غزہ کی سول ڈیفنس ایجنسی کا کہنا ہے کہ جمعہ کے روز شمالی شہر بیت لاہیہ کے ایک بڑے اسپتال کے ارد گرد اسرائیلی حملوں میں غزہ کے 29 افراد شہید ہو گئے۔
ٹریبیون کی رپورٹ کے مطابق ایجنسی اور اسپتال کے ڈائریکٹر نے بتایا کہ شمالی غزہ میں اب تک کام کرنے والا واحد صحت مرکز کمال عدوان اسپتال جمعہ کے روز صبح کے وقت کئی حملوں کی زد میں آیا۔
اسپتال کے ڈائریکٹر حسام ابو صفیہ نے کہا کہ اسپتال کے شمالی اور مغربی اطراف میں فضائی حملوں کا ایک سلسلہ تھا جس میں شدید اور براہ راست فائر بھی ہوا انہوں نے مزید کہا کہ اسرائیلی حملوں کے نتیجے میں عملے کے بھی 4 افراد شہید ہوئے ہیں۔
سول ڈیفنس ایجنسی کے ترجمان محمود باسل نے کہا کہ جمعہ کی صبح سے کمال عدوان اسپتال کے ارد گرد مسلسل اسرائیلی گولہ باری کے نتیجے میں کم از کم 29 افراد شہید اور درجنوں زخمی ہوئے ہیں۔
انٹرنیشنل میڈیا کے مطابق اسرائیلی فوج نے ابھی تک حملوں پر تبصرہ کرنے کے لیے اے ایف پی کی درخواستوں کا جواب نہیں دیا جبکہ باسل نے اے ایف پی کو بتایا کہ اسرائیلی فوج اسپتال میں داخل ہوئی، مریضوں کو باہر نکالا اور متعدد فلسطینیوں کو گرفتار کر لیا۔
