لاہور: (ویب ڈیسک) وفاقی وزیر قانون اعظم نزیر تارڑ نے کہا ہے کہ آئین اور قانون گورنر کو مکمل اختیار دیتا ہے کہ وہ اعتماد کے ووٹ کا کہے، صدر اور گورنر اس معاملے میں کسی ایڈوائس کے پابند نہیں ہیں، پرویز الہیٰ آئینی نہیں عدالتی وزیر اعلیٰ ہیں۔
لاہور میں میڈیا سے گفتگو کرتے ہوئے وزیر قانون نے کہا کہ یہ اختیار مکمل طور ہر قومی اسمبلی میں صدر اور صوبائی اسمبلی میں گورنر کے پاس ہے، گورنر نے اپنا آئینی اختیار استعمال کیا، یہ دعویٰ کرتے ہیں کہ ہم اکثریت مین میں پھر بھاگ کیوں گیے، ووٹ کے ڈر سے بھاگ کر عدالت چلے گیے۔
اعظم نزیر تارڑ نے کہا کہ ’آپ اعتماد کا ووٹ لے کر پھر اسمبلی رکھنی ہے یا توڑنی ہے کر لیں، اگر 186 ووٹ پرویز الہی لیتے ہیں تو وہ آئینی وزیر اعلیٰ ہوں گے،  لیکن ابھی وہ عدالتی وزیر اعلیٰ ہیں، عدالت نے غیر ضروری بات کی ہے۔
انہوں نے مزید کہا کہ عدالتوں سے استدعا ہے کہ ایسے معاملات میں آئینی ہوتے ہیں انکے دور رس نتائج ہوتے ہیں، عدالتیں اس وقت مداخلت کرتی ہیں جب آئین کو توڑنے کی کوشش کی جائے۔

کراچی: (ویب ڈیسک) سابق صدر آصف علی زرداری نے کراچی ائیرپورٹ پر ہونے والے واقعہ کا سخت نوٹس لے لیا۔
آصف علی زرداری نے کہا کہ خاتون سکیورٹی انچارج کو فرائض کی ادائیگی سے روکنے کیلئے ان پر توہین مذہب کا الزام لگانے کی دھمکی شرمناک ہے، خاتون سکیورٹی انچارج پر توہین مذہب کے الزام کی تحقیقات کرائی جائیں۔
سابق صدر کا کہنا تھا کہ توہین مذہب کا الزام انتہائی خطرناک عمل ہے، وفاقی اور صوبائی حکومت خاتون سکیورٹی آفیسر کی حفاظت کے لیے اقدامات اٹھائے، کچھ عناصر مذہب کی آڑ میں پاکستان کو بدنام کرنا چاہتے ہیں۔
آصف علی زرداری نے کہا کہ حکومت اور عوام کو ایسی سوچ کی حوصلہ شکنی کرنا ہو گی، خاتون سکیورٹی آفیسر پر الزام غلط ثابت ہونے پر الزام لگانے والے کو سخت سزا دی جائے۔
واضح رہے کہ کراچی ائیرپورٹ کارگو کے ممنوعہ علاقے میں سول ایوی ایشن اتھارٹی (سی اے اے) کے شعبہ ویجیلینس کی انچارج ثمینہ مشتاق نے بغیر سٹیکر گاڑی کو پارکنگ سے روکا تو سی اے اے ملازم سلیم نے خاتون سکیورٹی انچارج کو دھمکیاں دیں اور جھگڑے کو مذہبی منافرت کا رنگ دینے کی کوشش کی۔
مذکورہ واقعہ جمعرات کو پیش آیا جہاں سی اے اے ملازم سلیم دوست کی بغیر پاس والی گاڑی پارک کرانا چاہتا تھا جس پر جھگڑا ہوا۔

اسلام آباد: (ویب ڈیسک) ہاؤسنگ فراڈ میں نیب راولپنڈی کی سب سے بڑی ریکوری متنازعہ ہو گئی، فلمساز لکی علی نے پلی بارگین میں دی گئی رقم سے ایک ارب 40 کروڑ منافع سمیت واپس مانگ لیے۔
فلمساز لکی علی کا کہنا تھا کہ میرے ذمے کل واجبات 50 کروڑ کے تھے، نیب نے بلیک میلنگ، دباؤ سے ایک ارب 95 کروڑ لیے، میاں وسیم عرف لکی علی نے ڈی جی نیب راولپنڈی ، چئیرمین نیب کو رقم کی واپسی کے لیے درخواست دے دی، ساتھ ہی عدالت سے بھی رجوع کر لیا۔
واضح رہے کہ نیب راولپنڈی نے لکی علی سے 2020ء میں ایک ارب 95 کروڑ روپے پلی بارگین میں وصول کیے تھے۔
لکی علی کا کہنا ہے کہ نیب نے ایک ارب 95 کروڑ میں سے صرف 45 کروڑ متاثرین کو دیئے، نیب کے پاس باقی ایک ارب 40 کروڑ کی رقم اپنے پاس رکھنے کا کوئی جواز نہیں، نیب تفتیشی نے 8517 متاثرین کی من گھڑت فہرست تیار کر کے واجبات کا تعین کیا تھا۔
دوسری جانب ذرائع کے مطابق نیب نے لکی علی کو رقم واپس کرنے سے انکار کر دیا اور کہا کہ دیگر متاثرین کو رقوم دی جائیں گی۔

