پشاور: پاکستان تحریک انصاف کے منحرف رہنما اور پبلک اکاؤنٹس کمیٹی کے چیئرمین نور عالم خان نے جمعیت علما اسلام میں شمولیت کا اعلان کردیا۔

پشاور میں سابق رکن قومی اسمبلی نورعالم خان نے جمیعت علماء اسلام کے صوبائی امیر سینیٹر عطا الرحمان کے ساتھ پریس کانفرنس میں شمولیت کا اعلان کیا۔

نور عالم خان نے مولانا فضل الرحمان کی قیادت پر اعتماد کا اظہار کرتے ہوئے کہا کہ ’مولانا کی قائدانہ صلاحیتوں پر اعتماد ہے، تاخیرہوگئی ورنہ پہلے ہی جے یو آئی میں آجاتا‘۔ انہوں نے کہا کہ 9 مئی کے واقعات قابل شرم ہیں، احتجاج کااپنا طریقہ ہوتاہے, میں نے پہلے ہی سال سے مخالفت کی کیونکہ ان کی سوچ ٹھیک نہیں تھی۔

انہوں نے کہا کہ لاڈلے کی بات ہوتی ہے کیونکہ جیل میں اسے سہولیات اور دیسی مرغے ملتے ہیں، چیف جسٹس اس صورت حال کانوٹس لیں۔ نور عالم خان نے کہا کہ ’ میں جس پارٹی کے  بھی ساتھ ہوں لیکن ہم غلام نہیں کہ پاکستان کی سالمیت کے خلاف کام کروں گا، احتجاج سب کرتے ہیں لیکن اداروں پرحملے نہیں کیے جاتے، غلط لوگوں سے راستہ بدلاجائے توغلط نہیں ہے۔

مولانا عطا الرحمان نے کہا کہ ہم نورعالم خان کو جے یو آئی میں شمولیت پرمبارکباد پیش کرتے ہیں، امیدہے کہ اس بار انتخابات میں دھاندلی نہیں ہوگی اور جے یو آئی کا اقتدار میں آنے کا راستہ کوئی نہیں روکے گا، خیبرپختونخوا میں آنے والا دور جمیعت علما اسلام کا ہی ہے۔

پاکستان مسلم لیگ ن کی مرکزی ترجمان مریم اورنگزیب نے سپریم کورٹ سے عمران خان کی ضمانت منظوری پر کہا ہے کہ جب مرضی معصوم جب مرضی لاڈلا بنادو عوام بھیڑ بکریاں ہیں۔

پارٹی سیکرٹریٹ ماڈل ٹاؤن لاہور میں پریس کانفرنس کرتے ہوئے انہوں نے کہا کہ عدم اعتماد تحریک پر نااہل نے جیب سے کاغذ نکالا اور کہا امریکا نے سازش کی، سائفر کو لہرا کر کہا امریکا نے حکومت کے خلاف سازش کی جو چلتے چلتے باجوہ پھر محسن نقوی اور پھر شہباز شریف تک چلی گئی۔

مریم اورنگزیب نے کہا کہ عدم اعتماد کی تحریک آئی تو آئین و قومی اسمبلی توڑی، انفارمیشن منسٹر اسپیکر و ڈپٹی اسپیکر سے اسمبلی تڑوائی کیا یہ معصوم شخص ہے؟ سپریم کورٹ کا فیصلہ آیا کہ آئین توڑا گیا عدم اعتماد آئین میں درج ہے سازش نہیں، سیکریسی ایکٹ کو معصوم آدمی نے توڑا سائفر سے کھیلنے کی ہدایت بطور وزیراعظم دے کر آیا تھا۔

انہوں نے کہا کہ الیکشن کمیشن کو دھمکی دو، عدالت بلائے تو زیبا جج کو دھمکی دو، نو مئی کو شہدا کو رینجرز و پولیس کی گاڑیاں جلاؤ، زمان پارک میں پیٹرول بم کی ٹریننگ دی، تم معصوم ہو؟ تم جناح ہاؤس جلا دو میٹرو جلا دو، معصوم کو گڈ ٹو سی یو کہا جاتا ہے، سپریم کورٹ میں گاڑی میں بٹھاکر واپس بھیج دیا جاتا ہے۔

انہوں نے کہا کہ سیاسی دہشت گرد کو معصوم کا لقب دیا جا رہا ہے، ملک کے ساتھ غداری کا آپ کو جواب دینا پڑے گا، پہلے کہتے تھے نااہل ہے، سائفر کا ڈرامہ آیا تو کہا معصوم ہے اسمبلی توڑ دو، جب مرضی معصوم بنا دو جب مرضی لاڈلا بنا دو عوام بھیڑ بکریاں ہیں۔

ترجمان ن لیگ نے کہا کہ اسے اب معصوم کہہ کر مسلط کیا جا رہا ہے اب یہ نہیں چلے گا، اگر نوازشریف جھوٹے مقدمات پر عدالت میں پیش ہوسکتے ہیں تو تم سچے کیسز میں کیوں نہیں جاسکتے؟ عوام دیکھ رہے ہیں یہ سلسلہ بند ہونا چاہیے، جیل میں سنگین الزامات و تحقیقات جاری ہیں اسے اپنا جواب دینا پڑے گا۔