لاہور ہائی کورٹ نے پنجاب میں عام انتخابات ایگزیکٹو سے کرانے کا نوٹیفکیشن معطل کردیا۔

لاہور ہائی کورٹ کے جسٹس علی باقر نجفی کے پنجاب میں عام انتخابات ایگزیکٹو سے کرانے کے خلاف پی ٹی آئی کی درخواست پر محفوظ فیصلہ سنا دیا۔ ایک رکنی بینچ نے عام انتخابات ایگزیکٹو سے کروانے کا الیکشن کمیشن کا نوٹیفکیشن معطل کردیا۔

جسٹس علی باقر نجفی نے محفوظ فیصلہ سناتے ہوئے فریقین کو نوٹس جاری کردیا اور لارجر بینچ تشکیل دینے کے لیے فائل چیف جسٹس کو ارسال کردی۔

لاہور ہائی کورٹ نے عام انتخابات کےلیے بیورورکریسی کی خدمات لینے کے خلاف عمیر نیازی کی درخواست پر پانچ صفحات پر مشتمل عبوری تحریری حکم جاری کیا۔

عدالتی فیصلے میں کہا گیا کہ الیکشن کرانے پر غریب قوم کے اربوں روپے لگتے ہیں، اگر بڑی سیاسی جماعتیں الیکشن نتائج تسلیم نہ کریں تو قوم کا پیسہ ضائع ہوگا، الیکشن کمیشن کو فری اینڈ فئیر الیکشن کرانے ہیں، شفاف انتخابات کو حقیقت میں بدلنے کے لیے امیدواروں اور ووٹرز کو یکساں مواقع فراہم کرنے ہیں۔

تحریری حکم میں کہا گیا کہ موجود صورتحال میں جنرل الیکشن سے مطلوبہ نتائج حاصل نہیں ہوسکتے جس سے جمہوریت کا مستقبل کمزور ہوسکتا ہے، درخواست میں قومی ایشو سے متعلق نشاندہی کی گئی ہے لہٰذا درخواست پر لارجر بینچ کے لیے فائل چیف جسٹس کو بھجوائی جاتی ہے اور الیکشن کمیشن کی جانب سے بیورورکریسی سے خدمات لینے کا نوٹیفکیشن معطل کیا جاتا ہے۔

اس سے قبل درخواست گزار کے وکیل ابوزر سلیمان خان نیازی نے موقف اختیار تھا کہ الیکشن کمیشن نے 8 فروری کو عام انتخابات کا اعلان کیا، کمیشن نے ریٹرننگ افسران کے لیے حکومت سے رابط کیا ہے۔

درخواستگزار کے وکیل کا کہنا تھا کہ نگراں حکومت سے غیر جانبدار اور شفاف انتخابات کی امید نہیں کی جا سکتی، عدالت الیکشن کمیشن کا آر اوز اور ڈی آر اوز کے لیے بیورو کریسی کی تعیناتی کا فیصلہ غیر قانونی قرار دے۔

دوران سماعت الیکشن کمیشن کے وکیل نے درخواست کو ناقابل سماعت قرار دینے کی استدعا کی اور موقف اختیار کیا کہ عدلیہ کو خطوط لکھے مگر کیسز کے باعث انہوں نے جوڈیشل افسران دینے سے انکار کیا، صاف شفاف انتخابات کروانا الیکشن کمیشن کی ذمہ داری ہے۔ عدالت نے دلائل مکمل ہونے پر محفوظ فیصلہ جاری کردیا۔

خیال رہے کہ گزشتہ دنوں الیکشن کمیشن نے انتخابات کے لیے ڈپٹی کمشنرز کے بطور ڈسٹرکٹ ریٹرننگ افسران( ڈی آر اوز)، ریٹرننگ افسران ( آر اوز) اور اسسٹنٹ ریٹرننگ افسران ( اے آر اوز) کی تعیناتی کا نوٹیفکیشن جاری کیا تھا۔

پنجاب کے 41 اضلاع میں سے 40 کے متعلقہ ڈپٹی کمشنرز کو ڈی آر اوز تعینات کیا گیا تھا جب کہ ڈائریکٹر جنرل ڈی جی خان ڈویلپمنٹ اتھارٹی محمد خالد منظور کو ڈی آر او تونسہ تعینات کیا گیا۔

امریکا کے دورے پر موجود پاک فوج کے سربراہ جنرل سید عاصم منیر نے امریکی وزیر دفاع لائیڈ آسٹن سے ملاقات کی ہے۔

واشنگٹن میں پینٹاگان کے دورہ کے موقع پر کی جانے والی اس ملاقات میں آرمی چیف اور لائیڈ آسٹن نے علاقائی سلامتی اور دیگر امور سے متعلق تازہ پیشرفت پر گفتگو کی۔

