پاکستان پیپلز پارٹی کے چیئرمین بلاول بھٹو زرداری نے کہا ہے کہ ملک مشکل میں ہے، دہشت گردی ایک بار پھر سر اٹھارہی ہے، ہمیں سیاسی اختلافات کو بھلا کر ایک ہوکر چیلنجز کا مقابلہ کرنا چاہیئے، پتہ نہیں کیوں دہشت گرد تنظیموں سے بات چیت ہوئی، پارلیمنٹ سے پوچھے بغیر دہشت گردوں کو جیل سے نکالا گیا۔

پشاور ہائیکورٹ بار سے خطاب کرتے ہوئے سابق وزیر خارجہ بلاول بھٹو زرداری کا کہنا تھا کہ ہم نے دہشت گردی کے خاتمے کے لیے بہت قربانیاں دی ہیں، خیبر پختونخوا کے ہر طبقے سے تعلق رکھنے والوں کی قربانیاں سب سے زیادہ ہیں، ہم نے دہشت گردی کا خاتمہ کیا تھا اور دنیا تسلیم کررہی تھی کہ پاکستان نے دہشت گردی کے پر قابو پالیا ہے لیکن پھر پارلیمنٹ سے پوچھے بغیر سنگین دہشت گردی میں ملوث افراد کو جیل سے نکالا گیا، جب افغانستان میں حکومت تبدیل ہوئی تو پھر ان لوگوں کو بغیر کسی رکاوٹ کے یہاں آنے دیا گیا۔

بلاول بھٹو زرداری نے کہا کہ کل کا واقعہ اس کی ایک مثال ہے، اس ایک فیصلے نے پاکستان کو 10 سال پیچھے دھکیل دیا ہے، اس ایک فیصلے کی وجہ سے پولیس،فوج اور عوام متاثر ہورہے ہیں۔۔ اے پی ایس کے شہدا کو بتانا چاہیئے کہ ان کے خون کا سودا کس نے کیا اور کیسے کیا؟ گزشتہ روز سپریم کورٹ میں ہونےو الی سماعت سے متعلق بات کرتے ہوئے۔

چیئرمین پیپلز پارٹی نے کہا کہ کل ذوالفقار علی بھٹو کے ریفرنس کے لیے سپریم کورٹ گیا، چیف جسٹس فائز عیسیٰ کا شکریہ کہ انہوں نے اس کیس پر ہمیں موقع دیا، ہم چاہتے ہیں کہ تاریخ کو درست کیا جائے، جو لوگ اس جرم میں ملوث ہوں ان سب کو بے نقاب ہونا چاہیئے، یہ ایک موقع ہے کہ ہم پاکستان کو اس بحران سے نکال سکیں۔

ان کا مزید کہنا تھا کہ ذوالفقار علی بھٹو کیس کی کسی جج نے مثال نہیں دی، ایک آمر نے اپنی مرضی کا فیصلہ کیا، ایک آمر نے اس وزیراعظم کے خلاف فیصلہ دیا، جس نے آئین پاکستان دیا،ایٹم بم بنایا، جب فلسطین کے خلاف اس وقت ظلم ہورہا تھا تو ذوالفقار علی بھٹو نے عرب ممالک کو سمجھایا کہ تیل آپ کی طاقت ہے، اس وقت امریکا پاکستان کے وزیراعظم کو کہتا ہے کہ ہم آپ کو مثال بنائیں گے۔

بلاول بھٹو کا یہ بھی کہنا تھا کہ ضیاء الحق سے خانہ کعبہ میں یاسر عرفات اور شاہ فیصل نے حلف لیا کہ ذوالفقار علی بھٹو کو ماریں گے نہیں لیکن اس شخص نے ذوالفقار علی بھٹو کو شہید کیا، پی ٹی آئی والے بھٹو کے نعرے لگانے پر ہنستے تھے، ہم چاہتے ہیں کہ اس دروازے کو ہمیشہ کے لیے بند کیا جائے کہ کسی جج کو استعمال کرکے کسی کےخلاف فیصلہ لیا جائے، ریفرنس میں ذوالفقار علی بھٹو کو انصاف دلانے کے لیے کوشش کرتے رہیں گے۔

