سابق وزیرداخلہ چوہدری نثارعلی خان کا کہنا ہے کہ مسلم لیگ سے تعلق رہا مگرتنقید نہیں کرونگا کیونکہ می کسی پارٹی کی دُم پکڑ کر نہیں جیتنا چاہتا۔
راجڑ میں انتخابی جلسے سے خطاب کرتے ہوئے چوہدری ںثار نے کہا کہ علاقے کا ماضی میں وزیر نہیں بلکہ علاقے کا ویربن کر آیا، میرے مخالفین منتیں کرکے لوگوں کو جلسے میں لاتے ہیں لیکن میں کسی پارٹی کی دُم پکڑ کر نہیں جیتنا چاہتا۔
انہوں نے کہا کہ کبھی خود پر داغ نہیں لگنے دیا نہ کرپشن کی، کسی پرتنقید کر کے ووٹ نہیں لینا چاہتا، مسلم لیگ سے میرا تعلق رہا مگر تنقید نہیں کروں گا۔
سابق وزیر داخلہ کا کہنا تھا کہ پاکستان مشکل ترین دور سے گزر رہا ہے، معجزہ ہی پاکستان کو بچا سکتا ہے، اگر اسمبلی میں گیا تو اس معجزے کا حصہ ہوں گا۔
خیال رہے کہ چوہدری نثار دو قومی اور ایک صوبائی نشست سے عام انتخابات میں حصہ لے رہے ہیں۔
شاہ محمود قریشی کے وکیل تیمور ملک کا کہنا ہے کہ سائفر کیس میں سپریم کورٹ ضمانتی حکم نامے کی مصدقہ کاپی ابھی جاری نہیں کی گئی ہے، اس لیے آج ان کی رہائی کا امکان کم ہے۔
جمعہ کو سپریم کورٹ آف پاکستان نے سائفر کیس میں پاکستان تحریک انصاف (پی ٹی آئی) کے سابق چیٸرمین عمران خان اور شاہ محمود قریشی کی ضمانت کا تحریری فیصلہ جاری کیا تھا، جس کے بعد امکان تھا کہ شاہ محمود قریشی کو رہائی مل جائے گی۔
سپریم کورٹ کے فیصلے میں کہا گیا تھا کہ ہائیکورٹ کا عمران خان اور شاہ محمود قریشی کو ضمانت نہ دینا دستیاب مواد کے خلاف ہے، ہائیکورٹ نے ضمانت نہ دے کر حقائق کے برخلاف رائے دی۔
سوشل میڈیا پلیٹ فارم ”ایکس“ پر جاری بیان میں تیمور ملک نے لکھا کہ ’سپریم کورٹ کے سائفر کیس میں ضمانتی آرڈر کی مصدقہ کاپیاں ابھی تک جاری نہیں کی گئی ہیں اور اس لیے خصوصی عدالت کو بھی اس سلسلے میں باضابطہ طور پر آگاہ نہیں کیا گیا ہے‘۔
تیمور ملک کے مطابق ’اس لیے بدقسمتی سے شاہ محمود قریشی کی رہائی کا عمل آج مکمل ہونے کا امکان بہت کم ہے‘۔
انہوں نے بتایا کہ ’مطلوبہ عمل بشمول ضمانتی بانڈز/ضامن جمع کرانے اور خصوصی عدالت کے ذریعے روبکار کا اجراء صرف سپریم کورٹ کے حکم کی مصدقہ کاپیاں جاری کرنے کے بعد ہی کیا جا سکتا ہے‘۔
ان کا کہنا تھا کہ ’عدالتیں کل اور پیر کو بند رہیں گی اور اس وجہ سے اس تاخیر کے نتیجے میں شاہ محمود قریشی بغیر کسی وجہ کے اڈیالہ جیل میں بلاجواز قید رہیں گے‘۔
ممبئی: بھارتی اداکار اجے دیوگن نے انکشاف کیا ہے کہ ان کے والد فلم انڈسٹری میں آنے سے پہلے گینگسٹر تھے۔
بالی ووڈ اسٹار اجے دیوگن نے ایک انٹرویو میں کہا کہ میرے والد 13 سال کی عمر میں گھر چھوڑ کرممبئی آگئے تھے۔ والد ویرو دیوگن بغیر ٹکٹ ٹرین میں سفر کرکے ممبئی پہنچے تھے۔
اجے دیوگن کا کہنا ہے کہ ان کے والد نے ابتدائی دور میں بہت مشکلات کا سامنا کیا۔ وہ ممبئی میں ایک گینگ کا حصہ بھی بننے اور انہیں جیل بھی ہوئی۔