ملاقات کے بعد ترجمان پینٹاگون کی جانب سے جاری بیان میں کہا گیا کہ وزیر دفاع لائیڈ جے آسٹن سوم نے آج پینٹاگون میں پاکستان کے چیف آف آرمی اسٹاف جنرل عاصم منیر کی میزبانی کی، جہاں دونوں عہدیداروں نے حالیہ علاقائی سلامتی کی پیش رفت اور دوطرفہ دفاعی تعاون کے ممکنہ شعبوں پر تبادلہ خیال کیا۔

منگل 12 دسمبر کو پینٹاگون کی بریفنگ میں آرمی چیف کے دورے پربھی تبادلہ خیال کیا گیا تھا جہاں ایک صحافی نے پریس سیکریٹری میجر جنرل پیٹرک رائیڈر سے پوچھا کہ وزیردفاع لائیڈ آسٹن کی یہ پاکستان کے نئے آرمی چیف کے پہلی ملاقات ہوگی،امریکی وزیر دفاع اس ملاقات میں کیا دیکھتے ہیں۔

صحافی نے سوال کیا کہ کیا وہ پاکستان سے افغانیوں کو ملک بدرکرنے کے بارے میں بات کریں گے؟

جواب میں جنرل رائیڈرکا کہنا تھا کہ میرے پاس پوڈیم سے پڑھنے کے لئے کوئی میٹنگ نہیں ہے۔ جب وزیرخارجہ غیر ملکی ہم منصبوں اور رہنماؤں سے ملاقات کرتے ہیں، تو ہمیں ایک ریڈ آؤٹ فراہم کرتے ہیں. لہٰذا اگر ہمارے پاس کوئی ریڈ آؤٹ ہوا تو ہم یقینی طورپر بتائیں گے۔

ایک اور صحافی نے سوال کیا تھا کہ آپ پاک امریکا فوجی تعلقات کا جائزہ کیسے لیں گے؟

جواب میں جنرل رائیڈر کا کہنا تھا کہ پاکستان خطے میں ایک اہم شراکت دار ہے۔ اس لیے ظاہر ہے کہ سینٹ کام کے ذریعے ہم ان کے ساتھ قریبی رابطے میں رہیں گے، خاص طور پر جب بات انسداد دہشت گردی جیسے معاملات کی ہو۔

پاک فوج کےسربراہ امریکی وزیر دفاع کے علاوہ امریکی وزیر خارجہ انٹونی بلنکن اور قومی سلامتی کے مشیر جیک سلیون سے بھی ملاقات کریں گے۔

امکان ہے کہ وہ امریکی ایوان نمائندگان اور سینیٹ کے سینئر ارکان سے بھی ملاقات کرسکتے ہیں۔

اتوار10 دسمبر کو اسلام آباد سے روانہ ہونے والے جنرل منیر برطانیہ میں دو دن گزارنے کے بعد منگل کی سہ پہر واشنگٹن پہنچے تھے۔ برطانیہ میں ان کی مصروفیات کی تفصیلات عام نہیں کی گئیں کیونکہ یہ بظاہرایک نجی دورہ تھا۔ واضح رہے کہ پاک فوج کی کمان سنبھالنے کے بعد سے یہ جنرل عاصم منیر کا پہلا دورہ امریکا ہے۔

جنرل سید عاصم منیر نے 29 نومبر 2022 کو پاکستان کے 17ویں آرمی چیف کا منصب سنبھالا تھا۔

استحکام پاکستان پارٹی (آئی پی پی) کے رہنما کن حلقوں سے عام انتخابات میں حصہ لیں گے، اس کی تفصیلات سامنے آگئی ہیں۔

ن لیگ اور آئی آئی پی کی کمیٹیوں کا سیٹ ایڈجسٹمنٹ کے معاملے پر مشترکہ اجلاس ایاز صادق کی رہائشگاہ پر ہوا جس میں ن لیگ کی طرف سے ایاز صادق، سعد رفیق، عطا تارڑ، ملک احمدخان جب کہ آئی پی پی کے اسحاق خاکوانی، عون چوہدری اور نعمان لنگڑیال شریک ہوئے۔

کمیٹیوں کے مشترکہ اجلاس میں قومی اسمبلی کے حلقوں پر سیٹ ایڈجسٹمنٹ کے لیے مشاورت کی گئی جب کہ آئی پی پی نے سیٹ ایڈجسٹمنٹ کے لیے فہرست ن لیگ کمیٹی کے حوالے کردی۔

