لاہور: (ویب ڈیسک) پاکستان تحریک انصاف کے رہنما اور سابق وفاقی وزیر اطلاعات فواد چودھری نے کہا ہے کہ جو حکومت بلدیاتی الیکشن نہیں کراسکتی وہ عام انتخابات کہاں کروائے گی؟۔
سماجی رابطے کی ویب سائٹ ٹوئٹر پر اپنے پیغام میں فواد چودھری نے لکھا کہ ملکی حالات کے پیش نظر انتخابات کروانے پڑیں گے، لمبی مدت کی نگران حکومت لانا بدترین غلطی ہوگی۔
سابق وفاقی وزیر اطلاعات نے مزید کہا کہ انتخابات مسئلے کا واحد حل ہیں، ملکی حالات کے پیش نظر انتخابات کروانے پڑیں گے۔

کراچی : (ویب ڈیسک) قمبر کے علاقے نصیر آباد میں سیلاب سے متاثرہ36 جوڑوں کی اجتماعی شادی کی تقریب کا انعقاد کیا گیا۔
ذرائع کے مطابق سیلاب متاثرہ جوڑوں کا تعلق گاجی کھاوڑ، نصیرآباد اور وارہ سے ہے جن کی شادی کی تقریب میں ان کے عزیز واقارب بھی شریک ہوئے ۔
سماجی تنظیم کی جانب سے دلہنوں کو ایک ایک لاکھ روپےکا جہیز بھی دیا گیا، شادی میں شریک افراد کی تواضع کیلئے کھانے کا بھی اہتمام کیا گیا ۔

راولپنڈی: (ویب ڈیسک) سربراہ عوامی مسلم لیگ و سابق وفاقی وزیر داخلہ شیخ رشید نے کہا ہے کہ سیاسی استحکام ہو گا تو معاشی ماہرین نتائج دے سکیں گے، سیاسی عدم استحکام میں سارے معاشی ارسطو ناکام ہوجائیں گے۔
سماجی رابطے کی ویب سائٹ ٹویٹر پر جاری ایک پیغام میں شیخ رشید نے کہا جو بلدیاتی انتخاب نہیں کروارہے وہ جنرل الیکشن خاک کروائیں گے، کارخانے بند ہو رہے ہیں، ڈالر کا حوالہ ریٹ 270 روپے ہو گیا ہے، 2 سالہ ٹیکنوکریٹ حکومت سیاسی گمشدگی کم نہ کرا سکے گی، الیکشن ہی واحد حل ہے۔
شیخ رشید نے مزید کہا وزیراعظم کو ڈیفالٹ کا مطلب نہیں معلوم تو غریب کے گھر جاکر دیکھیں، نئے سال کے پہلے 3 مہینوں میں 8.3 ارب ڈالر کی ری پیمنٹ کرنی ہے، معاشی، سیاسی، اقتصادی دہشتگردی ہی اصل مسئلہ ہے۔
ان کا کہنا تھا کہ 9 ماہ سے پی ڈی ایم بھیک مانگ رہی ہے، انہیں کوئی خیرات نہیں دے رہا، نہ انہیں پاکستان میں عزت مل رہی ہے نہ باہر سے عزت اور امداد مل رہی ہے۔

لاہور: (ویب ڈیسک) شہر میں بارش سے پھسلن، فوگ اور سموگ کے باعث مختلف حادثات میں 25 سے زائد افراد زخمی اور ایک شخص جاں بحق ہو گیا۔
ذرائع کے مطابق فیروز پور پر بارش سے پھسلن کے باعث مختلف حادثات پیش آئے ، حادثات کے نتیجے میں 25 سے زائد افراد زخمی ہو گئے، زخمیوں کو ریسکیو ٹیموں نے ابتدائی طبی امداد کے بعد جنرل ہسپتال منتقل کر دیا۔
ایک اور حادثے میں چلڈرن ہسپتال کے ڈاکٹر نعمان بھی جاں بحق ہو گئے ہیں، ان کی ڈیڈ باڈی کو جنرل ہسپتال منتقل کردیا گیا ہے۔
پرنسپل پروفیسر الفرید ظفر نے ایم ایس جنرل ہسپتال کو زخمیوں کے بہترین علاج فراہم کرنے کی ہدایت کی ہے۔

لاہور: (ویب ڈیسک) ترجمان وزیر اعلیٰ پنجاب اور سابق وزیر اطلاعات فیاض الحسن چوہان نے کہا ہے کہ عمران خان اور پی ٹی آئی کی مقبولیت کا جن پی ڈی ایم کو چین سے نہیں سونے دے رہا۔
ملک میں ٹیکنو کریٹ حکومت کے شوشے پر رد عمل دیتے ہوئے فیاض چوہان نے کہا کہ پی ڈی ایم نے عمران خان کی مقبولیت کے ڈر سے سندھ اور اسلام آباد کے بلدیاتی الیکشنز ملتوی کروائے، اب یہ لوگ قومی الیکشنز کروانے سے گریزاں ہیں اور فرار چاہتے ہیں۔
ترجمان وزیراعلیٰ کا کہنا تھا کہ اب پی ڈی ایم کی جانب سے ٹیکنوکریٹ حکومت کا شوشہ چھوڑا جا رہا ہے جس کی آئین میں گنجائش نہیں، عمران خان کو ملکی سیاست سے دور رکھنے کے لئے ایسی باتیں کی جا رہی ہیں۔
سابق وزیر نے مزید کہا کہ پوری پی ٹی آئی اس شوشے اور اختراع کی پر زور مذمت کرتی ہے، اگر ایسا ہوا تو اسکی بھرپور طریقے سے مزاحمت کریں گے۔

جہلم : (ویب ڈیسک) کالا گجراں کے علاقے میں گھر میں آگ لگنے سے لاکھوں روپے کا سامان جل کر خاکستر ہوگیا ۔
جہلم کے علاقے کالا گجراں میں گھرمیں آگ لگنے کا افسوس ناک واقعہ پیش آیا ہے ، آگ سے گھر میں موجود لاکھوں روپے مالیت کا سامان جل کرراکھ کا ڈھیر بن گیا ۔
واقعے کی اطلاع ملتے ہی ریسکیو ٹیمیں موقع پر پہنچ گئیں ، ریسکیو ٹیم نے بروقت پہنچ کر آگ پر قابو پا لیا۔
ریسکیو کے مطابق آگ گیزر کے شاٹ سرکٹ ہونے کی وجہ سے لگی ۔

اسلام آباد: (ویب ڈیسک) پاکستان تحریک انصاف کے اراکین اسمبلی کے استعفوں کے معاملہ پر پی ٹی آئی پارلیمانی وفد آج کچھ دیر میں سپیکر قومی اسمبلی سے ملاقات کرے گا۔
تفصیلات کے مطابق ارکان اسمبلی کے استعفوں کی تصدیق کی حکمت عملی طے کرنے کیلئے تحریک انصاف کا وفد آج سپیکر قومی اسمبلی راجہ پرویز اشرف سے ملاقات کرے گا، شاہ محمود قریشی، عامر ڈوگر، اسدعمر، فواد چوہدری وفد میں شامل ہوں گے۔
اسد قیصر، پرویز خٹک بھی پی ٹی آئی وفد میں شامل ہوں گے، پی ٹی آئی وفد سپیکر قومی اسمبلی سے اپنے ارکان کے استعفوں کی تصدیق کا لائحہ عمل طے کریں گے۔