اداکار نے انکشاف کیا کہ بالی ووڈ کے سینئر ایکشن ڈائرکٹر نے والد ویرو دیوگن کو گلی میں لڑتے دیکھا اور ان کی صلاحیتوں سے متاثر ہو کر انہیں یہ کہہ کر اپنے دفتر بلایا کہ تو لڑتا اچھا ہے۔
اجے دیوگن کے مطابق بالی ووڈ میں انٹری نے ان کے والد کی زندگی بدل دی اور انہوں نے بطور ایکشن ڈائرکٹر 200 فلموں میں فرائض انجام دئیے۔
ویرو دیوگن کا شمار بالی ووڈ کے مایہ ناز ایکشن ڈائرکٹرز میں کیا جاتا ہے۔
پاکستانیوں نے کریڈٹ کارڈز کے زریعے خریداری کے تمام ریکارڈز توڑ دیے ہیں۔
اسٹیٹ بینک آف پاکستان کی جانب سے جاری اعدادو شمار کے مطابق رواں برس پاکستان میں کریڈٹ کارڈز سے خریداری کے رجحان میں گزشتہ سال نومبر کے مقابلہ میں 27.3 فیصد اضافہ ہوا۔
اعدادوشمار کے مطابق گزشتہ سال نومبر میں صارفین نے کریڈٹ کارڈز کے ذریعے 85 ارب روپے کی خریداری کی تھی۔
پاکستانیوں نے اکتوبر میں کریڈٹ کارڈز کے ذریعے 105 ارب روپے کی خریداری کی تھی۔
فرانس نے نکارا گوا جانے والے ایک چارٹرڈ طیارے کو اتار لیا ہے۔ اس طیارے میں 303 سے زائد بھارتی باشندے سوار ہیں۔ فرانسیسی میڈیا کا کہنا ہے کہ انسانی اسمگلنگ سے متعلق شبہات کی بنیاد پر طیارے کو تفتیش کی غرض سے اتارا گیا ہے۔ مشرقی فرانس کے علاقے مارن میں مقامی حکام نے بتایا کہ اس پرواز کے مقصد اور متعلقہ معاملات کے حوالے سے تفتیش شروع کردی گئی ہے۔
بی ایف ایم ٹی وی ، فرانس 3 اور دیگر فرانسیسی میڈیا نے بتایا ہے کہ طیارے کو تفتیش کے بعد کلیئرنس کی بنیاد پر جانے کی اجازت دی جائے گی۔ یہ طیارہ رومانیہ کی ایک چارٹر کمپنی سے لیا گیا ہے۔ پرواز جمعرات کو دبئی سے شروع ہوئی تھی اور اسے مشرقی فرانس کے ویٹری ایئر پورٹ پر تکنیکی وجوہ کی بنیاد پر اتارا گیا تھا۔
ایئر پورٹ کے ویلیکم ایریا کو ویٹنگ ایریا میں تبدیل کرکے تمام مسافروں کو کھانے پینے کی اشیا کے علاوہ بستر اور کمبل سمیت سردی سے بچائو کی تمام چیزیں فراہم کردی گئی ہیں۔ اس دوران جوڈیشل انکوائری شروع کردی گئی ہے۔
فرانس میں بھارتی سفارت خانے کو طیارے کے اتارے جانے اور پرواز کے اغراض و مقاصد کے حوالے سے تفتیش سے مطلع کردیا گیا ہے۔
اسرائیل نواز تھنک ٹینک واشنگٹن انسٹیٹیوٹ فار نیئر ایسٹ پالیسی نے حال ہی میں سعودی عرب میں رائے عامہ کا جائزہ لیا۔ 14 نومبر سے 6 دسمبر کے دوران ایک ہزار سعودی باشندوں سے فلسطینی کاز اور غزہ میں جاری لڑائی کے بارے میں رائے طلب کی گئی۔
امریکی اخبار نیو یارک ٹائمز نے بتایا کہ رائے عامہ کے جائزے میں 40 فیصد سعودی باشندوں نے حماس کے لیے مثبت رویہ ظاہر کیا۔ غزہ میں اسرائیلی فوج کے حملوں اور بڑے پیمانے پر شہادتوں سے قبل سعودی عرب میں حماس کی حمایت کرنے والے صرف 10 فیصد تھے۔