آئی پی پی اور لیگی رہنماؤں نے سیٹ ایڈجسٹمنٹ کے مختلف آپشنز پر غور کیا اوردونوں کمیٹیوں نے اس معاملے پر بات چیت جاری رکھنے پر اتفاق کیا۔

ذرائع نے کہا کہ کچھ روز میں ن لیگ اور آئی پی پی کے درمیان سیٹ ایڈجسٹمنٹ کو حتمی شکل دے دی جائے گی جب کہ کل دونوں کمیٹیوں کا مشترکہ اجلاس دوبارہ ہونے کا امکان ہے۔

ذرائع کا کہنا ہے کہ آئی پی پی پیٹرن اِن چیف جہانگیر ترین لودھراں، پارٹی صدر علیم خان اور عون چوہدری لاہور جب کہ غلام سرور خان ٹیکسلا، عامر کیانی اور علی نواز اسلام آباد سے الیکشن لڑیں گے۔

ذرائع کے مطابق فرخ حبیب فیصل آباد سے الیکشن لڑیں گے اور انہیں عابد شیر علی والے حلقے کی بجائے کسی دوسرے حلقے سے ایڈجسٹ کیا جائے گا۔

اس کےعلاوہ اسحاق خاكوانی وہاڑی، فردوس عاشق اعوان سیالکوٹ، گل اصغر، احسان ٹوانہ خوشاب سے قومی اسمبلی کا الیکشن لڑیں گے۔

ذوالفقار چکوال، کرنل ریٹائرد محمد انور اٹک، اوکاڑہ سے صمصام بخاری، چوہدری نوریز شکور ساہیوال، کرنل ریٹائر ڈ ہاشم ڈوگر، سردار طالب نکئئ اور آصف نکئی قصور سے الیکشن میں حصہ لیں گے۔

ذرائع نے مزید بتایا کہ ڈاکٹر مراد راس لاہور، خالد محمود شیخوپورہ، سردار ایاز خان نیاز ی خانیوال، نعمان لنگڑیال ساہیوال، عمران اسماعیل اور محمود مولوی کراچی سے الیکشن لڑنے کے خواہشمند ہیں۔

فیاض الحسن چوہان راولپنڈی، اجمل چیمہ فیصل آباد اور پارٹی رہنما چوہدری اختر اپنی بجائے بیٹے کو فیصل آباد سے الیکشن لڑائیں گے جب کہ مامون جعفر تارڑ حافظ آباد سے اور رانا نذیر کامونکی سے الیکشن لڑیں گے۔

سپریم کورٹ میں اسلام آباد ہائی کورٹ کے معزول جج شوکت صدیقی کی برطرفی سے متعلق سماعت شروع ہوگئی ہے، سماعت براہ راست دکھائی جاری ہے۔

سپریم کورٹ میں معزول جج اسلام آبادہائیکورٹ شوکت صدیقی کی برطرفی کے خلاف درخواست پر سماعت شروع ہوگئی ہے، چیف جسٹس کی سربراہی میں 5 رکنی لارجر بینچ سماعت کررہا ہے۔

جسٹس امین الدین، جسٹس جمال مندوخیل، جسٹس حسن اظہر رضوی اور جسٹس عرفان سعادت خان بینچ کا حصہ ہیں۔

شوکت صدیقی کی برطرفی سے متعلق سماعت براہ راست دکھائی جارہی ہے، سماعت سپریم کورٹ کی ویب سائٹ، یوٹیوب پر براہ راست نشر کی جارہی ہے۔

شوکت عزیز صدیقی کی برطرفی کا معاملہ
واضح رہے کہ اسلام آباد ہائیکورٹ کے جج شوکت عزیز صدیقی کو 11 اکتوبر 2018 کو خفیہ اداروں کے خلاف تقریر کرنے پر عہدے سے ہٹا دیا گیا تھا۔

اسلام آباد ہائیکورٹ کے اُس وقت کے سینیئر جج جسٹس شوکت عزیز صدیقی نے 21 جولائی 2018 کو راولپنڈی بار میں خطاب کے دوران حساس اداروں پر عدالتی کام میں مداخلت کا الزام عائد کیا تھا۔

سابق جج شوکت عزیز صدیقی کے بیان پر پاک فوج کے شعبہ تعلقات عامہ (آئی ایس پی آر) کی جانب سے بھی رد عمل سامنے آیا تھا جس میں ریاستی اداروں پر لگائے جانے والے الزامات کی تحقیقات کا مطالبہ کیا گیا تھا۔

شوکت عزیز صدیقی نے عہدے سے ہٹانے کے سپریم جوڈیشل کونسل کے فیصلے کے خلاف سپریم کورٹ میں اپیل بھی دائر کر رکھی تھی۔