لاہور: (ویب ڈیسک) وزیراعلیٰ پنجاب پرویز الہیٰ کے لیے اعتماد کے ووٹ سے متعلق ہونے والے اہم اجلاس میں پاکستان تحریک انصاف (پی ٹی آئی) نے پنجاب صوبائی اسمبلی سے اعتماد کے ووٹ کو عدالتی حکم سے مشروط قرار دیا اور ووٹ لینے کے بعد فوری اسمبلی تحلیل کردینے کا فیصلہ کیا گیا ہے۔
چیئرمین پی ٹی آئی عمران خان کی زیر صدارت اجلاس میں صوبائی وزرا، اسپیکر اور ڈپٹی اسپیکر سمیت دیگر نے اہم رہنماؤں نے شرکت کی اور پنجاب میں رونما ہونے والی سیاسی سرگرمیوں پر تبادلہ خیال کیا۔
ملاقات کی اندورنی کہانی سے متعلق ذرائع نے بتایا کہ پی ٹی آئی کی قیادت نے اعتماد کا ووٹ عدالتی فیصلے سے مشروط قرار دیا ہے اور فیصلہ کیا کہ عدالت نے ہدایت کی تو ہم اعتماد کا ووٹ لیں گے، ہمیں اعتماد کے ووٹ کیلیے تیاری کرنی ہے۔
علاوہ ازیں عمران خان نے وزرا کو اراکان صوبائی اسمبلی کے ساتھ مسلسل رابطے میں رہنے کی ہدایت کی جبکہ صوبائی وزرا نے چیئرمین پی ٹی آئی کو یقین دلایا کہ اعتماد کا ووٹ ہمارے کے لیے مسئلہ نہیں ہے۔
زرائع کے مطابق دوران اجلاس عمران خان نے ہر وزیر کو متعلقہ ڈویژن کی ذمہ داری سونپ دی اور وزرا کو ڈویژنل سطح پر اراکین سے رابطے میں رہنے کی ہدایت کی ہے۔
عمران خان نے کہا کہ اعتماد کا ووٹ لیتے ہی فوری اسمبلی تحلیل کردیں گے، ہم اسمبلی تحلیل کریں گے اس میں کوئی دو رائے نہیں ہے، اعتماد کے ووٹ کے بعد ہم عوام کے پاس جائیں گے، وزرا عام انتخابات کی تیاری کریں۔
انہوں نے اجلاس میں واضح کیا کہ امپورٹڈ ٹولے کو الیکشن سے راہ فرار اختیار نہیں کرنے دیں گے، اسلام آباد کے بعد کراچی بلدیاتی انتخابات سے بھی بھاگنے کی کوشش کررہا ہے، یہ جانتے ہیں عوام نے انہیں مسترد کردیا۔
سابق وزیراعطم نے کہا کہ ملکی مسائل کا واحد حل عام انتخابات ہیں، عوامی مینڈیٹ والی حکومت مسائل کو حل کرسکتی ہے۔

لاہور: (ویب ڈیسک) پی ٹی آئی کے رہنما اور سابق وفاقی وزیر اسد عمر نے کہا ہے کہ زر مبادلہ کے ذخائر خطرناک حد تک گر چکے ہیں اور ملک دیوالیہ ہونے کے دہانے پر کھڑا ہے۔
سماجی رابطے کی ویب سائٹ ٹویٹر پر جاری اپنے بیان میں سابق وفاقی وزیر نے کہا کہ زر مبادلہ کے ذخائر میں مزید کمی، 2000 کے بعد سب سے کم درآمدی کور ہے، درآمدی حکومت کی نااہلی اور لاپرواہی کی وجہ سے ذخائر کی موجودہ خطرناک حد تک کم سطح ہے۔
پی ٹی آئی رہنما اسد عمر نے مزید کہا کہ ہماری حکومت ختم کرنے کے بعد سے آج تک ذخائر 16.4 بلین ڈالر سے کم ہو کر صرف 4.5 ڈالر رہ گئے ہیں، یہاں کالی ویگو ڈالے سیاسی مخالفین پر دباؤ ڈالنے کیلئے بندے اٹھا رہے ہیں، ملک چلانے والوں کا کوئی حال نہیں۔

اسلام آباد: (ویب ڈیسک) پن بجلی کی پیداوار میں نوے فیصد کمی کے باعث بجلی کی لوڈشیڈنگ کا دورانیہ بڑھ گیا۔
ذرائع کے مطابق تربیلا ڈیم کے بجلی پیدا کرنے والے 15 یونٹ بند ہیں اور صرف 2 یونٹ بجلی پیدا کر رہے ہیں، تربیلا ڈیم سے اس وقت صرف 250 میگاواٹ بجلی پیدا کی جا رہی ہے جبکہ تربیلا ڈیم میں بجلی کی پیداوار کی صلاحیت 4 ہزار 9 سو 28 میگا واٹ ہے۔
بتایا گیا ہے کہ تربیلا چوتھا توسیعی منصوبہ بھی بند ہے، تربیلا کے چوتھے توسیعی منصوبے سے 1450 میگاواٹ بجلی پیدا نہیں ہو رہی، تربیلا ڈیم سے پانی کا اخراج پانچ ہزار کیوسک رہ گیا۔
ذرائع کا کہنا تھا کہ منگلا ڈیم سے بجلی کی پیداوار 200 میگاواٹ ہےجبکہ بجلی پیدا کرنے کی صلاحیت 1 ہزار میگا واٹ ہے، منگلا ڈیم میں صرف ایک یونٹ بجلی پیدا کر رہا ہے، منگلا ڈیم سے پانی کا اخراج 4 ہزار کیوسک ہے۔
پن بجلی کی کمی سے بجلی کا شارٹ فال 4 ہزار میگا واٹ تک پہنچ گیا، ملک بھر میں 6 گھنٹے تک بجلی کی لوڈ شیڈنگ ہو رہی ہے۔

کراچی: (ویب ڈیسک) شہر قائد میں تیزاب پھینکنے کے واقعہ میں ملوث 2 ملزمان کو پولیس نے زخمی حالت میں گرفتار کر لیا ہے۔
پولیس کے مطابق کورنگی انڈسٹریل ایریا میں پولیس مقابلہ ہوا جس میں تیزاب پھینکنے والے 2 ملزمان زخمی ہو گئے، پولیس نے دونوں ملزمان کو زخمی حالت میں گرفتار کر لیا، ملزمان نے پولیس پر فائرنگ کی تھی۔
خیال رہے کہ گزشتہ روز کراچی کے علاقے کورنگی سیکٹر 6 ایف میں تیزاب گردی کے واقعہ میں 2 لڑکیاں زخمی ہوئی تھیں، پولیس نے لڑکیوں کے بھائی کی مدعیت میں مقدمہ درج کر لیا تھا۔
واقعہ سے متعلق متاثرہ لڑکیوں کے والد نے بتایا تھا کہ عامر نامی لڑکے نے ایک بیٹی کا رشتہ مانگا تھا، انکار پر کارروائی کی، تیزاب سے دونوں بیٹیوں کے چہرے متاثر ہوئے ہیں۔