سابق وزیر خارجہ بلاول بھٹو زرداری نے کہا کہ میرے وکلا سے کچھ سوال ہیں، کیا عدالت کسی کا قتل کرسکتی ہے؟۔قتل تو قتل ہے اور اس کا انصاف مانگنا ہر کسی کا آئینی اور قانونی حق ہے، جب جج کہتا ہے کہ میں نے ڈیم بنانا ہے تو اس وقت سوال اٹھانے والا کون تھا؟ کیا کسی چیف جسٹس کا یہ حق ہے کہ وہ جس شہر سے ہوں اور کہیں کہ میں اس شہر کو دوبارہ کھڑا کروں گا؟ جب کراچی میں غریبوں کے گھر اجاڑے جارہے تھے تو اس وقت قانونی سوال کیا تھا۔ ۔جب چیف جسٹس ٹماٹر کی قیمت مقرر کریں گے تو اس وقت قانونی سوال کیا تھا۔

پیپلزپارٹی نے خواتین کو با اختیار بنانے کے لیے جدوجہد کی، بلاول بھٹو

دوسری جانب پشاور میں خواتین ورکرز کنونشن سے خطاب کرتے ہوئے بلاول بھٹو زرداری کا کہنا تھا کہ پیپلزپارٹی کے ورکرز کنونشن کا سلسلہ جاری ہے، پیپلزپارٹی انتخابات میں کامیابی حاصل کرے گی، خواتین اسی طرح کام کرتی رہی تو جیت پیپلزپارٹی کی ہوگی۔

بلاول بھٹو نے کہا کہ پارٹی کی خواتین نے پارٹی اور ملک کی ترقی میں ہراول دستے کا کردار ادا کیا ہے، پارٹی کی خواتین نے ہمیشہ ملک کی ترقی میں اہم رول ادا کیا ہے، ڈکٹیٹروں اور ظالم حکومتوں کا مقابلہ کیا ہے، اسی وجہ سے شہید ینظیر بھٹو اسلامی دنیا کی پہلی خاتون وزیراعظم منتخب ہوئی تھیں، پیپلزپارٹی نے خواتین کو با اختیار بنانے کے لیے جدوجہد کی، خواتین کا ملکی سیاست میں اہم کردار ہے، پیپلزپارٹی تمام طبقوں کی نمائندہ جماعت ہے، پیپلزپارٹی ہر شعبے میں خواتین کو نمائندگی دینا چاہتی ہے۔

انہوں نے مزید کہا کہ ہم خواتین کو بلاسود قرض فراہم کریں گے، پاکستان بھر میں کچی آبادیوں کے مکینوں کو مالکانہ حقوق پر گھر دیں گے، لیڈی ہیلتھ ورکرز کے حقوق کا تحفظ کریں گے، جب وہ شہید ذوالفقار علی بھٹو کے صدارتی ریفرنس کی سماعت میں شریک ہونے کے لئے سپریم کورٹ گئے تو انہوں نے ایک خاتون جج کو جج کی کرسی پر بیٹھے ہوئے دیکھا اور یہ بھی پیپلزپارٹی کی خواتین کی جدوجہد کا نتیجہ تھا۔

چیئرمین پیپلز پارٹی نے یہ بھی کہا کہ ہمارا نظریہ یہ ہے کہ خواتین کو معیشت، سیاست اور ہر شعبہ ہائے زندگی میں برابر کے مواقع ملیں، خواتین اس ملک کی آبادی کا نصف حصہ ہیں اور جب تک یہ ملک کی معیشت میں حصہ نہیں لیتی یہ معاشرہ اور ملک آگے نہیں بڑھ سکتا۔

