اسلام آباد: (ویب ڈیسک) کورونا کی پانچویں لہر کے وار کم ہونے لگے۔ ملک میں چوبیس گھنٹے کے دوران مثبت کیسز کی شرح صفر اعشاریہ چار ایک فیصد ریکارڈ کی گئی۔ پاکستان میں کورونا کے تصدیق شدہ کیسز کی تعداد 15 لاکھ 27 ہزار 751 ہوگئی۔
این آئی ایچ کے تازہ ترین اعدادوشمار کے مطابق گذشتہ 24 گھنٹوں کے دوران 82 نئے کیسز رپورٹ ہوئے، پنجاب میں 5 لاکھ 5 ہزار 904، سندھ میں 5 لاکھ 76 ہزار 71، خیبرپختونخوا میں 2 لاکھ 19 ہزار 437، بلوچستان میں 35 ہزار 484، گلگت بلتستان میں 11 ہزار 737، اسلام آباد میں ایک لاکھ 35 ہزار 170 جبکہ آزاد کشمیر میں 43 ہزار 308 کیسز رپورٹ ہوئے۔
ملک بھر میں اب تک 2 کروڑ 80 لاکھ 28 ہزار 845 افراد کے ٹیسٹ کئے گئے، گذشتہ 24 گھنٹوں کے دوران 19 ہزار 846 نئے ٹیسٹ کئے گئے، اب تک 14 لاکھ 93 ہزار 998 مریض صحتیاب ہوچکے ہیں جبکہ 185 مریضوں کی حالت تشویشناک ہے۔
پنجاب میں 13 ہزار 560، سندھ میں 8 ہزار 101، خیبرپختونخوا میں 6 ہزار 324، اسلام آباد میں ایک ہزار 23، بلوچستان میں 378، گلگت بلتستان میں 191 اور آزاد کشمیر میں 792 مریض جان سے ہاتھ دھو بیٹھے۔

لندن: (ویب ڈیسک) بلاول بھٹو کا کہنا ہے کہ میثاق جمہوریت پر کام مکمل کریں گے، سلیکٹڈ کو گھر بھیج کر تاریخ رقم کی، عمران خان نہیں اس سوچ کے خلاف ہیں، جو ایسی سیاست کے پیچھے ہے۔
بلاول بھٹو نے لندن میں نواز شریف کے افطار ڈنر میں شرکت کی۔ ایون فیلڈ پہنچنے پر سابق وزیراعظم نواز شریف نے بلاول کا خود استقبال کیا۔ چیئرمین پیپلزپارٹی کے ہمراہ شیری رحمان، نوید قمر اور قمر زمان کائرہ بھی تھے۔ اس موقع پر ملک کی سیاسی صورتحال اور دیگر اہم امور پر تفصیلی بات چیت ہوئی۔
چیئرمین پیپلزپارٹی نے میڈیا سے گفتگو کرتے ہوئے کہا کہ میثاق جمہوریت پر کام مکمل کریں گے، سلیکٹڈ کو گھر بھیج کر تاریخ رقم کی، عمران خان کے نہیں، اس کے پیچھے چھپی سوچ کے خلاف ہیں۔
ادھر نواز شریف اور بلاول بھٹو زرداری کےدرمیان ایک روز پہلے ہونیوالی ملاقات کی اندرونی کہانی بھی سامنے آگئی۔ دونوں رہنماؤں نے چارٹر آف ڈیموکریسی ٹو کرنے پر تبادلہ خیال کیا صدر کے مواخذے کے حوالے سے بھی تجاویز طلب گئیں۔ سابق حکومت کی الیکشن ترامیم کو ختم کرنے بارے بھی گفتگو ہوئی۔ دونوں رہنماؤں نے اتفاق کیا کہ ای وی ایم مشینوں پر الیکشن کرانے کا فیصلہ بھی واپس لیا جائے۔

لاہور: (ویب ڈیسک) گورنر پنجاب عمر سرفراز چیمہ کو طبیعت ناساز ہونے کے بعد اسپتال منتقل کر دیا گیا ہے۔
گورنر پنجاب کے خاندانی ذرائع کا بتانا ہے کہ عمر سرفراز چیمہ کی طبیعت سحری کے وقت خراب ہوئی جس کے فوری بعد ان کے اسٹاف کو اطلاع دی گئی۔
عمر سرفراز چیمہ کو فوری طور پر سروسز اسپتال منتقل کیا گیا جہاں ڈاکٹرز نے انھیں ڈائریا تشخیص کیا جس کے بعد انہیں ڈرپ لگی ہوئی ہے۔ ذرائع کا بتانا ہے کہ گورنر عمر سرفراز چیمہ کا سروسز اسپتال میں طبی معائنہ جاری ہے اور ان کے مختلف ٹیسٹ کیے جا رہے ہیں تاہم ان کی صحت کے حوالے سے خطرے کی کوئی بات نہیں ہے۔

