لاہور: وزیراعلیٰ پنجاب کے جیل ریفارمز وژن کے تحت محکمہ داخلہ پنجاب نے جیلوں میں نوعمر اسیران کی ٹیکنیکل تربیت شروع کر دی ہے۔
ترجمان محکمہ داخلہ پنجاب کے مطابق تربیت کا آغاز ’’اب ہوگا ہنرمند اسیر‘‘ پروگرام کے تحت کیا گیا ہے۔ اسیران کو ایل ای ڈی بلب، ایس ایم ڈی سیلنگ لائٹ اور استری کی تیاری و مرمت کی تربیت دی جا رہی ہے۔
پنجاب کی جیلوں میں 15 ہزار ایل ای ڈی بلب نصب ہیں جبکہ 2 ہزار سے زائد ایل ای ڈی بلب ہر ماہ خرابی کے باعث تبدیل کیے جاتے ہیں۔ تربیت یافتہ قیدی خراب ایل ای ڈی بلبوں کی مرمت سے تجربہ حاصل کر رہے ہیں۔
ہر ماہ لاکھوں روپے کی بچت کے ساتھ قیدیوں کو مفید شہری بنانے میں مدد ملے گی اور نوجوان قیدی رہائی کے بعد معاشرے میں باعزت رزق کما سکیں گے۔ بلب کی خریداری کی مد میں سالانہ 30 لاکھ روپے کی بچت بھی ہوگی۔
