موگادیشو: (ویب ڈیسک) صومالیہ میں ملٹری بیس دہشتگردوں کے نشانے پر آ گئی جس میں بیس کمانڈر سمیت 7 اہلکار ہلاک ہوئے ہیں۔
بین الاقوامی میڈیا رپورٹ میں صومالیہ کے فوجی حکام کے حوالے سے بتایا گیا ہے کہ القائدہ سے منسلک دہشتگرد تنظیم الشباب نے ملٹری بیس کو نشانہ بنایا ہے، کالعدم تنظیم نے دارالحکومت موگادیشو سے 60 کلومیٹر دور ہوادلے میں قائم ملٹری بیس کو نشانہ بنایا۔
صومالین فوجی حکام کا کہنا ہے کہ دہشتگردوں کی جانب سے ملٹری بیس پر فائرنگ کے نتیجے میں بیس کمانڈر سمیت 7 فوجی اہلکار ہلاک ہوئے، دہشتگردوں نے فائرنگ سے قبل خودکش کار دھماکا بھی کیا، مزید برآں دہشتگرد تنظیم الشباب نے اپنے ایک بیان میں واقعے کی ذمہ داری قبول کر لی ہے۔

پیرس : (ویب ڈیسک) دنیا کی معمر ترین شخصیت اور سسٹر آندرے کے نام سے جانی جانے والی فرانسیسی راہبہ لوسائل رینڈن 118 سال کی عمر میں انتقال کر گئیں، گنیز ورلڈ ریکارڈز نے انکی عمر کے حوالے سے اپریل 2022 میں باضابطہ طور پر انکا نام ریکارڈ بک میں درج کیا۔
میڈیا رپورٹس کے مطابق سسٹر آندرے پہلی جنگ عظیم سے 10 برس قبل 11 فروری 1904 کو جنوبی فرانس میں پیدا ہوئی تھیں، انہوں نے پیرس میں گورننس کے طور پر کام کیا اور کیتھولک مذہب اختیار کیا اور 26 سال کی عمر میں بپتسمہ لیا، جس کے بعد انہیں وِچی کے ایک ہسپتال میں بھیج دیا گیا جہاں انہوں نے 31 سال تک کام کیا، بعد کی زندگی میں وہ بحیرہ روم کے ساحل کے ساتھ ٹولن چلی گئی تھیں۔
ترجمان نے سسٹر آندرے کی موت کی تصدیق کرتے ہوئے بتایا کہ ’’ وہ ٹولن میں اپنے نرسنگ ہوم میں سوتے ہوئے انتقال کر گئیں ‘‘، جبکہ سینٹ کیتھرین لیبر نرسنگ ہوم کی ٹیویلا نے بتایا کہ ’’ یہ بہت دکھ کی بات ہے لیکن یہ اس کی خواہش تھی کہ وہ اپنے پیارے بھائی کے ساتھ مل جائے، اس کے لیے یہ ایک آزادی ہے ‘‘۔
رینڈن اس سال پیدا ہوئیں جب نیویارک نے اپنا پہلا سب وے کھولا تھا، وہ ایک پروٹسٹنٹ خاندان میں تین بھائیوں میں اکلوتی بہن کے طور پر پلی بڑھی تھیں، رینڈن کی زندگی 2021 میں کورونا وائرس کا شکار ہونے کے باجود محفوظ رہی۔
انہوں نے اپنی 116 ویں سالگرہ کے موقع پر ایک انٹرویو میں بتایا تھا کہ ان کی سب سے پیاری یادوں میں سے ایک پہلی جنگ عظیم کے اختتام پر اپنے دو بھائیوں کی واپسی تھی، یہ شاذ و نادر ہی تھا ، خاندانوں میں عام طور پر دو زندہ ہونے کے بجائے دو مردہ ہوتے تھے لیکن میرے بھائی واپس آ گئے تھے۔
اگرچہ وہ نابینا تھیں اور وہیل چیئر پر انحصار کرتی تھیں لیکن وہ خود سے بہت چھوٹے دوسرے بزرگوں کی دیکھ بھال کرتی تھیں۔
انہوں نے گزشتہ سال صحافیوں کو بتایا تھا کہ ’’ لوگ کہتے ہیں کہ کام مار دیتا ہے، میرے لیے کام نے مجھے زندہ رکھا، میں 108 سال کی ہونے تک کام کرتی رہی، لوگوں کو ایک دوسرے کی مدد کرنی چاہیے اور نفرت کرنے کی بجائے ایک دوسرے سے محبت کرنی چاہیے، اگر ہم یہ سب شیئر کرتے تو حالات بہت بہتر ہوتے ہیں‘‘ ۔
کیتھولک راہبہ نے عمر جاننے کیلئے ڈی این اے کے نمونوں کی درخواستوں کو یہ کہتے ہوئے مسترد کر دیا تھا کہ اس کی لمبی عمر کا راز ’’ صرف اچھا رب ہی جانتا ہے ‘‘۔
لانگ ایویٹی ایکسپرٹ لارینٹ ٹوسینٹ نے بتایا کہ امکان ہے کہ فرانس کی نئی معمر ترین شخصیت اب 112 سالہ میری روز ٹیسیئر ہیں، جو وینڈی کی ایک خاتون ہیں، لیکن انہوں نے خبردار کیا کہ یہ ہمیشہ ممکن ہے کہ اس سے بھی زیادہ عمر کے شخص نے ابھی تک خود کو ظاہر نہ کیا ہو۔
یاد رہے کہ جین کالمنٹ جو 1997 میں ارلس جنوبی فرانس میں 122 سال کی عمر میں انتقال کر گئیں تھیں کسی بھی انسان کی جانب سے سب سے زیادہ عمر رسیدہ ہونے کا ریکارڈ رکھتی ہیں۔

