کراچی: (ویب ڈیسک) کراچی میں بلدیاتی انتخابات کے مسئلے پر ایم کیو ایم اور جماعت اسلامی کے رہنماؤں کے درمیان ملاقات ہوئی جس میں حلقہ بندیوں کے معاملے پر تفصیلی گفتگو کی گئی۔
ملاقات کے بعد ایم کیو ایم کے سربراہ خالد مقبول صدیقی نے میڈیا سے گفتگو کرتے ہوئے کہا کہ ملاقات کا موقع دینے پر جماعت اسلامی کی قیادت کا شکر گزار ہوں، ہم بڑے سنجیدہ مسئلے پر یہاں آئے ہیں، دونوں جماعتیں سمجھتی ہیں بنیادی جمہوریت کے بغیر جمہوریت ادھوری ہے۔
ایم کیو ایم کے سربراہ خالد مقبول صدیقی نے مزید کہا کہ کراچی میں بلدیاتی انتخابات ہونے جا رہے ہیں، جو ووٹر لسٹ بنی اس میں ابہام ہے، سب سے بڑا ہاتھ حلقہ بندیوں کے معاملے پر دکھایا گیا، اعدادو شمار ثابت کرتے ہیں کہ بلدیاتی الیکشن میں پہلے ہی دھاندلی ہوچکی۔
انہوں نے کہا کراچی میں ایسی یوسیز بھی ہیں جو 20،20 ہزار لوگوں پر ہیں، عدالتی احکامات پر بلدیاتی انتخابات ہونے ہیں، پاکستان کی موروثی سیاست بنیادی جمہوریت کو اپنے لیے خطرہ سمجھتے ہیں۔
اس موقع پر جماعت اسلامی کے رہنما حافظ نعیم الرحمان نے کہا کہ ہمارا نقطہ نظر ہے کراچی شہر اپنا میئر اور کونسلر چاہتا ہے، بلدیاتی انتخابات کے حوالےسے ہمارا نقطہ نظر واضح ہے، 2018 میں غیر منظور شدہ مردم شماری پر انتخاب ہو گیا، مردم شماری میں بھی کراچی سے ہمیشہ زیادتی ہوتی ہے۔
جماعت اسلامی کے رہنما نے کہا ہر بار ہمارا فوکس ہوتا ہے کہ انتخابات ضرور ہونے چاہئیں، ایوب خان زمانے میں مارشل لاء کیخلاف بھرپور جدوجہد کی تھی، خواہش ہوتی ہے جمہوری عمل جماعتوں، ملک میں ہو، جماعت اسلامی میں ہر سطح پر انتخاب ہوتا ہے، جہاں دولت اور طاقت کا استعمال ہوتا ہو وہاں یہ ممکن نہیں۔
حافظ نعیم الرحمان نے مزید کہا کہ پاکستانی عوام کو لیول پلیئنگ فیلڈ حاصل نہیں ہے، 2013 میں بلدیاتی ایکٹ آیا ایم کیوایم 2015 تک ان کے ساتھ رہی، اس وقت پیپلز پارٹی کی وفاق اور صوبے میں حکومت بنی تھی، ہمار تجربہ ہے کہ 2009 سے 2015 تک بلدیاتی انتخاب نہیں ہوا۔

