بھارتی اسٹار جوڑی ایشوریا رائے بچن اور ابھیشیک بچن کی طلاق کی افواہیں طویل عرصے سے زیرگردش تھیں تاہم حال ہی میں ان دونوں کی ایک ساتھ پارٹی میں لی گئیں تصاویر سامنے آنے کے بعد یہ افواہیں دم توڑ گئی تھیں۔
مگر بچن خاندان کی ایک تقریب کی تازہ تصاویر نے مداحوں کو ایک بار پھر تشویش میں مبتلا کردیا ہے۔
گزشتہ روز اتوار کو بچن خاندان نے ایک قریبی عزیز راجیش یادیو کے بیٹے کی شادی کی تقریب میں شرکت کی، جس میں امیتابھ بچن، ان کی اہلیہ جیا بچن اور ان کے بیٹے ابھیشیک بچن کو ساتھ تصاویر کیلئے پوز دیتے ہوئے دیکھا گیا۔
راجیش یادو بچن خاندان کی زیرِملکیت پروڈکشن ہاؤس AB Corp کے منیجنگ ڈائریکٹر ہیں۔
تصاویر وائرل ہوتے ہی سوشل میڈیا صارفین کی توجہ بچن خاندان کی اکلوتی بہو ایشوریا رائے کیجانب گئی جو اپنی بیٹی کے ہمراہ اس تقریب سے غائب تھیں۔
پچھلی تصاویر کو طلاق کی افواہوں کی تردید سمجھنے کے بعد تازہ تصاویر دیکھ کر سوشل میڈیا صارفین کمنٹ سیکشن میں یہ تبصرے کرنے پر مجبور ہوگئے کہ ‘کچھ تو گڑبڑ ہے’۔
ایک سوشل میڈیا صارف نے سوال کیا کہ ‘ایشوریا رائے کہاں ہیں؟’ ایک اور صارف نے لکھا کہ ‘یہ لوگ ایشوریا کے بغیر ہی آگئے؟’
دیگر سوشل میڈیا صارفین تصاویر دیکھ کر اس بات پر حیرت کرتے نظر آئے کہ ‘اوہ! جیا بچن مسکرا رہی ہیں، کمال ہے’۔
خیال رہے کہ ابھیشیک بچن اور سابقہ ملکہ حسن ایشوریا رائے 2007 میں شادی کے بندھن میں بندھے تھے اور 2011 میں ان کے ہاں بیٹی آرادھیا کی پیدائش ہوئی تھی۔
گزشتہ ایک سال سے دونوں کے درمیان لڑائی جھگڑوں کی خبر کے بعد طلاق کی افواہ بھی پھیلتی دیکھی گئیں لیکن دونوں ہی منظرِ عام پر آکر ان افواہوں کی تردید کرنے سے بھی گریز کرتے رہے جو ان کے مداحوں کو مزید متجسس کرتا گیا۔
اس دوران ابھیشیک بچن کی اپنی کو-اسٹار نمرت کور کیساتھ ڈیٹنگ کی افواہیں بھی سامنے آئیں اور انہیں ہی اِن دونوں کی طلاق کا سبب ٹھہرایا جانے لگا۔
تاہم رواں ماہ ہی ابھیشیک اور ایشوریا نے طویل عرصے بعد ایک پارٹی میں نہ صرف ساتھ شرکت کی بلکہ ایک ساتھ تصاویر بھی بنوائیں جس کے بعد سے انکی طلاق کی افواہیں دم توڑتی نظر آنے لگی تھیں۔