لندن : (ویب ڈیسک) امریکی فوج کے چیئرمین جوائنٹ چیفس آف سٹاف جنرل مارک ملی نے یوکرین کے چیف ملٹری آفیسر جنرل ویلیری زلوزنی سے ملاقات کی ہے۔
غیر ملکی خبر رساں ادارے کے مطابق امریکی فوج کے جوائنٹ چیفس آف سٹاف کے چیئرمین جنرل مارک ملی نے یوکرین کی سرحد کے قریب جنوب مشرقی پولینڈ میں ایک نامعلوم مقام پر یوکرین کے چیف ملٹری آفیسر جنرل ویلیری زلوزنی سے چند گھنٹے تک ملاقات کی۔
دونوں رہنماؤں نے گزشتہ ایک سال کے دوران یوکرین کی فوجی ضروریات اور جنگ کی حالت کے بارے میں اکثر گفتگو کی ہے لیکن کبھی ملاقات نہیں ہوئی ۔
جنرل ملی کے ترجمان کے مطابق ہمیں امید تھی کہ کہ زلوزنی اس ہفتے نیٹو اور دیگر دفاعی سربراہوں کی میٹنگ کے لیے برسلز جائیں گے تاہم ایسا نہ ہونے کے باعث ملی اور زلوزنی نے فوری طور پر سرحد کے قریب پولینڈ میں ملنے کا فیصلہ کیا۔
انہوں نے کہا کہ یہ ملاقات ملی کو نیٹو سربراہان اجلاس کے دوران زلوزنی کے تحفظات اور دیگر فوجی رہنماؤں کو معلومات فراہم کرنے میں مددگار ثابت ہوگی۔
دوسری جانب یوکرین کے چیف ملٹری آفیسر زلوزنی نے کہا کہ انہوں نے منگل کو ملی کے ساتھ ملاقات کے دوران اپنی افواج کی ’’ فوری ضروریات ‘‘ کا خاکہ پیش کیا ہے۔
خیال رہے یہ ملاقات ایسے وقت میں ہوئی ہے جب بین الاقوامی برادری یوکرین کے لیے فوجی امداد میں اضافہ کر رہی ہے جس میں امریکا کی جانب سے یوکرین کے فوجیوں کی تربیت میں اضافہ اور پیٹریاٹ میزائل بیٹری، ٹینک اور امریکا اور یورپی اتحاد کی جانب سے فضائی دفاع اور دیگر ہتھیاروں کے نظام کی فراہمی شامل ہے۔

لندن : (ویب ڈیسک) نائیجیریا کے صدارتی امیدوار پیٹر اوبی نے وعدہ کیا ہے کہ اگر وہ اگلے ماہ منعقد ہونے والے انتخابات جیت جاتے ہیں تو افریقہ کی سب سے زیادہ آبادی والے ملک ( نائیجریا ) کو بدعنوانی اور وسیع پیمانے پر عدم تحفظ سے نجات دلائیں گے۔
غیر ملکی خبر رساں ادارے کے مطابق ملک کے اعلیٰ ترین عہدے کے حصول کیلئے کوشاں 18 امیدواروں میں سے ایک امیدار پیٹر اوبی نے پیر کو لندن میں چیتھم ہاؤس کے بین الاقوامی امور کے تھنک ٹینک میں ایک تقریر کے دوران اپنے ملک کو نئی سیاسی قیادت کی ضرورت کے لیے ’’ ایک ناکام ریاست ‘‘ قرار دیا۔
اس موقع پر اوبی نے کہا کہ وہ علیحدگی پسندوں کے ساتھ بات چیت کریں گے اور انہوں نے خاص طور پر شورش زدہ شمال میں جہاں گزشتہ سال مسلح گروہوں کے ہاتھوں ہزاروں لوگ مارے جا چکے ہیں سیکیورٹی اصلاحات کی ایک حد متعارف کرانے کا وعدہ کیا۔
انہوں نے کہا کہ جو آپ نے دیکھا ہے وہ سالوں میں قیادت کی ناکامی کا مجموعی اثر ہے، جسے اچھی حکمرانی سے حل کیا جائے گا ، جب لوگ انصاف، انصاف اور جامع حکومت دیکھنا شروع کر دیں گے تو وہ سب چیزیں الٹنا شروع ہو جائیں گی۔

نیویارک : (ویب ڈیسک) اقوام متحدہ نے شمالی برکینا فاسو میں مشتبہ عسکریت پسندوں کی جانب سے اغوا کی گئی 50 خواتین کی رہائی کا مطالبہ کیا ہے۔
رپورٹس کے مطابق شمالی برکینا فاسو میں گزشتہ ہفتے مشتبہ عسکریت پسندوں نے 50 خواتین کو اغوا کر لیا تھا۔
اقوام متحدہ کے انسانی حقوق کے سربراہ وولکر ترک نے خواتین کی رہائی کا مطالبہ کیا ہے، انہوں نے تمام مغوی خواتین کی فوری اور غیر مشروط ر ہائی اور حکام سےاس حوالے سے ایک موثر ، غیر جانبدارانہ اور آزادانہ تحقیقات کا مطالبہ کیا تاکہ ذمہ داروں کی نشاندہی کر کے ان کا محاسبہ کیا جا سکے ۔