وفاقی وزیر خزانہ محمد اورنگزیب سے ایشیائی انفراسٹرکچر انویسٹمنٹ بینک کے وفد اور اقوام متحدہ میں پاکستان کے مستقل مندوب منیر اکرم سے ملاقات ہوئی۔
اے آئی آئی بی کی ٹیم نے ملاقات کے دوران وزیر خزانہ کو پاکستان میں بینک کی پورٹ فولیو سرمایہ کاری کے بارے میں بریفنگ دی جس میں ہائیڈرو پاور جنریشن، سڑکوں اور ٹرانسپورٹ سیکٹر کی تعمیر، شہری انفراسٹرکچر کی ترقی اور وبائی امراض کے منفی اثرات سے نمٹنے کے منصوبے شامل ہیں۔
جاری منصوبوں کی صورتحال اور بینک کی فنانسنگ کو پاور جنریشن سے ٹرانسمیشن اور ڈسٹری بیوشن سسٹم کی طرف موڑنے کی ضرورت پر بھی تبادلہ خیال کیا گیا۔
اے آئی آئی بی وفد نے کہا کہ بینک پاکستان کو ایک اہم پارٹنر ملک کے طور پر دیکھتا ہے۔
سینیٹر محمد اورنگزیب نے پاکستان کے لیے بینک کی معاونت کو تسلیم کیا جبکہ وزیر خزانہ نے پاکستان میں اے آئی آئی بی کے منصوبوں کی پیش رفت پر اطمینان کا اظہار کیا۔ انہوں نے جاری منصوبوں کی فراہمی کو بہتر بنانے کے لیے مزید کوششوں پر زور دیا۔
محمد اورنگزیب سے مستقل مندوب منیر اکرم کی ملاقات کے دوران وزیر خزانہ اور اہم مالیاتی اداروں کے سربراہان، تجارتی اور سرمایہ کاری بینکوں، دو طرفہ شراکت داروں اور ہونے والی ملاقاتوں سے متعلق امور زیر غور آئے۔
سفیر منیر اکرم نے ترقی پذیر ممالک کی مدد کے لیے موسمیاتی مالیات اور تجارتی اصلاحات کو بڑھانے سے متعلق پاکستان کی کوششوں پر روشنی ڈالی۔
اقوام متحدہ میں مستقل مندوب منیر اکرم نے ترقی یافتہ ممالک کے مجموعی قومی آمدنی اور سرکاری ترقیاتی امداد کے 0.7 فیصد وعدے کی تکمیل کے لیے پاکستان کی کوششوں پر بھی روشنی ڈالی۔
سرکاری اور نجی اداروں کی سہولت کے لیے اقوام متحدہ کے میکنزم کے قیام کا ذکر کیا گیا۔
