نئے سال کے طلوع ہونے والے سورج سے بہت زیادہ توقعات وابستہ ہیں کیونکہ گزشتہ سال کے دوران پاکستان نے مختلف شعبوں میں متعدد سنگ میل حاصل کیے، خاص طور پر پاکستانی خواتین کو آگے بڑھتے ہوئے دیکھا گیا۔

سال 2023 میں دبئی کے مادام تساؤ میوزیم میں سابق وزیر اعظم بے نظیر بھٹو کا مومی مجسمہ کسی پاکستانی شخصیت کی پہلی نمائندگی بنا۔

مارچ میں پاکستانی نژاد برطانوی سفارتکار فوزیہ یونس ٹورنٹو میں قونصل جنرل کے طور پر تعینات ہونے والی پہلی برطانوی مسلمان بن گئیں۔

لاہور ہائی کورٹ بار ایسوسی ایشن کی تاریخ میں ایک یادگار لمحہ دیکھنے میں آیا جب 1893 میں اس کے قیام کے بعد سے صباحت رضوی پہلی خاتون سیکرٹری منتخب ہوئیں۔

جسٹس مسرت ہلالی نے پشاور ہائی کورٹ کی پہلی خاتون چیف جسٹس کی حیثیت سے حلف اٹھا لیا اور بعد ازاں سپریم کورٹ کی دوسری خاتون جج بن کر ایک بار پھر تاریخ رقم کی۔

چیف جسٹس آف پاکستان جسٹس قاضی فائز عیسیٰ کی جانب سے اوکاڑہ کی ایڈیشنل ڈسٹرکٹ اینڈ سیشن جج جزیلہ اسلم کو سپریم کی پہلی خاتون رجسٹرارکا عہدہ تفویض کیا گیا۔

گزرے سال میں پیپلزپارٹی کی سعدیہ دانش گلگت بلتستان اسمبلی کی پہلی خاتون ڈپٹی اسپیکر منتخب ہوئیں۔

متحدہ قومی موومنٹ (ایم کیو ایم) پاکستان کی رکن قومی اسمبلی رانا انصار سندھ اسمبلی میں پہلی خاتون اپوزیشن لیڈر بن گئیں۔

دوسری جانب پاکستانی نژاد نمیرا سلیم نے خلا میں پہنچنے والی پہلی پاکستانی بن کر تاریخ رقم کی۔

28 سالہ حجاب زاہد پاکستان سپر لیگ (پی ایس ایل) کی تاریخ کی پہلی خاتون جنرل منیجر بن گئیں، انہیں ملتان سلطانز کی جانب سے یہ عہدہ دیا گیا۔

معروف کوہ پیما نائلہ کیانی نے 8 ہزار میٹر سے زیادہ بلندی پر 10 چوٹیاں سر کرنے والی پہلی پاکستانی خاتون کوہ پیما ہونے کا اعزاز حاصل کیا۔

خیبرپختونخوا کے ضلع سوات میں لڑکیوں نے پابندیوں اور رکاوٹوں کا سامنا کرنے کے باوجود تحصیل کبل میں ’پہلا‘ خواتین کرکٹ میچ کھیلا۔

خواتین نے شوبز میں بھی اپنی صلاحیتوں کا لوہا منوایا ہے۔ گزشتہ سال گریمی ایوارڈ جیتنے والے پہلے پاکستانی بننے کے بعد عروج آفتاب فروری میں گریمی ایوارڈ ز میں پرفارم کرنے والے ملک کے پہلی بن گئیں۔

اقلیتی خواتین کی جانب سے بھی نئے ریکارڈ دیکھنے میں آئے جب ثمرین عامر کو خیبرپختونخوا کی پہلی مسیحی خاتون ایڈیشنل اسٹیشن ہاؤس آفیسر مقرر کیا گیا۔

گزشتہ سال خواجہ سراؤں کو باضابطہ طور پر بے نظیر انکم سپورٹ پروگرام میں شامل کیا جانا بھی ایک غیر معمولی مثال ہے۔

دنیا بھر کی طرح کراچی میں بھی سال نو کا جشن پرجوش طریقے سے منایا گیا، اس جشن کے دوران شہر کے مختلف علاقوں میں کی گئی ہوائی فائرنگ سے 32 افراد زخمی ہوگئے۔

سال نو کے آغاز پر بہادر آباد، لیاقت آباد، نارتھ ناظم آباد، کریم آباد ، اعظم بستی، کلفٹن اور دیگر علاقوں میں ہوائی فائرنگ کی گئی۔

زخمیوں کو سول، جناح اور عباسی اسپتال میں منتقل کیا گیا، جن میں خاتون، بچہ اور بچی بھی شامل ہیں۔

سال نو کے آغاز پر پولیس نے مختلف علاقوں میں کارروائیاں کرتے ہوئے ہوائی فائرنگ میں ملوث 12 ملزمان کو گرفتار کرلیا اور اسلحہ برآمد کرکے تحقیقات شروع کردی گئی۔

ساؤتھ پولیس نے اسلحہ کی نمائش کرنے کے الزام میں 6 ملزمان کو بھی گرفتار کیا۔

اس دوران ڈی جی رینجرز میجر جنرل اظہر وقاص نے مختلف علاقوں کا دورہ کیا، رینجرز کمانڈر کو سیکیورٹی کی صورتحال سےآگاہ کیا جس پر انہوں نے اظہار اطمینان کیا۔

