لاہور: (ویب ڈیسک) وفاقی وزیر برائے خزانہ و ریونیو مفتاح اسماعیل کا کہنا ہے کہ تاریخ کا سب سے زیادہ بجٹ خسارہ اور سب سے زیادہ تجارتی خسارہ ہوا۔
انہوں نے ٹوئٹ میں لکھا بلند ترین مہنگائی ، گندم اور چینی جو ہم برآمد کرتے تھے مگر درآمد کرنے پر مجبور ہوگئے۔
روپے کی قیمت میں تاریخی کمی، زرمبادلہ کے ذخائر میں ریکارڈ کمی اور اسد عمر صاحب کہہ رہے ہیں کہ معیشت اچھی ہے؟ غلط بیانی کی بھی حد ہوتی ہے۔

لاہور: (ویب ڈیسک) لاہورہائی کورٹ راولپنڈی بنچ نے غیر قانونی تعمیرات، تجاوزات کی صورتحال اور اقوام متحدہ کی رپورٹ طلب کرلی۔ سانحہ مری کیس کی سماعت کے دوران عدالت نے کہا کہ مری میں ہر کوئی جاتا ہے، پہاڑ کاٹ کے تعمیرات شروع کرتا ہے، تعمیرات اور تجاوزات کو کنٹرول کون کرے گا۔
سماعت کے موقع پر عدالت نے سیکرٹری لوکل گورنمنٹ پنجاب سے استفسار کیا کہ مری کا ماسٹر پلان اب تک کیوں نہیں بنا ؟ سیکرٹری لوکل گورنمنٹ نے بتایا کہ ماسٹر پلان لوکل گورنمنٹ راولپنڈی نے بنانا ہے جس پر کام جاری ہے۔ عدالت نے ریمارکس دیئے کہ مری میں ہر کوئی جاتا ہے اور پہاڑ کاٹ کے تعمیرات شروع کر دیتا ہے، مری میں تعمیرات اور تجاوزات کون کنٹرول کرے گا ؟ مری میں گرین ایریا کم جبکہ کنسٹرکشن بڑھ رہی ہے ؟
عدالت نے مری سے متعلق اقوام متحدہ کی رپورٹ بھی طلب کی جس میں کہا گیا ہے کہ مری ہر سال تین سے چار سینٹی میٹر زمین میں دھنس رہا ہے، یہاں پر ہونے والی غیر قانونی تعمیرات کے اثرات تباہ کن ہو سکتے ہیں۔ عدالت نے چیف آفیسر ضلع کونسل کامران خان کو پیر تک غیر قانونی تعمیرات اور تجاوزات کی مفصل رپورٹ جمع کرانے کی ہدایت کرتے ہوئے سماعت 22 اپریل تک ملتوی کر دی۔

اسلام آباد: (ویب ڈیسک) سینیٹ میں قائد ایوان ڈاکٹر شہزاد وسیم نے اپنے عہدے سے استعفیٰ دے دیا۔
ڈاکٹر شہزاد وسیم نے اپنا استعفیٰ چیئرمین سینیٹ کو بھجوا دیا، سابق وزیراعظم عمران خان نے شہزاد وسیم کو قائد ایوان مقرر کیا تھا۔
واضح رہے کہ اس سے قبل تحریک انصاف کے 123 اراکین نے قومی اسمبلی سے استعفے دے دیئے تھے جو اس وقت کے ڈپٹی سپیکر قومی اسمبلی قاسم سوری نے منظور کر لئے تھے، بعد ازاں قاسم سوری خود بھی مستعفی ہو گئے تھے۔ تحریک انصاف کی جانب سے موقف اپنایا گیا تھا کہ موجودہ حکومت امپورٹڈ حکومت ہے، فوری طور پر عام انتخابات کروائے جائیں۔