پیپلزپارٹی کو وفاق میں حکومت ملی تو سب کو ساتھ لے کر چل سکتی ہے، بلاول بھٹو

بعدازاں صحافیوں سے غیر رسمی گفتگو کرتے ہوئے سابق وزیر خارجہ بلاول بھٹو نے کہا کہ جسٹس قاضی فائز عیسیٰ نے لکھا کہ الیکشن کی تاریخ پتھر پر لکیر ہے، ہمیں چیف جسٹس قاضی فائز عیسیٰ کی بات پر اعتماد ہے۔

انہوں نے کہا کہ پنجاب میں 20 حلقوں کے انتخابات کو نہیں سنبھالا جاسکا تو پورے ملک میں کیسے دھاندلی کو مینیج کیا جائے گا، خیبرپختونخوا میں پیپلز پارٹی اپنی جگہ واپس چھینے گی، افغانستان کا مسئلہ انتہائی گھمبیر ہے۔

بلاول بھٹو کا مزید کہنا تھا کہ پیپلز پارٹی واحد جماعت ہے جسے وفاق میں حکومت ملی تو سب کو ساتھ لے کر چل سکتی ہے، تمام سیاسی جماعتوں کو مل کر ملک کو مشکل سے نکالنا ہوگا، کمزورحکومت ہوئی تو وہ ملک کو درپیش مسائل سے نہیں نکال سکے گی۔

بلاول بھٹو سے خیبرپختونخوا کے تاجر رہنماؤں کی ملاقات

ادھر پاکستان پیپلزپارٹی کے چیئرمین بلاول بھٹو زرداری سے خیبرپختونخوا کے تاجر رہنماؤں کی ملاقات ہوئی، جس میں تاجر برادری کو پبلک پرائیوٹ پارٹنرشپ منصوبوں کی اہمیت اور افادیت سے آگاہ کیا گیا۔

پشاور میں چیئرمین بلاول بھٹو زرداری سے فیڈریشن پاکستان چیمبر آف کامرس اینڈ انڈسٹری، پشاور چیمبر آف ٹریڈرز اینڈ اسمال انڈسٹریز، تنظیم تاجران، باجوڑ چیمبر، آل پاکستان کمرشل ایکسپورٹر ایسوسی ایشن، پیپلزٹریڈرز ایسوسی ایشن کے صدور اور عہدیداروں کی ملاقاتیں ہوئیں۔

اس موقع پر تاجر رہنماؤں نے پیپلز پارٹی چئیرمین کو خیبرپختونخوا کے کاروباری طبقے کے مسائل سے آگاہ کیا۔

جس پر بلاول بھٹوں زرداری نے کاروباری طبقے کے مسائل حل کرانے کی یقین دہانی کرائی۔

نگراں وزیراعظم پاکستان انوارالحق کاکڑ نے کہا ہے کہ دہشت گرد ہمیں کبھی خوفزدہ نہیں کرسکتے، پاکستان دہشت گردی کے خلاف جنگ جیت چکا ہے، دہشت گرد ہاری ہوئی اور ہم جیتی ہوئی جنگ لڑ رہے ہیں، پاکستانی ایک بہادر و مضبوط قوم ہے اور ہماری افواج دشمنوں کے ناپاک عزام کو ناکام بنا کر انہیں منہ توڑ جواب دے گی۔

نگراں وزیر اعظم انورالحق کاکڑ نے آج ڈیرہ اسماعیل خان میں کمبائنڈ ملٹری اسپتال کا دورہ کیا اور گزشتہ روز بم دھماکے کے زخمیوں کی عیادت کی۔

نگراں وزیرِ داخلہ سرفراز بگٹی، گورنر خیبر پختونخوا حاجی غلام علی اور نگراں وزیرِ اعلیٰ خیبر پختونخوا جسٹس (ر) سید ارشد حیسن شاہ بھی نگراں وزیرِ اعظم کے ہمراہ تھے۔