اسلام آباد: (ویب ڈیسک) وفاقی وزیر منصوبہ بندی ، ترقی و اصلاحات و خصوصی اقدامات احسن اقبال نے کہا ہے کہ مشکل حالات میں معیشت کو آگے لے کر جا رہے ہیں، ملک کو بحرانوں سے نکالنے کیلئے سب کو مل کر کام کرنا ہوگا۔
وفاقی وزیر کا وزارت منصوبہ بندی و ترقی کے بہتر کارکردگی والے ملازمین کو تقسیم اسناد دینے کی تقریب سے خطاب میں کہنا تھا کہ ہمیں توانائی بچت پالیسی پر عمل کرتے ہوئے غیر ضروری اخراجات کو روکنا ہو گا، 2013ء میں حکومت سنبھالی تو بہت سے چیلنجز کا سامنا تھا، 2013 میں بجلی کی لوڈشیڈنگ عروج پر تھی۔
احسن اقبال نے کہا ہے کہ گزشتہ حکومت نےفنڈز جاری کرنے سےانکار کر دیا تھا جس کی وجہ سے منصوبے مکمل نہیں ہوئے اور لاگت میں اضافہ ہوا، ملازمین کو بہتر کارکردگی پر ایوارڈ دینے کا مقصد ان کی کارکردگی کو تسلیم کرنا ہے، کسی بھی کامیاب نظام کو چلانے کے لئے سزا اور جزا ضروری ہے، بہتر کارکردگی والے ملازمین کی حوصلہ افزائی ضروری ہے۔
وفاقی وزیر نے کہا کہ ملازمین کو بہتر کارکردگی پر ایوارڈ دینے کا مقصد ان کی کارکردگی کو تسلیم کرنا ہے، کسی بھی کامیاب نظام کو چلانے کے لئے سزا اور جزا ضروری ہے، 18-2017 میں سوچتے تھے کون سا نیا منصوبہ شروع کیا جائے، آج سوچتے ہیں کون سے منصوبے کے فنڈ کاٹیں۔
احسن اقبال نے کہا کہ 4 سال بعد ہمیں بحران کا شکار معیشت ورثے ملی، 75 سال میں کبھی ایسا نہیں ہوا کہ آخری سہ ماہی میں ترقیاتی بجٹ جاری کرنے کو پیسے نہ ہوں، 2018ء کے مقابلے میں ترقیاتی بجٹ ڈبل ہونے کے بجائے آدھا رہ گیا ہے، سب کو محنت کر کے پاکستان کو آگے لے جانا ہے۔
وفاقی وزیر نے کہا کہ پاکستان کی قوم میں بہت صلاحیت ہے، محنت کی جائے تو دو سال میں پاکستان کو ٹرن اراؤنڈ کرسکتے ہیں، اس وقت کوئی دشمن بھی پاکستان کے دیوالیہ ہونے کی بات نہیں کر رہا لیکن اندر سے یہ باتیں ہو رہی ہیں، مالی بحران میں وسائل کے ضیاع کو بھی روکنا ہے، توانائی کی بچت کے حوالے سے بجلی کے غیر ضروری استعمال اور پٹرول کی کھپت پر قابو پانا ہوگا۔
وفاقی وزیر نے کہا کہ تمام کیڈرز کے کل 21 افسروں کو شاندار کارکردگی پر تعریفی اسناد سے نوازا گیا جس میں کیش انعام بھی شامل ہیں، انہوں نے ملازمین پر زور دیا کہ وہ اپنی کارکردگی اور پیداواری صلاحیت میں اضافہ کریں اور اپنے کام کو ایک مشن کے طور پر لیکر چلیں جبکہ اپنے اوقات کار کو بوجھ کے طور پر نہ دیکھیں۔

کوئٹہ: (ویب ڈیسک) وزیراعظم شہباز شریف نے کہا ہے کہ مہنگائی عروج پر ہے اس میں کوئی شک نہیں۔
وزیراعظم شہباز شریف نے بلوچستان کے شہر صحبت پور میں عمائدین سے خطاب کرتے ہوئے کہا کہ انتہائی مخدوش حالات میں ہم نے حکومت سنبھالی، آئی ایم ایف سے معاہدہ ٹوٹ چکا تھا، مہنگائی عروج پر ہے اس میں کوئی شک نہیں، پاکستان کو پاؤں پر کھڑا کرنے کے لیے ہمیں خود ہمت پیدا کرنی ہوگی۔
انہوں نے کہا کہ وفاق نے سیلاب متاثرین کے لیے 100 ارب روپے خرچ کیے اور اب بھی ان کے لیے کئی سو ارب روپے درکار ہیں۔
ان کا کہنا تھا کہ 9 جنوری کو سیکرٹری جنرل اقوام متحدہ کے ساتھ جنیوا میں ڈونرز کانفرنس کروں گا، اسی سلسلے میں برادر ممالک کو کانفرنس میں شرکت کی دعوت دی ہے۔
شہباز شریف کا کہنا تھا کہ پاکستان اس لیے وجود میں آیا تھا کہ سب کو برابر کے حقوق ملیں گے، سب اپنی محنت کے بل بوتے پر معاشرے میں اپنا مقام حاصل کریں گے لیکن آج ایسا نہیں ہے، آج جس کی لاٹھی اس کی بھینس ہے۔

کراچی: (ویب ڈیسک) کسٹمز انٹیلی جنس کی کارروائیاں ، ساڑھے 5کروڑ روپے مالیت کی اسمگل شدہ چھالیہ اوردیگر سامان برآمد کرلیا ۔
ترجمان کسٹمز کے مطابق کراچی ناردرن بائی پاس پر کسٹمز انٹیلی جنس نے اسمگل شدہ چھالیہ کا ڈمپر ضبط کرتے ہوئے ایک ملزم کو گرفتار کرلیا گیا ۔
ترجمان کسٹمز کا بتانا ہے کہ اسمگل شدہ چھالیہ کو ڈمپر میں پتھروں کے نیچے چھپایا گیا تھا، کارروائی کے دوران کسٹمز کے عملہ کو سخت مزاحمت کا سامنا بھی کرنا پڑا۔
ترجمان کے مطابق کسٹمز نے دوسری کارروائی میں ڈھائی کروڑ روپے مالیت کی4نان کسٹم پیڈ گاڑیاں ضبط کرلیں ۔