اسلام آباد : (ویب ڈیسک) اینٹی نارکوٹکس فورس ( اے این ایف) نے اسلام آباد موٹر وے ٹول پلازہ پر کار سے 10 کلو 500 گرام ہیروئن برآمدکرکے 2 ملزمان گرفتار کرلیے ۔
اے این ایف ہیڈکوارٹر راولپنڈی سے جاری بیان کے مطابق اے این ایف کا منشیات کے خلاف کارروائیوں کا سلسلہ جاری ہے ، اسلام آباد موٹر وے ٹول پلازہ پر برآمد کی گئی ہیروئن کار کے خفیہ خانوں میں مہارت سے چھپائی گئی تھی ۔
دریں اثناء جہلم جی ٹی روڈ کے قریب جہلم کے رہائشی ملزم سے 39 کلو پوست برآمد کی گئی ۔ انٹرنیشنل کوریئر آفس کامرہ میں لندن بھیجے جانیوالے پارسل سے مجموعی طور پر 438 گرام ہیروئین برآمدکی گئی ۔
برآمدشدہ ہیروئن مہارت سے خواتین کے کپڑوں میں چھپائی گئی تھی ، ملزمان کے خلاف انسدادِ منشیات ایکٹ کے تحت مقدمات درج کر کے تفتیش شروع کردی ہے ۔

لاہور : (ویب ڈیسک) موجودہ حالات کے پیش نظر آئی جی پنجاب کی ہدایت پر سی ٹی ڈی نے کومبنگ آپریشن تیز کردیے ۔
سی ٹی ڈی حکام کے مطابق پنجاب کے اضلاع لیہ ، فیصل آباد ، لاہور،اوکاڑہ سے 12 مشتبہ افراد گرفتارکر کے ان کیخلاف مقدمات درج کر لیے گئے ۔
حکام کے مطابق 39 کومبنگ آپریشنز کے دوران 677 افراد کی بائیو میٹرک تصدیق کی گئی جبکہ 2417 مشتبہ افراد سے پوچھ گچھ میں 12 افراد کی گرفتاری عمل میں لائی گئی ۔
اس حوالے سے سی ٹی ڈی حکام کا کہنا ہے کہ کومبنگ آپریشن دہشت گردی کی نئی لہر کے تناظر میں جاری رہیں گے ، شرپسند عناصر کی سرکوبی کے لیے تمام وسائل بروئے کار لائے جارہے ہیں۔

اسلام آباد: (ویب ڈیسک) پاکستان مسلم لیگ (ن) کے سینئر رہنما اور وفاقی وزیر برائے منصوبہ بندی و ترقی احسن اقبال نے کہا ہے کہ عمران خان اسمبلی آکر الیکشن کے حوالے سے اتفاق رائے پیدا کریں۔
اپنے ایک بیان میں لیگی رہنما احسن اقبال نے کہا کہ ہمارا ایجنڈا معیشت کو دوبارہ مستحکم کرنا ہے، ہمارا ایجنڈا ملک میں امن بحال کرنا ہے، کوئی اس بحالی کے اور ترقی کے سفرمیں حصہ ڈالنا چاہتا ہے تو خیرمقدم کریں گے۔
انہوں نے کہا کہ پاکستان کو تصادم نہیں اتحاد کی ضرورت ہے، عمران خان اسمبلی آکر الیکشن کے حوالے سے اتفاق رائے پیدا کریں، الیکشن اپنے وقت پر ہوں گے۔
وفاقی وزیر کا کہنا تھا کہ پی ٹی آئی کی قیادت صبح و شام ڈیفالٹ کی باتیں کر رہی ہے، یہ پانی پھینکنے کی بجائے پٹرول پھینک رہے ہیں، تحریک انصاف والے اپنی زبان بند رکھیں گے تو بہتر ہوگا، عالمی کمیونٹی پاکستان سے یکجہتی کا اظہارکر رہی ہے۔
احسن اقبال کا مزید کہنا تھا کہ عمران خان اپنے آخری سال میں مصنوعی طور پر پٹرول کی قیمتوں کو کم کر گئے تھے، اگر ہم آئی ایم ایف معاہدے پرعمل نہ کرتے تو ملک کے ڈیفالٹ کا خطرہ تھا، ملک میں مہنگائی کی ذمہ دار تحریک انصاف ہے۔

