لیجنڈری گلوکارہ آشا بھوسلے نے اپنے کانسرٹ میں کرن اوجلہ کے مقبول گانے ’توبہ توبہ‘ کو اپنی منفرد آواز اور انداز میں پیش کر کے سامعین کے دل موہ لیے۔
گانا ’توبہ تو بہ‘ فلم ’بیڈ نیوز‘ کا ہےجس میں وکی کوشل اور ترپتی دمری نے مرکزی کردار ادا کیے تھے۔
آشا جی نے نہ صرف گانا گایا بلکہ وکی کوشل کے مشہور ڈانس اسٹیپس کو بھی اپنی پرفارمنس میں شامل کیا، جس نے کانسرٹ کے شرکاء کو خوب محظوظ کیا۔
انسٹاگرام پر وائرل ہونے والی ویڈیو میں دیکھا جا سکتا ہے کہ آشا بھوسلے نے نہایت دلکش انداز میں ’توبہ توبہ‘ گایا اور سامعین کو حیرت زدہ کر دیا۔
ویڈیو کے ساتھ ایک پوسٹ میں لکھا گیا کہ ’کیا سرپرائز ہے، آشا بھوسلے گانا گاتے اور وکی کوشل کے اسٹیپس کو میچ کرتے ہوئے، یہ ویڈیو انٹرنیٹ پر آج سب سے بہترین چیز ہے۔‘
گلوکار کرن اوجلا نے بھی اس ویڈیو پر ردعمل دیا اور اپنی انسٹاگرام اسٹوریز میں لکھا کہ ’آشا بھوسلے موسیقی کی زندہ دیوی نے توبہ توبہ گایا… ایک ایسا گانا جسے ایک گاؤں کے چھوٹے سے بچے نے لکھا، جس کا موسیقی کا کوئی بیک گراؤنڈ نہیں تھا اور نہ ہی ساز بجانے کا علم۔‘
انہوں نے مزید لکھا کہ ’یہ گانا نہ صرف مداحوں بلکہ موسیقی کے فنکاروں میں بھی بے پناہ مقبول ہوا، لیکن یہ لمحہ واقعی ایک تاریخی موقع ہے، جسے میں کبھی نہیں بھول سکوں گا۔ میں بے حد شکر گزار ہوں اور یہ لمحہ مجھے مزید ایسی دھنیں تخلیق کرنے کی ترغیب دیتا ہے۔‘
’توبہ توبہ‘ فلم ‘بیڈ نیوز‘ کا ایک مشہور گانا ہے، جس کی موسیقی اور بول کرن اوجلہ نے تخلیق کیے تھے۔ وکی کوشل کے منفرد ڈانس اسٹیپس اور ترپتی دمری کی دلکشی نے گانے کو ایک الگ پہچان دی۔
یہ گانا یوٹیوب اور انسٹاگرام رِیلز میں بھی خوب چھایا رہا اور معروف شخصیات نے بھی اسکا استعمال کرتے ہوئے اپنی ویڈیوز جاری کی تھیں۔