ڈی جی رینجرز نے ہوائی فائرنگ اور ضابطے کی خلاف ورزی کرنے والوں کے خلاف سخت کاروائی کی ہدایت کی۔

الوداع 2023، خوش آمدید 2024 : نیا سورج نئی امیدوں کے ساتھ طلوع ہوا۔

غزہ کے مظلوم فلسطینیوں سے اظہار یکجہتی کرتے ہوئے نگراں حکومت نے پاکستان میں سال نو پر جشن کی کوئی تقریب نہ کرنے کا اعلان کر رکھا ہے۔

غزہ میں اسرائیلی فوج نہتے فلسطینیوں کا قتل عام کررہی ہے، غزہ پر اسرائیلی جارحیت میں 22 ہزار فلسطینی شہید ہوچکے ہیں۔

ملک بھر میں سال نو پر سکیورٹی کے خصوصی انتظامات کیے گئے۔ اس کے باوجود کراچی میں ہوائی فائرنگ سے 32 افراد زخمی ہوئے۔

2023 کئی یادیں چھوڑ کر رخصت ہوا ہے تو 2024 نئی امیدیں لیکر آیا ہے۔ نئے سال شروع ہونے سے چند گھڑیاں قبل مساجد میں دعائیہ تقریبات کا انعقاد بھی کیا گیا۔

ملک کی سلامتی اور استحکام سمیت تمام اندرونی و بیرونی سازشوں سے نجاد کی دعائیں مانگی گئیں، پاکستان کے معاشی استحکام کیلئے بھی اللہ تعالی سے دعائیں مانگی گئیں۔

جمیعت علمائ اسلام (ف) کے ترجمان نے دعویٰ کیا ہے کہ تھانہ یارک کی حدود میں مولانا فضل الرحمان کے قافلے پر نامعلوم افراد نے حملہ کیا ہے، تاہم، آر پی او نے سربراہ کے یو آئی پر حملے کی تردید کی ہے۔

ترجمان جے یو آئی جلیل جان نے بتایا کہ حملہ تھانہ یارک کی حدود میں کیا گیا، تاہم حملے میں مولانا فضل الرحمان اور ان کے محافظ محفوظ رہے۔

اس دوران پولیس حکام کا کہنا تھا کہ مولانا فضل الرحمان پر ہونے والے حملے کو ناکام بنا دیا گیا، تاہم حملہ آور مسلح افراد فرار ہونے میں کامیاب ہوگئے، اور خوش قسمتی سے حملے میں کوئی جانی و مالی نقصان نہیں ہوا۔

سیکرٹری داخلہ کا مولانا فضل الرحمان کے قافلے پر فائرنگ کا نوٹس
سیکرٹری داخلہ نے مولانا فضل الرحمان کے قافلے پر فائرنگ کے واقعہ کی رپورٹ طلب کی ہوئی ہے۔

ترجمان وزارت داخلہ نے اپنے بیان میں کہا کہ شرپسندوں کو ملک میں فساد پھیلانےکی اجازت نہیں دیں گے، انتخابی مہم کے دوران سیاسی سرگرمیوں کو مکمل سیکیورٹی فراہم کی جائے گی، اور امن وامان و عوام کے تحفظ کو یقینی بنانے کیلئے بھی ہر ممکن اقدامات اٹھائے جائیں گے۔

مرکزی ترجمان جے یو آئی اسلم غوری
ترجمان جے یو آئی اسلم غوری نے ایک پر واقعے کی مذمت کرتے ہوئے کہا کہ سربراہ جے یو آئی مولانا فضل الرحمان کے قافلے کے قریب فائرنگ بزدلانہ کارروائی ہے، بارہا متنبہ کرچکے ہیں کہ ہماری قیادت کے لئے حالات سازگار نہیں۔

اسلم غوری کا کہنا تھا کہ انتظامیہ آئے روز تھریٹس کے حوالے سے لیٹر لکھتی ہے لیکن عملا کوئی قدم نہیں اٹھاتی، واقعہ کی فوری تحقیقات کرائی جائیں، ادارے کیوں اپنی ذمہ داری پوری نہیں کررہے، کے پی اور بلوچستان میں امن وامان کی صورتحال دن بدن خراب ہوتی جارہی ہے۔

معروف صحافی اور اینکر حامد میر
معروف صحافی حامد میر نے اپنے ایکس اکاونٹ پر وزارت داخلہ کا نوٹیفکیشن شیئر کرتے ہوئے بتایا کہ 29 دسمبر کو وزارت داخلہ نے ایک لیٹر جاری کیا تھا، جس میں کہا گیا تھا کہ مولانا فضل الرحمان اور ایمل ولی خان پر حملے کی منصوبہ بندی کی گئی ہے اور صرف دو دن بعد مولانا پر حملہ ہو گیا۔

حامد میر کا کہنا تھا کہ اللہ کا شکر ہے کہ مولانا فضل الرحمان کی جان بچ گئی، سیاسی قائدین سے گذارش ہے کہ بہت زیادہ احتیاط کریں۔

حملے کی تردید
آر پی او ڈیرہ اسماعیل خان ناصر محمود نے مولانا فضل الرحمان کے قافلے پر حملے کی تردید کرتے ہوئے کہا کہ حملہ یارک انٹرچینج پر واقع پولیس چیک پوسٹ پر کیا گیا، اور پولیس کی جوابی کارروائی میں حملہ آور فرار ہوگئے۔

آر پی اور ناصر محمود نے کہا کہ حملے کے وقت مولانا فضل الرحمان موقع پر موجود نہیں تھے۔