارٹی نے روڈا کے فیز ون میں 700 کنال اراضی الاٹ کرنے کے بارے میں پنجاب جرنلسٹ ہاؤسنگ فاؤنڈیشن کو آگاہ کر دیا۔
پرویز الٰہی سے لاہور پریس کلب کے صدر اعظم چودھری اور سیکرٹری جنرل پی ایف یو جے رانا محمد عظیم نے ملاقات کی، پریس سیکرٹری وزیراعلیٰ اقبال چودھری اور ڈی جی پی آر راؤ پرویز اختر بھی اس موقع پر موجود تھے۔
وزیراعلیٰ پنجاب نے اراضی الاٹ کرنے کے حوالے سے روڈا کا نوٹیفکیشن اعظم چودھری اور رانا محمد عظیم کو دیا۔
اس موقع پر چودھری پرویز الٰہی نے کہا کہ روڈا فیز ون میں ترقیاتی کام پہلے سے ہی جاری ہیں، صحافیوں کے لئے چھت فراہم کرنا میری اولین ترجیح ہے، پچھلے دور میں بھی صحافیوں کو پلاٹ دئیے اور اب بھی پلاٹ دینے کا وعدہ پورا کیا ہے، صحافی کالونی فیز ٹو میں پریس کلب ملازمین اور معذور، بیمار صحافیوں کو بھی پلاٹ دئیے جائیں گے۔
لاہور پریس کلب کے صدر اعظم چودھری اور سیکرٹری جنرل پی ایف یو جے رانا محمد عظیم نے صحافی کالونی فیز 2 کے لئے 700 کنال اراضی کے نوٹیفکیشن پر وزیراعلیٰ پنجاب کا شکریہ ادا کیا۔
صدر لاہور پریس کلب اعظم چودھری اور سیکرٹری جنرل پی ایف یو جے رانا محمد عظیم نے کہا کہ آپ کا یہ اقدام صحافی پہلے کی طرح ہمیشہ یاد رکھیں گے، چودھری پرویزالٰہی پوری صحافی برادری کے محسن ہیں، صحافیوں کے لئے اپنی چھت کا خواب آپ نے پورا کیا ہے۔