اخبار مزید لکھتا ہے کہ سعودی باشندوں میں اسرائیل مخالف جذبات کے بھڑک اٹھنے سے امریکی صدر کی ان کوششوں کو شدید دھچکا لگے گا جن کا تعلق اسرائیل اور سعودی عرب کو قریب لانا اور معمول کے سفارتی تعلقات استوار کرنا ہے۔ رائے عامہ کے جائزے میں 96 سعودیوں نے کہا کہ تمام عرب ممالک کو اسرائیل سے روابط کردینے چاہئیں۔
رائے عامہ کے اس جائزے میں صرف 16 فیصد سعودی باشندوں نے کہا کہ حماس کو اسرائیل کے خاتمے کی سوچ ختم کرکے دو ریاستوں کا نظریہ اپنالینا چاہیے۔ سعودی عرب بھی اس تجویز کا حامی ہے کہ اسرائیل اور فلسطین کی ریاستوں کو پہلو بہ پہلو قائم ہونا چاہیے۔
راولپنڈی: سائفر کیس میں اعظم خان اور اسد مجید سمیت اہم گواہوں نے اپنے بیانات قلمبند کروا دیے۔
اڈیالہ جیل میں سائفر کیس کا اوپن ٹرائل جاری ہے، جس میں جج ابوالحسنات محمد ذوالقرنین کے روبرو اہم گواہوں اعظم خان اور اسد مجید نے اپنے بیانات قلمبند کروائے۔ اس موقع پر کمرہ عدالت میں سابق چیئرمین پی ٹی آئی کی اہلیہ اور بہنیں، شاہ محمود قریشی اور ان کے اہل خانہ بھی موجود ہیں۔
سماعت کے دوران سیکرٹری وزارت داخلہ آفتاب احمد خان، سابقہ ایگزیکٹو مجسٹریٹ آوید ارشاد، اسسٹنٹ سائفر آپریشن نعمان نے بھی اپنے بیانات قلمبند کروائے۔
قبل ازیں سماعت شروع ہونے سے قبل استغاثہ کے 22 گواہان اڈیالہ جیل پہنچے تھے، جن میں اعظم خان،سہیل محمود،اسد مجید ، ہدایت اللہ ،محمد اشفاق، عدالت اللہ باطینی، حسیب گوہر ، نادر خان، شمعون عباس، فرخ عباس، ایوب چوہدری،آفتاب اکبر درانی ، عدنان ارشد، شجاعت، افضل، جاوید، عبدالجبار ، عبید ارشاد بھٹی، فیصل نیاز، نعمان اللہ، ساجدمحمود اور محمد نعمان شامل ہیں۔
دورہ آسٹریلیا میں دوسرے ٹیسٹ سے پہلے قومی ٹیم کو ایک اور جھٹکا لگ گیا۔
لیفٹ آرم اسپنر نعمان علی فٹنس مسائل کے باعث سیریز سے باہر ہوگئے۔
میلبورن میں نعمان علی کا اپینڈکس کا آپریشن ہوا ہے جس کی وجہ سے نعمان علی سیریز کے بقیہ دونوں میچز میں سلیکشن کے لئے دستیاب نہیں ہوں گے۔
نعمان علی آج شام تک ہسپتال سے ڈسچارج ہوں گے ۔ نعمان علی کا متبادل بھجوانے یا نہ بھجوانے کا فیصلہ سلیکشن کمیٹی ٹیم انتظامیہ سے مشاورت کے بعد کرے گی۔ اس سے پہلے ابرار احمد، خرم شہزاد بھی ان فٹ ہوچکے ہیں ۔
پنجاب میں انتخابات میں حصہ لینے کے امیدواروں کی جانب سے کاغذات نامزدگی وصول اور جمع کرانے کا سلسلہ جاری ہے اور اس دوران دلچسپ انتخابی مقابلوں کا امکان پیدا ہو گیا ہے۔
کاغذات نامزدگی حاصل کرنے والوں میں سرفہرست مسلم لیگ (ن) کے قائد نواز شریف، پیپلز پارٹی کے چیئرمین بلاول بھٹو زرداری اور پی ٹی آئی کے بانی عمران خان تھے۔
نواز شریف کے کاغذات نامزدگی مسلم لیگ (ن) کے سابق ایم این اے بلال یاسین نے حلقہ این اے 130 سے جمع کرائے، جو اسی نشست کے کورنگ امیدوار بھی ہیں۔
