کراچی: پاکستانی فلم و ڈرامہ انڈسٹری کی معروف اداکارہ و ماڈل آمنہ الیاس نے کہا ہے کہ پاکستان میں صرف غریب عوام کے لیے قانون ہے، طاقتور لوگوں کیلئے کوئی قانون نہیں۔

گزشتہ روز 23 اگست کو اداکار عفان وحید اور آمنہ الیاس کی رومانوی کامیڈی فلم ‘مستانی’ ملک بھر کے سینما گھروں میں ریلیز ہوئی، اس موقع پر اداکارہ نے صحافیوں سے گفتگو کرتے ہوئے بتایا کہ اُنہوں نے فلم میں عالیہ نامی چنچل لڑکی کا کردار ادا کیا ہے۔

آمنہ الیاس نے فلم میں اپنے کردار کے بارے میں بات کرتے ہوئے کہا کہ میں نے ایک ایسی لڑکی کا کردار ادا کیا ہے جس نے زندگی میں کبھی کوئی دُکھ تکلیف نہیں دیکھی اور وہ اپنی مرضی کے مطابق زندگی جیتی ہے، میں نے اپنے اس کردار سے بہت کچھ سیکھا ہے۔

اس موقع پر صحافی نے آمنہ الیاس سے پاکستان اور بھارت میں خواتین پر تشدد اور جنسی زیادتی کے بڑھتے واقعات سے متعلق سوال پوچھا جس پر اداکارہ نے کہا کہ میں ایک عورت ہونے کی حیثیت سے خود کو پاکستان میں محفوظ نہیں سمجھتی۔

اداکارہ نے کہا کہ خدا نخواستہ! اگر مستقبل میں میرے ساتھ کچھ غلط ہوگیا اور سامنے والا انسان پیسے اور عہدے کے اعتبار سے طاقتور ہوا تو مجھے انصاف کیسے ملے گا؟ کیونکہ پاکستان میں طاقتور لوگوں کے لیے کوئی قانون نہیں ہے۔

اُنہوں نے کہا کہ میں یہاں ایک بات واضح کرنا چاہتی ہوں کہ سب مرد ایک جیسے نہیں ہوتے، ہمارے معاشرے میں کچھ مرد ہی ہیں جو جانور ہیں یا پھر دماغی مریض ہیں، انہی چند مردوں کی وجہ سے ہر مرد بُرا بن جاتا ہے۔

آمنہ الیاس نے کہا کہ ہم جب تک مجرموں کو عبرتناک سزا نہیں دیں گے تب تک تشدد اور جنسی زیادتی کے واقعات میں کمی نہیں ہوگی، اگر جرائم میں کوئی عورت بھی ملوث ہے تو اُسے بھی سزا دی جائے کیونکہ مرد اور عورت دونوں کے لیے قانون یکساں ہے۔

اداکارہ نے کہا کہ نور مقدم کیس کی مثال لے لیں، اس کیس کا ملزم جیل میں سکون سے اپنی زندگی گزار رہا ہے، ابھی تک ملزم کی سزا کا فیصلہ نہیں ہوسکا جبکہ نور کے والدین کو تاریخ پر تاریخ دی جارہی ہے۔

اُنہوں نے مزید کہا کہ اقتدار میں بیٹھے لوگوں کو پاکستان کے سسٹم اور قانون کو بہترکرنے کی ضرورت ہے ۔

اسلام آباد: پی ٹی آئی کے حمایت یافتہ رکن قومی اسمبلی حاجی امتیاز کے پروڈکشن آرڈر جاری کردیے گئے۔

ایکسپریس نیوز کے مطابق یہ آرڈر قومی اسمبلی اجلاس سے قبل ہی جاری کردیے گئے ہیں، اسپیکر قومی اسمبلی سردار ایاز صادق نے حاجی امتیاز وڑائچ کے پروڈکشن آرڈر جاری کیے۔

حاجی امتیاز وڑائچ اینٹی کرپشن گوجرانوالہ کی حراست میں ہیں، اسپیکر قومی اسمبلی نے پنجاب پولیس کو امتیاز وڑائچ کو اسمبلی اجلاس میں پیش کرنے کی ہدایت کی ہے۔

مراسلے اسپیکر ایاز صادق میں ہدایت دی گئی ہے کہ امتیاز وڑائچ کو پیر کے روز اسمبلی میں سارجنٹ ایٹ آرمز کے سپرد کیا جائے، امتیاز وڑائچ کی اسمبلی اجلاس میں شرکت لازمی سمجھتے ہے۔