اسلام آباد: (ویب ڈیسک) وزیراعظم شہباز شریف نے کہا ہے کہ حکومت کو مہنگائی اور بے روز گاری سمیت سخت چیلنجز درپیش ہیں، سابق حکومت ان سے نمٹنے میں ناکام رہی، ، قوم کے مفاد میں بہترین فیصلے کریں گے۔
وزیراعظم شہباز شریف نے کابینہ کے پہلے اجلاس سے خطاب میں کہا کہ کابینہ ارکان کو مبارکباد پیش کرتا ہوں، ملک کیلئےآپ کی بہت قربانیاں ہیں، عدم اعتماد کے نتیجے میں اللہ تعالی نے ہمیں کامیابی عطا فرمائی، ہمارا اتحاد ذاتی پسند و ناپسند سے بالاتر ہو کر قوم کی خدمت کرے گا۔
انہوں نے کہا کہ ملک قرضوں میں ڈوبا ہوا ہے، بجلی نہ ہونےکی وجہ سے درجنوں کارخانے بند ہیں۔ مشکلات ضرور آئیں گی لیکن دیکھنا ہو گا ان کا حل کیسے کرنا ہے، ہم نے ڈوبتی کشتی کو کنارے لگانا ہے۔ بلوچستان کے عوام کے مسائل پر بھرپور توجہ دینی ہو گی، دیگر صوبوں کے مسائل پر بھی درددل کے ساتھ توجہ دینا ہو گی۔ ہمارے پاس جادو کی چھڑی نہیں کہ مسائل فوری حل ہو جائیں مگر چینی کہاوت ہے کہ جہاں چیلنج ہے وہاں موقع بھی موجود ہے۔
شہباز شریف کا کہنا تھا کہ 4 سال اپوزیشن کو بدترین انتقام کا نشانہ بنایا گیا، اس دوران کرپشن عروج پر تھی اسے ختم کرنا ہے۔ زہریلے پروپیگنڈے کا حقائق کی بنیاد پر جواب دینا ہو گا، محنت کےعلاوہ آگے بڑھنے کا کوئی راستہ نہیں۔

لاہور: (ویب ڈیسک) پنجاب اسمبلی میں تشدد کا نشانہ بننے والی پی ٹی آئی رکن آسیہ امجد کی حالت تشویشناک ہو گئی، انہیں 3 دن پہلے وینٹی لیٹر پر منتقل کیا گیا تھا۔
تحریک انصاف کی جانب سے کہا گیا ہے کہ ڈاکٹرز کے مطابق خاتون رکن اسمبلی آسیہ امجد کے دماغ میں خون جم گیا ہے، خاتون رکن وینٹی لیٹر پر ہیں اور ان کی حالت انتہائی تشویشناک ہے۔

اسلام آباد: (ویب ڈیسک) سابق وفاقی وزیر اسد عمر نے دعویٰ کیا ہے کہصرف 4 ہفتےمیں ملکی زرمبادلہ کے ذخائر میں 5 ارب ڈالر سے زائد کی کمی ہوئی ہے۔
سوشل میڈیا پلیٹ فارم ٹوئٹر پر ایک پیغام میں اسد عمر نے کہا ہے کہ ملکی زرمبادلہ کے ذخائر میں خاطر خواہ کمی عدم اعتماد کی قرارداد کے بعد ہوئی۔ صرف 4 ہفتےمیں ملکی زرمبادلہ کے ذخائر میں 5 ارب ڈالر سے زائد کی کمی ہوئی ہے۔
انہوں نے کہا ہے کہ پاکستان کل ذخائر کا تقریباً ایک چوتھائی صرف 4 ہفتوں میں چلا گیا۔یہ جعلی حکومت جتنی دیر تک رہے گی معاشی بحران اتنا ہی گہرا ہوگا۔