نواز شریف کے بھائی مسلم لیگ (ن) کے صدر شہباز شریف نے لاہور سے این اے 123 اور پنجاب اسمبلی کی نشستوں پی پی 158 اور پی پی 164 کے لیے کاغذات حاصل کیے ہیں۔ این اے 132 قصور کے لیے بھی ان کے کاغذات جمع کرائے گئے ہیں۔
لاہور کے حلقہ این اے 128 کے لیے پیپلز پارٹی کے چیئرمین بلاول بھٹو زرداری کے کاغذات جمع کرائے گئے، جہاں مسلم لیگ ن کے خواجہ احمد حسان، جماعت اسلامی کے لیاقت بلوچ اور دیگر امیدواروں میں شامل ہیں۔
اگرچہ پی ٹی آئی کے بانی عمران خان کی الیکشن لڑنے کی اہلیت ابھی تک ہوا میں معلق ہے، تاہم، ان کے کاغذات نامزدگی میانوالی کے حلقہ این اے 89 کے لیے جمع کرا دئے گئے۔
پی ٹی آئی کی زیر حراست سوشل میڈیا کارکن صنم جاوید کے والد جاوید اقبال نے بھی اعلان کیا کہ ان کی بیٹی شہباز شریف اور مریم نواز کے خلاف الیکشن لڑیں گی، جو لاہور کے حلقہ پی پی 150 سے امیدوار ہوں گی۔
جاوید اقبال نے اپنی بیٹی کی جانب سے این اے 123، پی پی 150، 158 اور 164 کے لیے کاغذات وصول کیے تھے۔
دریں اثناء، استحکام پاکستان پارٹی (آئی پی پی) کے مرکزی سیکرٹری اطلاعات خرم حمید روکھڑی نے این اے 89 کے لیے کاغذات نامزدگی جمع کرائے ہیں، جہاں ان کا مقابلہ عمران خان سے ہوگا۔ جب کہ پی پی پی کے نواب امیر محمد خان اور مسلم لیگ (ن) کے عبید اللہ شادی خیل بھی یہاں سے میدان میں ہیں۔
اسی دوران آئی پی پی کے صدر عبدالعلیم خان این اے 147 خانیوال سے الیکشن لڑنے کے خواہاں ہیں اور ان کے لاہور سے قومی اسمبلی کے حلقے سے بھی انتخاب لڑنے کا امکان ہے۔
اسپیکر قومی اسمبلی راجہ پرویز اشرف نے این اے 52 اور ان کے صاحبزادے خرم پرویز نے پی پی 8 گوجر خان سے کاغذات نامزدگی جمع کرائے ہیں۔
سابق وزیراعلیٰ اور پی ٹی آئی کے صدر پرویز الٰہی این اے 69 منڈی بہاؤالدین اور سابق وزیر دفاع خواجہ آصف این اے 71 سیالکوٹ سے امیدوار ہوں گے۔
دونوں نے پنجاب اسمبلی کی دو نشستوں پی پی 46 اور 47 کے لیے بھی اپنے کاغذات نامزدگی جمع کرائے ہیں۔
جھنگ میں سابق وزیر داخلہ فیصل صالح حیات، سابق وفاقی وزیر صاحبزادہ محبوب سلطان اور غلام بی بی بھروانہ نے این اے 108 سے کاغذات جمع کرائے ہیں۔
این اے 109 میں غلام بی بی بھروانہ، امیر سلطان اور مولانا محمد احمد لدھیانوی امیدوار ہوں گے اور صاحبزادہ امیر سلطان سمیت 7 دیگر امیدوار این اے 110 سے انتخاب لڑیں گے۔
پی پی پی کے ندیم افضل چن نے سرگودھا سے قومی اسمبلی کی دو نشستوں این اے 82 اور 86 کے لیے کاغذات وصول کر لیے ہیں۔ مسلم لیگ ن کے عطاء اللہ تارڑ این اے 77، گوجرانوالہ سے الیکشن لڑنے کے لیے پر امید ہیں۔
دریں اثنا، سابق وزیر اعظم شاہد خاقان عباسی کسی بھی پلیٹ فارم سے الیکشن نہیں لڑیں گے۔
ذرائع کا کہنا ہے کہ حلقوں کے دباؤ کے باعث ان کے بیٹے نادر اب مری کے حلقہ این اے 51 سے آزاد امیدوار کے طور پر کاغذات جمع کرائیں گے۔