راولپنڈی: (ویب ڈیسک) افغانستان سے پھر دراندازی اور دہشتگردوں کی فائرنگ سے پاک فوج کے تین جوان شہید ہوگئے۔ پاکستانی سکیورٹی فورسز نے دہشتگردوں کی فائرنگ کا انتہائی موثر جواب دیا۔
آئی ایس پی آر کے مطابق فائرنگ دیواگر شمالی وزیرستان کے علاقے پاک افغان بارڈر پر کی گئی۔ پاکستانی سیکیورٹی فورسز نے دہشتگردوں کی فائرنگ کا انتہائی موثر جواب دیا، مصدقہ اطلاعات کے مطابق دہشتگردوں کو بھاری نقصان اٹھانا پڑا۔
آئی ایس پی آر کے مطابق فائرنگ کے تبادلے میں حوالدار تیمور، نائیک شعیب، سپاہی ثاقب نواز شہید ہوئے۔ دہشتگردوں کی جانب سے افغان سرزمین استعمال پر پاکستان نے شدید احتجاج کیا ہے۔ پاکستان امید کرتا ہے کہ افغان حکومت مستقبل میں دہشتگردوں کی سرگرمیوں کو روکے گی، دہشگردی کے خلاف پاک فوج مادر وطن کے دفاع کے لیے پرعزم ہے، آئی ایس پی آر کے مطابق بہادر جوانوں کی قربانیاں ہمارے عزم کو مزید مضبوط کرتی ہیں۔

کراچی: (ویب ڈیسک) وزیر خزانہ مفتاح اسماعیل نے فیول پر سبسڈی ختم کرنے کا عندیہ دے دیا۔ انہوں نے کہا کہ آئی ایم ایف تیل پر سبسڈی نہیں چاہتا جس پر متفق ہوں۔
وزیر خزانہ مفتاح اسماعیل نے واشنگٹن میں مقامی تھینک ٹینکس سے خطاب کرتے ہوئے کہا کہ ملک میں آئی ایم ایف چاہتا ہے کہ تیل پر سبسڈی نہ دی جائے اور میں اس سے متفق ہوں، عمران خان نے تیل پر سبسڈی دے کے آنے والوں کے لیے جال بچھایا تھا، غریب افراد کے لیے کچھ سبسڈیز برقرار رکھنا چاہتے ہیں۔

اسلام آباد: (ویب ڈیسک) وزیراعظم شہباز شریف آج ایک روزہ دورے پر کوئٹہ پہنچیں گے جہاں وہ صوبے میں امن وامان سے متعلق اجلاس کی صدارت کرینگے۔
ذرائع کے مطابق وزیراعظم شہبازشریف ایک روزہ دورے پر آج کوئٹہ جائیں گے، بلوچستان نیشنل پارٹی کے سربراہ سردار اختر مینگل سمیت وفاقی وزرا بھی شہباز شریف کے ہمراہ ہونگے۔
ذرائع کا کہنا ہے کہ شہبازشریف کوئٹہ میں امن وامان کی صورتحال پر طلب کئےگئے اجلاس کی صدارت کرینگے جبکہ کوئٹہ میں جگر کے اسپتال کا افتتاح اور کراچی ٹو کوئٹہ روڈ کا سنگ بنیاد رکھیں گے۔
ذرائع کا کہنا ہے کہ اپنے دورہ کوئٹہ میں وزیراعظم مشرقی بارڈر کی بحالی کا اعلان سمیت دیگر منصوبوں کا افتتاح کریں گے۔

لندن: (ویب ڈیسک) پاکستان مسلم لیگ (ن) کے قائد اور سابق وزیراعظم نواز شریف نے قومی سلامتی کمیٹی اجلاس کے اعلامیہ پر ردعمل دیتے ہوئے کہا کہ ابھی تو 5 سے 10 فیصد سچ سامنے آیا ہے، باطل مٹ کر ہی رہے گا، ریاست مدینہ کے نام پر معاشرے سے زیادتی کی گئی، عمران خان کو عبرت کا نشان بننا چاہیے۔
نیشنل سکیورٹی کمیٹی کے اعلامیے پر گفتگو کرتے ہوئے نواز شریف نے کہا کہ سچ ہمیشہ سامنے آجاتا ہے، لوگوں کو بچے پالنا مشکل ہوگیا، آٹا، دالیں خریدنا مشکل ہوچکا ہے، میں نے زندگی میں پہلی دفعہ دیکھا ہے کہ لوگ دوائیں نہیں خرید سکتے، ہم نے بڑی محنت سے پاکستان کی معیشت کو بہتر کیا، عمران خان نے پاکستان کی معیشت کو زمین بوس کر دیا، الیکشن سے پہلے اور بعد میں بھی عمران خان نے جھوٹ ہی بولا، ریاست مدینہ کا نام لے کر مذہب اور معاشرے سے زیادتی کی گئی۔
سابق وزیراعظم نے مزید کہا کہ اس شخص کو عبرت کا نمونہ بننا چاہئے، نہ قانون کو مانتا ہے نہ آئین و پارلیمنٹ کو، صدر مملکت کو سوچنا چاہئے وہ ملک کے صدر ہیں عمران خان کے نہیں، مرکز اور پنجاب میں جو کچھ ہوا سب کو پتہ ہے، فارن فنڈنگ کا فیصلہ اگر انکے خلاف آیا تو اسکی پارٹی ختم ہوسکتی ہے، اس نے پہلے ہی استعفیٰ دے دیا کیونکہ اسے پتہ تھا بعد میں بھی استعفیٰ دینا پڑنا ہے۔
خیال رہے کہ وزیراعظم شہباز شریف کی زیر صدارت قومی سلامتی کمیٹی اجلاس کے اعلامیہ کے مطابق ایجنسیوں نے بریفنگ دی کہ غیر ملکی سازش سے متعلق کوئی ثبوت نہیں ملا جبکہ قومی سلامتی کمیٹی نے گذشتہ اعلامیے کی بھی توثیق کر دی۔