معروف اداکارہ حبا بخاری کے آنگن میں خوشیوں کی آمد ، بیٹی کی ماں بننے کی خوشخبری سنا دی۔
‘بھولی بانو’ ، ‘فتور’ اور ‘دیوانگی’ جیسے ڈراموں میں اداکاری کے جوہر دکھانے والی اداکارہ حبا بخاری نے 2021 میں اداکار آریز احمد کے ساتھ ڈراما ‘ انتہائے عشق’ میں بطور ہیروئن کام کیا اور اس کی شوٹنگ کے دوران ایک دوسرے کی محبت میں مبتلا ہوگئے۔
حبا بخاری نے آریز احمد سے 6 جنوری 2022 کو شادی کرلی اور اپنی محبت کو ایک مضبوط رشتے میں بدل دیا۔
آج حبا بخاری نے اپنے مداحوں کو خوشخبری سناتے ہوئے انسٹاگرام پر لکھا کہ ’اس سال نے ہماری زندگی تبدیل کردی ہے، جسے میں لفظوں میں بیان نہیں کرسکتی، ہم اپنی ننھی پری کی پیدائش کا دوسرا مہینہ منا رہے ہیں، تمہاری موجودگی محبت کی سب سے اعلیٰ قسم ہے، اللہ کا شکر ادا کرتی ہوں کہ اس نے اپنی رحمت سے ہمیں نوازا، ہماری پیاری اینجل، ہماری زندگی کی روشنی ہو، ہم نے تمہارا نام ’آئینور‘ رکھا ہے جس کا مطلب چاند کی روشنی ہے۔
حبار بخاری نے بچی کی ایک جھلک شیئر کرنے کےساتھ ایک ویڈیو بھی شیئر کی ہوئی تھی جس میں کچھ اشعار خوبصورتی سے پڑھے جارہے تھے
یہ خبر سن کر حبا بخاری کے مداح خوشی سے پھولے نہ سما سکے اور مبارکبادوں کا تانتا لگ گیا، مداحوں نے انہیں نیک تمناؤں سے نوازا اور خوب دعائیں بھی دیں۔
ستمبر میں ممتاز ہوسٹ نادیہ خان نے ایک شو میں کہا تھا کہ حبا بخاری حاملہ ہیں، جس سے یہ خبر منظر عام پر آئی تھی، پھر 28 ستمبر کو حبا بخاری اور آریز احمد کی لندن سے ویڈیو وائرل ہوئی جس میں نظر آنے والا حبا خان کا بیبی بمپ حمل کی تصدیق کرگیا اور اس کے بعد دونوں نے ایک ویڈیو بنا کر بالآخر اپنی یہ خوشخبری مداحوں کے ساتھ شیئر کی کہ وہ جلد ہی والدین بننے والے ہیں۔
حبا بخاری نے حمل کی خبر کو چھپانے پر وضاحت دی تھی کہ وہ یہ چاہتی تھی کہ جب میرے پراجیکٹس مکمل ہوجائیں تو اس کے بعد میں یہ خبر مداحوں کے ساتھ شیئر کروں کیونکہ کسی پراجیکٹ میں کام کرنے کے دوران ایسی خبر آنا تھوڑا عجیب لگے گا تو کام اور دیگر مصروفیات سے فارغ ہوکر یہ خبر سب کو بتاؤں گی۔
واضح رہے کہ حبا بخاری نے اپنی پوسٹ میں یہ وضاحت بھی کردی ہے کہ ان کی بیٹی کی پیدائش کو دوسرا ماہ ہے۔