اسلام آباد: (ویب ڈیسک) تر جمان پی ڈی ایم حافظ حمداللہ نے کہا ہے کہ لاہور ہائی کورٹ کی ہدایات کے مطابق چودھری پرویز الہٰی کو اعتماد کا ووٹ لینا ضروری ہے۔
اپنے ایک بیان میں حافظ حمد اللہ نے کہا کہ وزیر اعلیٰ پنجاب پرویز الہٰی کی بچاؤ مہم چودھری شجاعت کے راستے پی ڈی ایم میں ہے، ورنہ ہر صورت میں پرویز الہٰی کو جانا ہوگا، عنقریب ایک دن عمران خان قوم کو بے وقوف بنانے کیلئے کہیں گے پرویز الہٰی کو پنجاب کا وزیراعلیٰ بنانا میری غلطی تھی۔
انہوں نے کہا کہ عمران خان کے پی کے اسمبلی کیوں تحلیل نہیں کرتے؟، وہاں کسی قسم کی رکاوٹ نہیں، وہ نہ پارلیمنٹ جاتے ہیں نہ اسمبلی تحلیل کرتے ہیں نہ مستعفی ہوتے ہیں نہ مراعات چھوڑتے ہیں، ڈیمو کریٹ نہیں ہیپو کریٹ ہے، جھوٹ اور منافقت ان کی سیاست ہے۔
تر جمان پی ڈی ایم نے مزید کہا کہ عجیب ریاست مدینہ ہے جس میں پلے بوائے کو صادق و امین قرار دیا گیا، ریاست مدینہ کی قانون کے تحت عمران خان کو سزا ملنا چاہئیے تھی لیکن پاکستان میں اپنے پیاروں کیلئے ایک قانون اور غیروں کیلئے دوسرا قانون ہے۔
حافظ حمداللہ نے کہا کہ عمران خان وہ وقت گیا جب تم ڈنڈے ہتھوڑے اور ہتھکڑی کے سہارے ملک پر مسلط تھے، آپ کی حکومت تو ختم اب سیاست کے خاتمے کی باری ہے۔

لاہور: (ویب ڈیسک) چیئرمین پی ٹی آئی عمران خان سے خرم شیر زمان نے ملاقات کی جس میں پی ٹی آئی رہنما نے بلدیاتی انتخابات اور کراچی کی صورتحال سے آگاہ کیا، عمران خان نے انہیں بلدیاتی انتخابات کیلئے بھرپور تیاری کی ہدایت کر دی۔
ملاقات کے بعد میڈیا سے گفتگو کرتے ہوئے پی ٹی آئی کے رہنما خرم شیر زمان نے کہا کہ پیپلز پارٹی دیمک کی طرح سندھ کو کھا رہی ہے، صوبے میں عمران خان ہر گھر جائیں گے، پی ٹی آئی کو سندھ میں مضبوط بنانے کیلئے جدوجہد جاری رہے گی، گورنر ہائوس کو 90 میں تبدیل کر دیا گیا۔
پی ٹی آئی رہنما نے مزید کہا کہ الطاف حسین والا کردار کامران ٹیسوری کر رہے ہیں، پی ڈی ایم والے تحریک انصاف کے مینڈیٹ کو نقصان نہیں پہنچا سکتے، عمران خان کو عوام کے دلوں سے نہیں نکالا جا سکتا، الیکشن میں ہمیں کسی دو نمبر سیاسی جماعت کی ضرورت نہیں پڑے گی۔
انہوں نے کہا کہ کراچی میں بلدیاتی انتخابات ہم جیتیں گے اور میئر ہمارا ہو گا، پی ٹی ائی کے خوف سے ایم کیو ایم، پی پی الیکشن سے بھاگ رہے ہیں، ہم نے شہر کے حوالےسے اپنا منشور ہر آدمی تک پہنچایا، بلدیاتی الیکشن اہم ہیں، اختیارات کی نچلی سطح پر منتقلی سےعوام کو فائدہ ہو گا۔