اسلام آباد: (ویب ڈیسک) رہنما پاکستان پیپلز پارٹی (پی پی پی) اور وفاقی وزیر برائے ماحولیاتی تبدیلی شیری رحمان نے کہا ہے کہ ‏گزشتہ 76 سالوں سے مقبوضہ کشمیر میں بھارت کی ریاستی دہشت گردی اور ظلم جاری ہے۔
سماجی رابطے کی ویب سائٹ ٹوئٹر پر جاری پیغام میں سینیٹر شیری رحمان نے کہا کہ ‏دنیا بھر میں کشمیری عالمی دنیا کی توجہ مبذول کروانے کے لئے ہر سال 5 جنوری کے دن یومِ حق خودارادیت مناتے ہیں۔
انہوں نے کہا کہ اقوام متحدہ کی 5 جنوری 1949ء کی قرارداد کے مطابق بھارت پر لازم ہے کہ کشمیریوں کو اپنے مستقبل کے باری میں فیصلہ کرنے کا حق دے، لیکن 74 سالوں سے اس قرارداد پر عمل نہیں ہوا
ان کا مزید کہنا تھا کہ مقبوضہ کشمیر میں ہر روز رپورٹ ہونے والی انسانی حقوق کی خلاف ورزیوں پر عالمی دنیا نے خاموشی اختیار کی ہوئی ہے، مقبوضہ کشمیر کے معاملے پر عالمی دنیا کی خاموشی اور بے بسی قابل مذمت اور افسوسناک ہے۔

لاہور: (ویب ڈیسک) چیئرمین پی ٹی آئی عمران خان سے پنجاب اسمبلی کے آزاد حیثیت میں منتخب ہونے والے ایم پی اے بلال وڑائچ نے ملاقات کی، اس موقع پر ایم پی اے نے تحریک انصاف کے وژن کی تائید کرتے ہوئے وزیراعلیٰ چودھری پرویز الہٰی کو ووٹ دینے کا اعلان کر دیا۔
ملاقات کے موقع پر تحریک انصاف کے سینئر رہنما فواد چودھری، میاں اسلم اقبال سمیت دیگر بھی موجود تھے۔ فواد چودھری نے بلال وڑائچ کی جانب سے چودھری پرویز الہٰی کو اعتماد کا ووٹ دینے کی تصدیق کرتے ہوئے کہا کہ آزاد ایم پی اے حمزہ شہباز کے کیمپ میں موجود تھے اور اس سے قبل انکو ووٹ دیا تھا۔
فواد چودھری نے مزید کہا کہ بلال وڑائچ نے عمران خان سے ملاقات کے بعد تحریک انصاف کے وژن پر مکمل اعتماد کا اظہار کیا اور وڑائچ فیملی بہت جلد تحریک انصاف میں باقاعدہ شمولیت اختیار کر رہی ہے ان کے آنے سے پنجاب اسمبلی میں ہمارا مزید 1 ووٹ بڑھ گیا ہے۔
ملاقات کے دوران ایم پی اے بلال وڑائچ نے تحریک انصاف کے نظریے پر عمل پیرا ہونے کا عزم کرتے ہوئے کہا کہ میرے لئے خوش آئند بات ہے کہ پی ٹی آئی میں شامل ہو رہا ہوں، انشااللہ عمران خان کے وژن کے مطابق سیاست کریں گے، تحریک انصاف کی تمام قیادت کا خوش آمدید کہنے پر تہہ دل سے شکر گزار ہوں۔

