کراچی: حکومت سندھ نے کراچی شہر سے بس اڈوں کو باہر منتقل کرنے اور مسافروں کو مفت شٹل سروس دینے کا فیصلہ کر لیا ہے۔سندھ کے سینیئر وزیر شرجیل انعام میمن کی زیر صدارت اعلیٰ سطح کا اجلاس ہوا جس میں سینیئر وزیر شرجیل انعام میمن کی جانب سے بس اڈوں کو ترجیحی بنیادوں پر فوری طور پر شہر سے باہر منتقل کرنے کی ہدایات کی گئی ہیں۔شرجیل انعام میمن نے کہا کہ مسافروں کے لیے پرانے بس اڈوں سے مفت میں شٹل سروس چلائی جا رہی ہے، مسافروں کو ٹرمینل تک پہنچانے کے لیے مفت شٹل سروس 14 اگست سے شروع کی جائے گی۔انہوں نے کہا کہ ہیوی گاڑیوں کی وجہ سے کراچی کی شہریوں کو تکالیف کا سامنا کرنا پڑتا ہے اور سڑکوں پر بھی دباؤ بڑھتا ہے لہٰذا تمام بس اڈوں کو کراچی شہر سے باہر منتقل کیا جا رہا ہے، بس ٹرمینل میں مسافروں کے لیے مزید جدید سہولیات فراہم کی جا رہی ہیں۔شرجیل انعام میمن نے کہا کہ شٹل سروس کینٹ اسٹیشن، صغیر شہید روڈ، ایم اے جناح روڈ اور الکرم اسکوائر سے شروع کی جا رہی ہے جس کے ذریعے مسافر پرانے بس اڈوں سے ٹرمینل تک مفت سہولت حاصل کرتے ہوئے پہنچ سکیں گے۔
