پاکستانی اداکار شہریار منور اپنی زندگی کی محبت ماہین صدیقی کو نکاح کے اگلے روز رخصت کروا کر لے گئے۔
‘آسمانوں پر لکھا’ ، ‘پہلی سی محبت’ ، ‘کچھ ان کہی’ ، اے عشقِ جنون’ اور ‘کہی ان کہی’ جیسے ڈراموں میں بہترین اداکاری کے جوہر دکھانے والے اداکار شہریار منور نے فلم ‘7 دن محبت اِن’ ، ‘ہو من جہاں’ اور ‘پرے ہٹ لو’ میں بھی اپنی بہترین اداکاری سے فینز کے دل جیتے۔
شہریار منور جو اب تک غیر شادی شدہ اداکاروں کی فہرست میں شامل تھے لیکن سال 2025 میں شادی شدہ بن کر انٹری دیں گے کیونکہ وہ دسمبر کی آخری تاریخوں میں اداکارہ ماہین صدیقی سے شادی کے بندھن میں بندھ چکے ہیں۔
دونوں کی شادی کا سلسلہ ڈھولکی نائٹ سے شروع ہوا جس کے بعد قوالی نائٹ، ہلدی نائٹ اور سنگیت نائٹ ہوئیں اور پھر دونوں کی نکاح کی تقریب منعقد کی گئی۔
نکاح کی تقریب میں دونوں نے سفید جوڑوں میں ٹوئننگ کی اور پھولوں کی لڑیوں سے تیار پردے کی دو جانب بیٹھ کر ایجاب و قبول کیا۔
دونوں کی نکاح کی تصاویر سوشل میڈیا پر وائرل ہوتے ہی فینز کسی فلمی دنیا میں کھو گئے اور وہ دنیا بھی کوئی عام نہیں بلکہ شہزادہ اور شہزادی کی کہانیوں پر مبنی فلمی دنیا۔
نکاح کے دن ہی شہریار منور نے اہلیہ کی رخصتی نہیں لی بلکہ اگلے روز بارات کا الگ سے اہتمام کیا گیا۔
شہریار منور نے فوٹو اینڈ ویڈیو شیئرنگ ایپ انسٹاگرام پر ایک پوسٹ شیئر کی جس میں انکے بارات کے دن کرائے گئے اسپیشل فوٹوشوٹ کی تصاویر شامل ہیں۔
ان تصاویر میں دونوں کی محبت واضح طور پر عیاں ہے جس کی وجہ سے فوٹوشوٹ جادوئی کیمسٹری خود میں سموئے ہوئے ہے۔
پوسٹ کے کیپشن میں شہریار منور نے بارات اسپشیل جملہ ‘دلہن ہم لے آئے’ لکھا اور ساتھ بارات لکھ کر سرخ ہارٹ ایموجی بھی بنایا۔
اس موقع پر شہریار منور نے مرونش براؤن پرنس کوٹ پہنا جس پر مختلف طرح کا کام بنا ہوا ہے جبکہ اسکے ساتھ میچنگ ٹاؤزر پینٹس پہنیں۔
شہریار منور کا پرنس ویڈنگ لُک سب کی توجہ کا مرکز بنا ہوا ہے جو کسی اور کا شاہکار نہیں بلکہ معروف فیشن ڈیزائنر فراز منان کا ہے۔
نہ صرف شہریار منور بلکہ ماہین صدیقی نے بھی فراز منان کا ہی تیار کردہ عروسی جوڑا پہنا جو انکی خوبصورتی میں زبر دست اضافہ کرتا معلوم ہوا۔
ماہین صدیقی نے بیج کلر کی لہنگا چولی پہنی جبکہ چولی کے اوپر ایک خاص اسٹائل کی کوٹی بھی پہنی اور دوپٹے کو نہایت خوبصورتی کے ساتھ سر پر سجایا۔
فینز کی جانب سے شہریار منور اور ماہین صدیقی کے دیگر لُکس کی طرح یہ لُک بھی بے انتہا پسند کیا جارہا ہے۔
