صوبہ پنجاب کے شہر لاہور سے گزشتہ ہفتے لاپتا ہونے والے یوٹیوبر اور طنزیہ گانا ’بل بل پاکستان‘ گانے والے عون علی کھوسہ کے وکلا کے مطابق وہ گھر پہنچ گئے ہیں۔
لاہور ہائی کورٹ نے کیپیٹل سٹی پولیس افسر (سی سی پی او) کو 20 اگست تک یوٹیوبر عون علی کھوسہ کو باز یاب کرواکر عدالت میں پیش کرنے کا حکم دیا تھا۔
مائیکرو بلاگنگ پلیٹ فارم ایکس پر ایک پوسٹ میں عون علی کھوسہ کی وکیل خدیجہ صدیقی نے اس پیش رفت سے آگاہ کرتے ہوئے لکھا کہ ‘عون علی کھوسہ کو چھوڑ دیا گیا ہے گھر پہنچ گئے ہیں’۔
ایک اور پوسٹ میں انہوں نے کہا کہ ’خوش آمدید، اللہ آپ کی حفاظت کرے‘۔
عون کھوسہ کی وکلا ٹیم میں شامل میاں علی اشفاق نے بھی ایکس پر ان کے ’خیریت سے گھر پہنچنے‘ کی تصدیق کی اور بتایا کہ ان کا حوصلہ بلند، سلامت اور ثابت قدم ہیں۔
خیال رہے کہ عون کھوسہ نے جشنِ آزادی کے موقع پر پاکستان میں بجلی کے بلز اور مہنگائی پر ایک طنزیہ گانا گایا تھا جس میں مشہور ملی نغمے ’دل دل پاکستان‘ کے الفاظ کو ’بِل بِل پاکستان‘ سے بدل کر حکومت پر تنقید کی گئی تھی۔
14 اگست کو گانے کی ریلیز کے بعد ان کے اہلخانہ کے مطابق عون کو اسی رات لاہور سے چند نامعلوم افراد نے اغوا کر لیا تھا جس کے بعد یوٹیوب سے اس ویڈیو کو بھی حذف کر دیا گیا تھا۔
15 اگست کو عون علی کھوسہ کی اہلیہ بنیش نے ان کی بازیابی کی درخواست دائر تھی، جس میں مؤقف اپنایا گیا تھا کہ عون علی ڈیجٹیل کانٹینٹ کریٹیر ہیں اور ان کو نامعلوم افراد نے گھر سے اغوا کیا۔
درخواستگ زار نے استدعا کی تھی کہ عدالت عون علی کھوسہ کی بازیابی کا حکم دے۔
16 اگست کو لاہور ہائیکورٹ نے کیپیٹل سٹی پولیس افسر کو 20 اگست تک یوٹیوبر عون علی کھوسہ کو باز یاب کرواکر عدالت میں پیش کرنے کا حکم دیا تھا۔
اس کے اگلے روز لاہور پولیس نے لاپتا معروف یوٹیوبر عون علی کھوسہ کے اغوا کا مقدمہ اہلیہ بینش اقبال کی مدعیت میں درج کر لیا تھا۔