ضیا شاہد آسمان صحافت پر چمکتا وہ آفتاب ہیں جن کی زندگی کے مختلف پہلوؤں پر ارباب دانش کی طرف سے تادیر نا صرف بات ہوتی رہے گی بلکہ تشنگان علم ان کی فکر، سوچ اور فلسفہ پر ہماری جامعات میں تحقیق کر کے ایم فل، پی ایچ ڈی کی ڈگریاں حاصل کرتے رہیں گے ۔ یہ بات طے ہے کہ کم از کم پاکستان میں ضیا شاہد کا تذکرہ کئے بغیر صحافت کی بات مکمل نہیں ہو سکتی لیکن صحافت سے ہٹ کر بھی ان کی شخصیت اتنی ہمہ گیر ہے کہ اس کی گیرائی و گہرائی ماپنے کے لئے دفتر درکار ہیں ۔ سیلف میڈ ہونے کے باوجود ان کی کامیاب زندگی کی انتہائی دلچسپ کہانی (Success Story ) ہمارے نوجوانوں کو ہی نہیں بلکہ موٹیویٹرز اور موٹیویشنل سپیکرز کو بھی مہمیز دیتی اور متاثر (Inspire ) کرتی ہے ۔ اس سوال کا جواب حاصل کرنا ہمیشہ پرکشش رہے گا کہ سندھ کے علاقے گڑھی یاسین میں پیدا ہوئے والے بچے نے طویل یتیمی کے باوجود صرف پاکستان ہی نہیں عالمی سطح پر صحافت میں ایک بڑا نام کیسے پیدا کیا؟ ۔ پاکستان میں جب صرف 2 میڈیا ہاوسز کا غلبہ تھا، ضیا شاہد نے اس سخت مقابلے میں اپنی نمایاں جگہ کیسے بنا لی؟ ان میڈیا ہاوسز کے پس منظر میں وسائل کی دستیابی تھی لیکن ضیا شاہد نے بغیر کسی بڑے سرمائے کے تیسرے شاندار میڈیا ہاوس کے قیام اور اس کے نمایاں مقام ایسا مشکل سنگ میل کیسے عبور کیا؟ سوال ہمیشہ سامنے آتا رہے گا کہ آخر وہ کون سے اوصاف تھے کہ جن کی بنا پر انہیں جدید صحافت کا بانی تسلیم کیا گیا۔

وہ آخر صحافت میں کیا جدت لائے؟ ضیا شاہد اخبار کو خواص سے عوام میں کیسے لائے؟ ضیا شاہد عوامی جذبات پر گہری نظر رکھنے والے قوم کے نباض کیسے بنے؟ ضیا شاہد کی کیا صحافتی زندگی ہی قابل بحث ہے؟ آخر وہ بطور شہری کیسے تھے؟ آخر وہ قائداعظم سے اتنی زیادہ محبت کیوں رکھتے تھے؟ ان کی کتاب “سچا اور کھرا لیڈر” کے پس منظر عوامل کیا تھے؟ ضیا شاہد کو مصور صوبہ جنوبی پنجاب کیوں کہا گیا؟ ضیا شاہد کو کیوں حکومتی عتاب کا سامنا کرنا پڑا؟ ضیا شاہد نے شاہی قلعہ جیسی قید کیوں کاٹی؟ کیا ان کے پائے استقلال میں کبھی لغزش آئی؟
اس جیسے دیگر درجنوں ہی نہیں بلکہ سینکڑوں سوالات ہیں جن پر شعبہ صحافت اردو، اور سوشل سائنسز کے طلباء اور طالبات ریسرچ کرتے رہیں گے۔قوم ضیا شاہد کو تا دیر یاد کرتی رہے گی۔

بقول ابن انشا:

ہم بھول سکے ہیں نہ تجھے بھول سکیں گے
تو یاد رہے گا ہمیں ہاں یاد رہے گا

ضیا شاہد کا صحافت، خصوصا اپنے اخبار خبریں کو دیا گیا مقبول ترین سلوگن “جہاں ظلم، وہاں خبریں” ہے۔ اس نعرے کے پیچھے سماج کے صدیوں کے تجربے کا نچوڑ شامل ہے ۔پاکستان دنیا کا واحد ملک ہے جو مذہب کی بنیاد پر قائم ہوا ۔ دو قومی نظریہ اس ملک کی اساس ہے ۔ لیکن اب پاکستان میں ایک بہت بڑی تعداد اقلیتوں کی بھی موجود ہے ۔ اب ضروری ہے کہ اس ملک کے باشندے پاکستانی بن کر رہیں ۔پاکستانیت کے فروغ کیلئے ضروری ہے کہ اس ملک کی فکری تقسیم مذہبی، فرقہ وارانہ، لسانی، علاقائی یا نسلی بنیادوں پر نہ ہو بلکہ یہاں کوئی تقسیم ہو سکتی ہے تو وہ ظالم اور مظلوم کی ہو سکتی ہے ۔ سماج کی اسی گہری فکر اور فلسفے کی بنیاد پر ضیا شاہد نے “جہاں ظلم، وہاں خبریں” کا نعرہ پیش کیا اور اپنی نصف صدی سے زیادہ صحافتی زندگی میں انہوں نے اس نعرے کو حقیقت ثابت کر کے دکھایا ۔ یہی وجہ ہے کہ جس جس علاقے میں خبریں کو اچھی ٹیم میسر آئی وہاں مظلوموں کا رش تھانوں سے زیادہ خبریں دفاتر میں ہوتا رہا ہے ۔ راقم الحروف نے ضیا شاہد کی سرپرستی میں 18 سال سے زیادہ گزارے ۔اور آخری 10 سال ان سے تقریباً روزانہ براہ راست رابطہ ہوتا اور ہدایات حاصل کرتا رہا ۔ میں مکمل دیانت داری سے کہ سکتا ہوں کہ ان کا دل مظلوموں کے ساتھ دھڑکتا تھا ۔ان کا حکم ریا کہ خبریں کے صفحات مظلوموں کے لئے وقف ہیں ۔اور جس دن اخبار میں طلم کی داستان نہ ہوتی وہ اس دن کے اخبار کو نامکمل قرار دیتے ۔ عموماً کہا جاتا ہے کہ صحافت کو غیر جانب دار ہونا چاہیے۔لیکن ضیا شاہد نے اپنی صحافت کو پہلے ہی دن سے جانبداری کی بنیاد پر استوار کیا۔ضیا شاہد نے اعلان کیا کہ میں معاشرے کے مظلوم طبقے کے ساتھ کھڑا ہوں،کھڑا رہوں گا۔ضیا شاہد نے ” جہاں ظلم، وہاں خبریں” کے نعرے سے درحقیقت نظریہ پاکستان پر اختلاف رکھنے والوں کو بھی دعوت فکر دی ہے کہ پاکستان میں کوئی مسلم،غیر مسلم نہیں بلکہ سارے پاکستانی ہیں۔البتہ معاشرتی تقسیم ایک ہی ہے اور وہ ظالم اور مظلوم کی ہے۔ اور میرے خیال میں ضیا شاہد کے دئیے گئے سماج کے اسی فلسفے میں پاکستان کی بقاء ہے ۔

اسلام آباد: (ویب ڈیسک) وزیراعظم شہبازشریف سے برطانوی ہائی کمشنر کرسچن ٹرنر نے ملاقات کی ہے، جہاں انہوں نے وزارت عظمیٰ کا عہدہ سنبھالنے پرمبارکباد پیش کی اور اور برطانوی حکومت کی نیک خواہشات کا اظہار کیا۔
شہبازشریف کا کا کہنا تھا کہ پاکستان اور برطانیہ کے درمیان تجارتی اور سرمایہ کاری کے تعلقات کو اسٹریٹجک سطح تک بڑھانے کی ضرورت ہے۔
وزیراعظم شہبازشریف نے کہا کہ پاکستان برطانیہ کے ساتھ اپنے تعلقات کو بہت اہمیت دیتا ہے۔ وزیراعظم نے برطانیہ کی جانب سے پاکستان میں تعلیم، صحت اور دیگر سماجی شعبوں کے فروغ کے لیے کئے گئے کام کو سراہا۔
برطانوی ہائی کمشنر نے دوطرفہ تعاون کو مزید گہرا اور وسیع کرنے کے لیے پاکستان کے ساتھ مل کر کام کرنے کی خواہش کا اظہار کیا۔
وزیر اعظم نے برطانوی وزیر اعظم بورس جانسن کے مبارکبادی ٹویٹ پر ان کا شکریہ ادا کیا۔