پاکستانی ہردلعزیز جوڑی عائزہ خان اور دانش تیمور نے بالی وڈ کے کسی رومانوی گیت کی مانند کروائے گئے ویڈیو و فوٹوشوٹ کو مداحوں کے ساتھ شیئر کردیا۔
عائزہ خان اور دانش تیمور کو پاکستانی شوبز انڈسٹری کی سب سے حسین اور لَوِنگ جوڑی قرار دیا جاتا ہے اور دونوں کی ایک دوسرے کیلئے محبت و احترام بھی انکے ہر انٹرویو میں واضح طور پر نظر آتا ہے۔
دانش تیمور اور عائزہ خان نے گہری دوستی اور محبت کے اظہار کے بعد 8 اگست 2014 کو دھوم دھام سے شادی کی جسکی تصاویر نے سوشل میڈیا پر خوب رونق لگائی۔
محبت کی شادی کرنے والی اس جوڑی کی ایک بیٹی حورین اور بیٹا ریان ہے جن کے ساتھ اب دونوں محبت سے بھرپور تصاویر اور ویڈیوز جاری کرتے رہتے ہیں۔
حال ہی میں دونوں نے پاکستان کی معروف فیشن ڈیزائنر ‘ماریا بی’ کے برانڈ کیلئے چند ویڈیوز اور تصاویر بنوائی ہیں جو ‘ماریا بی’ کے ملبوسات کی نئی کلیکشن کیلئے ہے۔
اس کلیکشن کا نام ‘تیرے میرے عشق میں’ ہے جس میں ہردلعزیز جوڑی دورانِ شوٹ ہنستی مسکراتی نظر آرہی ہے۔
اس شوٹ کے پہلے بی ٹی ایس شیئر کیے گئے جس کے بعد اب فائنل ویڈیوز سوشل میڈیا کی زینت بنا دی گئی ہیں جن میں وہ دونوں بالی وڈ کی رومانوی فلموں سے متاثر ہوکر پوز دیتے دکھ رہے ہیں۔
ایک ویڈیو میں عائزہ خان سبز پشواس پہنی کان میں بندا پہنتی نظر آئیں اور اچانک سفید لباس میں ملبوس دانش تیمور انکے قریب آگئے اور وہ انکو دیکھ کر شرماتی ہوئے آگے بڑھ گئیں بعد ازاں دونوں ایک کتاب پڑھتے ہوئے ایک ساتھ رومانوی لمحات گزارتے بھی دکھے۔
دوسری ویڈیو میں عائزہ خان سرخ چھوٹی قمیص کے ساتھ میچنگ شلوار اور دوپٹہ پہنی دکھیں جبکہ دانش تیمور یہاں بھی سفید لباس ہی پہنے ہوئے تھے۔
ویڈیو میں دونوں کھیت میں ایک دوسرے کا ہاتھ تھام کر چلتے دکھے، کہیں دانش عائزہ کی زلفوں میں چوٹی باندھتے دکھے تو کہیں وہ ان کو گود میں اٹھائے نظر آئے۔
ایک ویڈیو عائزہ خان نے بھی شیئر کی جس میں شوٹ کے نئے بی ٹی ایس شامل تھے اور ان سب پر شاہ رخ خان کا ہی مشہور ڈائیلاگ لگایا گیا۔
سوشل میڈیا صارفین دانش تیمور اور عائزہ خان کی اس ویڈیو کو دیکھ کر بالی وڈ کے ‘کنگ آف رومانس’ شاہ رخ خان کی فلموں کی یادوں میں کھو گئے ہیں۔