اسلام آباد: (ویب ڈیسک) وفاقی وزیر داخلہ رانا ثناء اللہ نے کہا ہے کہ عمران خان دو نمبر آدمی ہیں، فائر اسے نہیں لگا، اگر صیح فائر لگا ہو تو دو ہفتے تک بندہ ہل نہیں سکتا، پچھلے ڈیڑھ ماہ سے عمران خان ڈرامہ کر رہا ہے.
اسلام آباد میں وزیر مذہبی امور مفتی عبد الشکور کے ساتھ پریس کانفرنس کرتے ہوئے وفاقی وزیر داخلہ رانا ثنا اللہ نے کہا کہ عمران خان کو ٹانگ پر فائر لگا ہوتا تو پھر فریکچر نہیں ہوا یہ عجیب بات ہے اگر فائر بھی لگتا تو دو ہفتوں میں وہ بہتر ہو چکا ہوتا مگر وہ آج بھی کہتا ہے ڈیڑھ ماہ مزید وقت چاہیئے، ایک جے آئی ٹی بنائی ہے جس کی سربراہی غلام محمد ڈوگر کر رہے ہیں کسی کو علم نہیں ہوا نہ رپورٹ عدالت میں پیش ہوئی اور فواد چودھری کو مل گئی۔
انہوں نے کہا ملزم نوید بشیر کے سوا اس میں کوئی اور ملوث نہیں ہے، اس نے جو بیان دیا وہ 100 فیصد درست ہے اس میں وہ کوئی دوسرا یا تیسرا ملزم نہیں ڈال سکتے کیونکہ وہ مذہبی طور پر متاثر تھا، توشہ خانہ پورا بیچ دیا اور دوسری طرف چور چور کا شور مچا رہا تھا، حدیث ہے کہ جس کام سے دوسروں کو منع کرو اور خود کرو وہ بد بخت ہے، القادر ٹرسٹ کے نام جو پراپرٹی لگی ہے اس کی چھ ارب مالیت ہے۔
وزیر داخلہ نے مزید کہا کہ ہر مسلک کا اپنا نکتہ نظر ہے اس کا احترام کرتے ہیں، علمی اختلاف حدیث کی رو سے باعث رحمت ہے ہر وہ پاکستانی جو کسی بھی وجہ سے ماورائے آئین شکار ہوا وہ قانونی عمل سے گزرے وہ ریاست کو یقین دہانی کرائے وہ قانون اور آئین کو تسلیم کرے کسی بھی ایسی تنظیم سے جو عوام کے خلاف یا ریاست کے خلاف دہشت گردی کیلئے استعمال ہو وہ ناقابل قبول ہے۔
رانا ثناء اللہ نے کہا کہ قومی سلامتی کمیٹی نے واضح کردیا ہے کہ کسی دہشت گرد تنظیم سے مذاکرات نہیں ہوں گے، افغانستان میں ایک عبوری حکومت ہے اس سے بھی اس معاملے پر بات کی جائے گی، طالبان نے پاکستان سمیت پوری دنیا سے وعدہ کیا ہے کہ وہ اپنی سر زمین کو دہشت گردی کیلئے استعمال نہیں ہونے دیں گے وہ اس پر عمل کریں اگر اس معاہدے پر افغانستان عمل کرے تو پاکستان سمیت دنیا میں امن قائم ہو جائے گا۔
اس موقع پر وزیر داخلہ رانا ثناء اللہ نے مزید کہا کہ قرآن پاک کا مستند نسخہ ہر سطح پر حوالہ کے طور پر استعمال کیا جائےگا، وزارت مذہبی امورعربی اورترجمے کےساتھ مستند نسخہ کی اشاعت کرے گی، قرآن پاک کی حفاظت اللہ تعالیٰ نے اپنے ذمہ لی ہے، وزیر مذہبی امور مفتی عبد الشکور نے کہا کہ عدالتی فیصلے کو عملی جامہ پہنانا ہم سب کی ذمہ داری ہے، قرآن پاک کی اشاعت بہت ہی حساس معاملہ ہے، قرآن پاک کی حفاظت ہمارا دینی فریضہ بھی ہے۔

لاہور: (ویب ڈیسک) لاہور اور اسکے گردونواح میں دھند کے باعث حد نگاہ صفر ہوگئی جس کے باعث موٹرویز کو ٹریفک کےلئے بند کردیا گیا۔
ترجمان موٹر وے پولیس کے مطابق لاہور سیالکوٹ موٹروے ایم 11 کو شدید دُھند کے باعث مکمل بند کردیا گیا جبکہ لاہور اسلام آباد موٹروے ایم 2 لاہور سے کوٹ سرور تک بند کی گئی ہے۔
ترجمان موٹروے نے مسافرین کو ہدایات کیں کہ غیر ضروری سفر سے گریزاور آگے اور پیچھے دھند والی لائٹس کا استعمال کر یں جبکہ تیز رفتاری سے پرہیز اور اگلی گاڑی سے مناسب فاصلہ رکھیں۔
ترجمان کا کہنا تھا کہ موٹر وے پر سفر کرنے والے حضرات معلومات اور مدد کے لیے ہیلپ لائن 130 سے رابطہ کر یں جبکہ موٹروے پولیس ہمسفر ایپ سے بھی معلومات لی جاسکتی ہیں۔
ترجمان نے مزید کہا کہ موٹرویز کو عوام کی حفاظت اور محفوظ سفر یقینی بنانے کے لیے بند کیا جاتا ہے۔