لاہور: بھارت نےپاکستانی اسنوکر ٹیم کو ویزے دینے سے انکار کردیا۔

تین کیوئسٹ احسن رمضان، حمزہ الیاس اورحسنین اختر کے ساتھ چیئرمین پاکستان بلیئرڈ ایند اسنوکر ایسوسی ایشن عالمگیر شیخ اور ریفری نوید کپاڈیا نے ورلڈ انڈر سیون 17 اورانڈر 21 چیمپئن شپ میں شرکت کے لیے ویزہ درخواست جمع کروائَی تھی۔ بھارت نے پاکستانی اسنوکر ٹیم کو ویزہ دینے سے انکار کردیا۔ یہ ایونٹ 24 سے 31 اگست تک بنگلور میں شیڈول ہے۔

چیئرمین پاکستان بلیئرڈ ایند اسنوکر ایسوسی ایشن عالمگیر شیخ نے ویزہ درخواست مسترد کیے جانے پر افسوس کا اظہارکیا ہے۔ ان کا موقف ہے کہ پاکستان اسپورٹس بورڈ کے ساتھ تمام وزارتوں کے این او سیز لے کر ویزوں کے لیے اپلائی کیا تھا۔ ویزہ دینے سے انکار کرکے بھارت نے پاکستان کو یقنی میڈلز سے محروم کیا ہے۔ ہم نے اس مسئلے پرانٹرنیشنل ورلڈا سنوکر ایسوسی ایشن اور بھارتی منتظمین سے بھرپور احتجاج کیا ہے۔

کراچی: سندھ کے سینئر وزیر شرجیل انعام میمن نے کہا ہے کہ ریڈ لائن بی آر ٹی پر دن رات کام جاری ہے۔

سندھ کے سینئر وزیرِ اطلاعات، ٹرانسپورٹ ، ایکسائز ،ٹیکسیشن و نارکوٹکس کنٹرول شرجیل انعام میمن نے ریڈ لائن بی آر ٹی منصوبے کا تفصیلی دورہ کیا۔ شرجیل انعام میمن نے منصوبے پر کام کی رفتار کا جائزہ لیا اور ضروری ہدایات دیں۔

میڈیا سے گفتگو کرتے ہوئے سینئر وزیر شرجیل انعام میمن نے کہا کہ ریڈ لائن بی آر ٹی پاکستان کی پہلی بی آر ٹی ہوگی جس پر بائیو گیس پر چلنے والی بسز چلیں گی، شہری علاقوں میں مختلف رکاوٹوں اور یوٹیلیٹیز کی وجہ سے کام میں تاخیر ہوتی ہے۔

انہوں نے کہا کہ ریڈلائن بی آر ٹی کے مختلف حصوں پر کام بہت پہلے مکمل ہونا تھا، لیکن نگران حکومت کی عدم توجہی اور لاپرواہی کی وجہ سے اس میں تاخیر ہوئی اور عوام کو مشکلات کا سامنا کرنا پڑا۔

سینئر وزیر شرجیل انعام میمن نے کہا کہ ملیر کینٹ روڈ پر ٹیپو سلطان انڈر پاس اور ملحقہ روڈ کو 31 اکتوبر سے باضابطہ طور پر عوام کے لئے کھول دیاجائے گا۔ دو ماہ پہلے کانٹریکٹر نے ٹیپو سلطان انڈر پاس اور اس سے ملحقہ سڑک کے کام کی تکمیل کا وعدہ تھا آج دو ماہ بعد کام مکمل ہو چکا ہے، ورلڈ بینک کے تعاون سے محکمہ ٹرانسپورٹ کی جانب سے یلولائن بی آر ٹی پر بھی کام شروع کیا جا رہا ہے۔

شرجیل انعام میمن نے کہا کہ محکمہ ٹرانسپورٹ حکومت سندھ الیکٹرک ٹیکسی بھی شروع کرنے جا رہا ہے، خواتین کے لئے پنک ٹیکسی سروس شروع کی جائے گی، جبکہ مردوں کے لئے الگ ای وی ٹیکسی سروس ہوگی، ریڈ لائن بی آر ٹی منصوبے میں تاخیر ہوئی، لیکن ترجیح ہے کہ مزید تاخیر نہ ہو۔