بیجنگ: (ویب ڈیسک) چین میں انتہائی دھند کی وجہ سے صوبہ ہینان کے وسطی شہر زینگ زو میں ایک پل پر درجنوں گاڑیاں آپس میں ٹکرا گئیں۔
غیر ملکی خبر رساں ادارے کے مطابق حادثے میں ایک شخص کی موت ہوئی ہے۔ سوشل میڈیا پر سامنے آنے والی تصاویر اور ویڈیوز میں ژینگ ژن ہوانگجی پل پر کئی کاروں اور ٹرکوں کو ایک دوسرے کے اوپر دیکھا جا سکتا ہے۔
رپورٹ کے مطابق جائے حادثہ میں کئی لوگ زخمی ہوئے اور پھنس گئے ، جائے حادثہ پر موجود ریسکیورز کے ابتدائی اندازے کے مطابق پل پر لگے گاڑیوں کے ڈھیر میں 200 سے زائد گاڑیاں شامل تھیں۔
مقامی موسمیاتی سروس کے مطابق بدھ کی صبح ژینگ زو سمیت متعدد علاقوں میں حدِ نگاہ 500 میٹر اور کچھ علاقوں میں 200 میٹر سے بھی کم تھی۔

کویت سٹی: (ویب ڈیسک) کرہ ارض پر گرم ترین ممالک میں سے ایک کویت میں ژالہ باری ہوئی جس سے محظوظ ہونے کے لئے عوام گھروں سے باہر نکل آئے ۔
سوشل میڈیا پر موسم سرما کی ژالہ باری کی تصاویر وائرل ہو گئیں ، تصاویر میں دیکھا جا سکتا ہے کہ کویت کی جنوبی سڑکیں اولوں اور برف میں چھپ گئی ہیں۔
موسم کو انجوائے کرنے کیلئے لوگ گھروں سے باہر نکل آئے ، محکمہ موسمیات کے مطابق 63 ملی میٹر تک بارش ہو چکی ہے مگر موسم صاف ہے ۔
خیال ہے کہ سال 2016 میں کویت کا درجہ حرارت 54 ڈگری سینٹی گریڈ تک پہنچ گیا تھا۔
یاد رہے کہ سائنسدانوں نے پیشگوئی کی ہے کہ موسمیاتی تبدیلیوں کے باعث مستقبل میں یہاں کے حالات زندگی گزارنے کے قابل نہیں ہونگے ۔

منیلا : (ویب ڈیسک) فلپائن میں موسلا دھار بارشوں کے بعد سیلابی ریلوں کے نتیجے میں اموات 25 ہو گئی ہیں۔
غیر ملکی خبر رساں ادارے کے مطابق سیلابی ریلوں کی تباہی سے 6 افراد زخمی اور 26لاپتہ ہیں، ملک کے 18 اضلاع پر مشتمل کم از کم 6 علاقوں میں سیلابی ریلوں کی وجہ سے 45 ہزار 382 افراد کو محفوظ مقامات پر منتقل کر دیا گیا ہے۔
رپورٹس کے مطابق زیادہ تر اموات پانی میں ڈوبنے کے باعث ہوئی ہیں جبکہ بارش اور سیلاب سے متاثرہ علاقوں میں 26 سے زائد افراد لاپتہ بھی ہوئے ہیں جن کی تلاش ابھی جاری ہے۔

واشنگٹن: (ویب ڈیسک) امریکی صدر جو بائیڈن پہلی بیوی کے کار حادثے میں ہلاکت کے بعد جَل بائیڈن کی محبت میں گرفتار ہوئے اور ایک نہیں دو نہیں بلکہ 5 بار شادی کی پیشکش کی۔
امریکی نشریاتی ادارے کے مطابق صدر جوبائیڈن نے ایک انٹرویو میں اپنی نجی زندگی سے متعلق خوشگوار انکشافات کیے جو اس سے قبل منظر عام پر نہیں آسکے تھے۔
صدر جوبائیڈن سے جب صحافی نے پوچھا کہ کیا آپ پہلی نظر میں محبت ہوجانے پر یقین رکھتے ہیں تو انھوں نے برجستہ جواب دیا کہ ’’ہاں‘‘ اور میرے ساتھ زندگی میں ایسا دو مرتبہ ہوا ہے۔
امریکی صدر نے خاتون اوّل جل بائیڈن سے ملاقات، دوستی، عشق اور پھر شادی سے متعلق باتیں بھی کیں۔
جوبائیڈن نے بتایا کہ پہلی اہلیہ سے بھی محبت کی شادی کی تھی لیکن افسوس کہ وہ 1972 میں ایک ٹریفک حادثے میں ہلاک ہوگئیں۔
صدر جوبائیڈن نے مزید بتایا کہ میں تنہائی کا شکار اور کافی افسردہ رہتا تھا کہ جَل سے ملاقات ہوئی اور پہلی نظر میں ہی مجھے ان سے پیار ہوگیا اور میں نے ان سے شادی کا فیصلہ کرلیا لیکن یہ بات اُس وقت کہہ سکا۔
امریکی صدر نے یہ بھی بتایا کہ پہلی ملاقات سے ہماری شادی ہونے کے درمیان 4 بار پروپوز کیا لیکن یہ نہ مانی اور میں بھی ڈٹا رہا بالآخر پانچویں بار میں انھوں نے ہاں کہہ دیا۔
صدر جوبائیڈن نے مزید کہا کہ میرے بیٹوں نے بھی جَل سے شادی کے فیصلے کا نہ صرف خیرمقدم کیا بلکہ میری حوصلہ افزائی بھی کی تھی اور اسی وجہ سے میں 4 بار ناکامی کے باوجود پانچویں شادی کی پیشکش کی ہمت کرسکا تھا۔

واشنگٹن: (ویب ڈیسک) امریکا میں دنیا کی معروف ترین آبشار اور سیاحوں کے سب سے پسندیدہ مقام ’’نیاگرا فال‘‘ بھی ٹھٹھرتی سردی میں جمنا شروع ہوگئی۔
عالمی خبر رساں ادارے کے مطابق امریکا اور کینیڈا میں ایک ہفتے سے جاری برفباری میں قدرے کمی واقع ہوئی ہے لیکن نیاگرا آبشار جمنا شروع ہوگئی کچھ حصے تو مکمل طور پر منجمد ہوگئے۔
نیاگرا فال میں ہر سیکنڈ میں 3 ہزار 160 ٹن پانی 32 فٹ فی سیکنڈ کی رفتار سے گرتا ہے اور تین مقام سے آنا والا پانی آبشار بنتا ہے لیکن اب یہ مقام ونڈر لینڈ کا منظر پیش کر رہا ہے۔
نیاگرا فال جو اب ونڈر لینڈ کی طرح دکھائی دے رہی ہے کی تصاویر سوشل میڈیا پر وائرل ہوگئیں اور صارفین نے خوش گوار حیرت کا اظہار کیا۔
خیال رہے کہ رواں موسم سرما میں امریکا اور کینیڈا میں آنے والے برفانی طوفان نے تباہی مچادی ہے اور اب تک 60 سے زائد افراد ہلاک ہوچکے ہیں، لاکھوں شہری بجلی سے محروم ہوگئے اور معمولات زندگی ٹھپ ہیں۔