زخمی سیکیورٹی اہلکاروں اور پاک فوج کے جوانوں کے جذبے کی تعریف کرتے ہوئے نگراں وزیراعظم نے کہا کہ ایسی قوم کی جیت یقینی ہے جس کے ایسے بہادر افسران و فوجی جوان ہوں جو اپنی وطن کی حفاظت کیلئے اپنے لہو کا نظرانہ پیش کرنے سے بھی دریغ نہ کریں۔

انہوں نے مزید کہا کہ پوری پاکستانی قوم دہشت گردی کی عفریت کے خلاف سیسہ پلائی دیوار کی طرح کھڑی ہے اور اللہ رب العزت کی مدد اور عوام کی طاقت سے اس کو ہر شکل و روپ میں شکستِ فاش دے گی۔

انوار الحق کاکڑ کا مزید کہنا تھا کہ پاکستانی ایک بہادر و مضبوط قوم ہے اور ہماری افواج دشمنوں کے ناپاک عزام کو ناکام بنا کر انہیں منہ توڑ جواب دے گی۔

نگراں وزیراعظم نے کہا کہ ہمارے جوانوں کے جذبے جوان ہیں، جن کے حوصلے کے لیے میں گیا انہوں نے مجھے حوصلہ دیا، پاکستان دہشت گردی کے خلاف جنگ جیت چکا ہے، حملہ آوروں کو بتا دینا چاہتا ہوں وہ یہ جنگ ہار چکے ہیں، اب صرف اعلان باقی ہے۔

انوارالحق کاکڑ نے کہا کہ دہشت گردوں کے خلاف یہ جنگ ریاست پاکستان نے جیتی، اب یہ ایک حملہ کریں گے تو ہم 10 قدم آگے بڑھیں گے، یہ لوگ کس سے لڑ رہے ہیں، کیا ہمیں یہ موت سے ڈرانا چاہتے ہیں، یاد رکھیں ہم جیتی ہوئی جنگ لڑ رہے ہیں، اس جیتی ہوئی جنگ میں جنہوں نے قربانیاں دیں وہ جنت میں راحت میں ہوں گے۔

انہوں نے مزید کہا کہ علمائے حق ریاست اور امن کے ساتھ ہیں، دہشت گردی کے خلاف جنگ میں ہمارے کئی ہزار نوجوان شہید ہو چکے اور کئی ہزار تیار ہیں۔

نگراں وزیراعظم نے انسداد دہشت گردی کی کارروائیوں میں شہید ہونے والوں کے بلندی درجات کے لیے دعا کی۔

واضح رہے کہ پیر اور منگل کی درمیانی شب ڈی آئی خان میں مشتبہ سرگرمیوں کے بعد سیکیورٹی فورسز نے مختلف کارروائیوں کے دوران مجموعی طور پر 27 دہشت گردوں کو ہلاک کردیا تھا، تاہم درابن کے علاقے میں سیکیورٹی پوسٹ پر خود کش حملے میں 23 اہلکار بھی شہید ہوگئے تھے۔

نگراں وزیراعظم کل آزاد جموں و کشمیر قانون ساز اسمبلی سے خطاب کریں گے

دوسری جانب نگراں وزیراعظم انوار الحق کاکڑ کل صبح ساڑھے 10 بجے آزاد جموں و کشمیر قانون ساز اسمبلی سے خطاب کریں گے۔

صدر آزاد کشمیر بیرسٹر سلطان محمود چوہدری نے آزاد جموں وکشمیر قانون ساز اسمبلی کا اجلاس طلب کرلیا۔

اسمبلی سیکرٹریٹ کی جانب سے اجلاس کی طلبی کا نوٹیفکیشن جاری کردیا گیا۔

ایجنڈے کے مطابق نگراں وزیراعظم پاکستان انوار الحق کاکڑ قانون ساز اسمبلی کے اجلاس سے خطاب کریں گے۔